Ni gabi be cani nuu Sardis
3
Ne ni chi tidxe lii rarí di la?
bicaa lu ni cayapa ca xpinne ni nuu Sardis:
“Sicarí na ni napa gadxe espíritu sti Dios ne gadxe luceru que:
Nanna xi irá runi tu.
Ma guti tu,
neca zaꞌbi diidxa nabani tu.
2 Caꞌru ixele chaahui pe tu,
nuu xcaadxi ra zinanda tu ni jneza.
Yanna,
laibani,
lauzuhuaa dxiichi lu ni napa ru tu,
purti mayaca initilú ni.
3 Laguietenalaꞌdxi ni ma biziidi tu.
Lachinanda ni ne lainaba perdón Dios.
Pa qué guni tu ni la?
ziaa ra nuu tu sin ganna tu,
casi rie gubaanaꞌ.
4 Peru nuu ru xcaadxi lade tu ni qué ninanda modo ze tu.
Ma bia ladxidóꞌ cabe casi ñaca nacu cabe lari quichiꞌ,
ne zazá né cabe naa saca qué niree chu cabe de naa.
5 Ni riguixhe dxí irá ni uquiinde laa la?
zacu lari quichi ne qué zuxhaya lá lu guiꞌchi ra cá lá ni napa enda nabani ni qué zaluxe.
Zanié xpinne laaca nezalú Bixhozeꞌ ne nezalú ca ángel.
6 Ni racalaꞌdxi guiene la?
ucaa diaga ni cayabi Espíritu Santu ca xpinneꞌ.”
Ni gabi be cani nuu Filadelfia
7 Ne ni chi tidxe lii rarí di la?
bicaa lu ni cayapa ca xpinne ni nuu Filadelfia:
“Sicarí na tobi lucha Señor ni qué rusiguii:
Naaze llave sti rey David,
ne ora uxhele iruti zanda useeguꞌ,
ne ora useeguaꞌ iruti zanda uxheleꞌ.
8 Nanna xi irá runi tu.
Ma bixhele puerta para laatu,
ne iruti zanda useegu ni.
Purti neca huaxiéꞌ laatu para ucaa lú tu ni cadi jneza,
peru huacaa tu stiidxa ne huasihuinni tu xpinne laatu.
9 Nga runi zuchiña ca xpinni binidxaba uzuxibi xa ñee tu,
cani na judíu laa peru cadi dxandí ni,
cusiguii si caꞌ.
Zune ni para ganna ca nadxiee laatu.
10 Bizuuba tu stiidxa ra gudxe laatu cadi ixhacalaꞌdxi tu.
Nga runi zapa laatu dxi gueeda enda naná idubi naca guidxilayú para ihuinni uná nga xpinneꞌ.
11 Nagueenda zendaꞌ.
Cadi undaa tu ni ma napa tu ti qué chuꞌ tu gaxha laatu ni nexhe icaa tu.
12 Ni quixhe dxí irá ni uquiinde laa la?
zune laa casi ti pilar ndaani xhiuꞌdu Dios stinneꞌ ne qué ziuu dxi iree raqué.
Zucaa lá Dios stinne lucuá cabe ne lá xquidxi Dios stinneꞌ,
Jerusalén cubi ni guiete de ibáꞌ ra nuu Dios stinneꞌ.
Ne zucaa laꞌya lucuá cabe,
ti lá cubi.
13 Ni racalaꞌdxi guiene la?
ucaa diaga ni cayabi Espíritu Santu ca xpinneꞌ.”
Ni gabi be cani nuu Laodicea
14 Ne ni chi tidxe lii rarí di la?
bicaa lu ni cayapa ca xpinne ni nuu Laodicea:
“Sicarí na ni qué rusiguii sínuque irá ni riníꞌ la?
jneza ni,
ne de laa zeeda irá ni bizáꞌ Dios:
15 Nanna xi irá runi tu.
Nanna cadi cayuni pe tu ni rabeꞌ,
ne caꞌru usaana chaahui tu ni.
Casi ñaca cadi nandáꞌ tu ne cadi nananda tu,
sínuque nadxaa si.
Jma galán pa ñaca tu nananda o nandáꞌ.
16 Peru purti nadxaa si tu la?
zabee laatu de ra nuaaꞌ,
casi ñaca nidxiba laatu.
17 Na tu ricu laatu,
qué huazaaca tu gastiꞌ,
ne gasti cayaadxa laatu.
Nin ganna tu pa biree uniti tu dede ñá binni laatu.
Qué gapa tu gastiꞌ,
nin ni gacu tu,
ne nacheepa lú tu.
18 Nga runi cayabe laatu sí tu oro chaꞌhui luaꞌ,
ti dxandí aca tu ricu,
ne laca sí tu lari quichi gacu tu ti qué ituí lú tu nuu tu xie ladi tu.
Ne laca lasíꞌ coliriu idaa guielú tu para iná tu.
19 Rulidxe cani nadxiee ne ridinde nia laacaꞌ.
Nga runi lainaba perdón Dios ne laguni xhiiña ne gana.
20 Laguuyaꞌ zuhuaa ra puerta ladxidóꞌ to,
cuxhidxe nayaꞌ.
Ni ucaa diaga stidxe ne uxhele ladxidóꞌ guiuaa la?
casi ñaca zahua xhie nia laa,
ne laa zo xhi né naa.
21 Tu quixhe dxí irá ni uquiinde laa la?
zuni mandar ne naa casi cayune mandar nia Bixhozeꞌ,
purti gudixhe dxie ni biquiinde naa.
22 Ni racalaꞌdxi guiene la?
ucaa diaga ni cayabi Espíritu Santu xpinneꞌ.”