Cusisaca cabe Dios ibáꞌ
4
Udiꞌdi si irá nga la?
biya dxie ne biiya zuxele ndaga ti puerta ibáꞌ,
ne na dxa ridxi bina diaꞌga ruluíꞌ trompeta que,
rabi naa:
―Udxiꞌba raríꞌ,
ulué lii irá ni chi aca ruꞌ.
2 Oraque pe dxá ladxiduáꞌ de Espíritu Santu,
ne biiya zuhuaa ti asientu raqué,
ti trono ra ribí ni runi mandar,
ne zuba tuuxa lú ni.
3 Ne ruzaani ni zuba raqué casi ti guie jaspe o cornalina.
Naguu ti arcu iris leꞌ trono que,
ruluíꞌ guie esmeralda.
4 Nuu trono que galahui de sti veinticuatro trono.
Ne zuba ti binni gola lu cada trono,
nacu lari quichi ne nuu corona de oro ique.
5 Biree xpiaani rayu lu trono ni nuu galahui que,
ne ucuá ridxi ne uxidxi rayu.
Cá gui gadxe ndaa guiri bidxi nezalú trono que.
Zeda gaca cani gadxe Espíritu sti Dios.
6 Ne nexhe casi lapa nisa ra lu trono que,
ruluíꞌ espeju nayaꞌniꞌ.
Nuu tapa bultu nabani cueꞌ trono que,
tobi cada ladu,
napa stale guielú nezalú ne neza deche.
7 Primé que ruluíꞌ ti lion ne rairopa que ruluíꞌ yuze.
Raguionna que napa lú binni,
ne raidapa que ruluíꞌ ti bisiá canapapa.
8 Cada bultu que napa xhoopa xhiaa,
cá guielú xaguete ne luguiáꞌ.
Ne idubi dxi idubi gueela cucaa ca ridxi:
Tobi lucha Señor Dios ni jma nandxóꞌ,
ni nuu yanna ne qué huayuu dxi guiaadxaꞌ,
ne qué ziuu dxi guiaadxaꞌ.
9 Cusisaca ca ni zuba lu trono que,
ni qué ziuu dxi gatiꞌ,
ne cudii ca diuxquixe laabe.
Cada guni ca ni,
10 ruzuxibi idubi veinticuatro binni gola que nezalú ni zuba lu trono ni qué ziuu dxi gati que.
Ne riguixhe ca corona stica nezalú be,
ne na caꞌ:
11 Señor Dios stidu,
lii siouꞌ nga naquiiñe udxiꞌba du
ne usisaca du ne iní du nandxóꞌ loꞌ.
Purti lii bizáꞌ lu irá xixé ni nuu.
Uyáꞌ ni ne nuu ru ni purti nga ni na luꞌ.