Cani cadi dxandí apóstol
11
Pa ñanda si qué nucueeza tu naa ninié caadxi ni ruluíꞌ enda huati.
Laudii lugar inié ni.
2 Celoso naa ne laatu,
casi celoso Dios ne laatu,
purti napa laatu casi ti binni dxaapa ni ma bidiee para ichaganá Cristu,
ne racaladxe uchiña laatu ra nuu be nayá.
3 Peru cadxibe chuꞌ tu usiguii laatu casi bisiguii beenda que Eva,
quite ique tu ne ma cadi chi nanda tu Cristu de idubi ladxidóꞌ to.
4 Purti ruuya rucaa diaga tu cani reda usiidi laatu stiidxa stobi,
cadi stiidxa Jesús ni yegüí né du laatu chiqué.
Ne oraqueca ricaa tu sti espíritu adxé para ni ma napa tu ca,
ne runi cre tu adxé modo ilá tu.
5 Zuluáꞌ cadi jma huaxiéꞌ risacaꞌ para ca xcaadxi ni zinanda tu ca,
cani na apóstol laa.
6 Neca huaxiéꞌ naa para iniéꞌ,
peru riene chaahue ni rusiideꞌ,
ne hualué ni laatu lu irá ni huayuneꞌ.
7 Ñee bichee ra byue nia laatu stiidxa Dios sin ñaxa la?
Bine casi ñaca gasti nga naa para udxiiba laatu.
8 Casi ñaca ulana sti ca xcaadxi xpinni Cristu ra ucuaa ni biseenda ca luaꞌ para gunda bine dxiiña lade tu.
9 Purti ca dxi nuaa lade tu ne biaadxa xiixa naa la?
qué ninaba nin tobi de laatu ñacané naa,
sínuque bedané ca hermanu de Macedonia ni caquiiñeꞌ,
ne zacá qué nuguaya gasti laatu ne qué ziuu dxi gune ni.
10 Napa stiidxa Cristu ndaani ladxiduáꞌ,
ne zanda guni cre tu ni cayabe laatu riꞌ.
Huayune dxiiña idubi Acaya sin guiaxaꞌ,
ne iruti zanda gaxha naa enda nayeche ni rapa ora rune ni zacá.
11 Xiñee na tu rinié zacá yaꞌ.
Ñee purti cadi nadxiee laatu la?
Dios nanna pabiáꞌ nadxiee laatu.
12 Peru zune ruaꞌ casi cayune ri para useegua ruaa cani ruyubi isaca purti runi dxiiña cásica runeꞌ.
13 Cadi dxandí apóstol laacabe.
Canausiguii si cabe binni,
rutiidi cabe laacabe pur apóstol sti Cristu.
14 Cadi enda ridxagayaa nga purti binidxaba laca rutiidi laa casi tobi ni zeeda de Dios.
15 Zacaca runi ca xpinni be,
ma na ca nachaꞌhui ca para guni cre binni laacaꞌ.
Peru zadxiña dxi uquixe Dios ni laacaꞌ.
16 Chi tidxe laatu sti tiru,
cadi gapa tu naa de ni nahuati.
Peru pa na tu nahuate la?
laudii lugar naa inié casi riníꞌ ni nahuati,
ti laca ganda udxiiba naa caadxi.
17 Rarí huaxa cadi Señor cayabi naa xi iniéꞌ,
sínuque canié huate siaꞌ purti cudxiiba laca naa.
18 Yáquexa stale tu rudxiiba laca laa pur ni runi ndaani guidxilayú la?
naa laca zune ni.
19 Laatu na tu nuu xpiaani tu,
peru oraqueca rucaa diaga tu cani caníꞌ enda huati.
20 Rudii tu lugar ucaa cabe laatu yaga,
ne uxhii cabe laatu ne quite cabe laatu para gaxha cabe stitu,
ne guni cabe menu laatu,
ne capa cabe ruaa tu.
21 Rituí lua gabe ni laatu,
qué ñapa du valor ñuni du laatu zacá.
Irá ra huayacaná Pablu
Peru pa nuu tu qué ridxibi udxiiba laca laa la?
naa laca qué zadxibe gune ni,
neca inié casi riníꞌ ni nahuati.
22 Pa na cabe hebreu laacabe la?
naa laca hebreu naa.
Pa binni Israel laacabe la?
naa laaca.
Pa za cabe de Abraham la?
naa laca zaya de Abraham.
23 Pa na cabe runi cabe xhiiña Cristu la?
naa jma rusi rune ni.
Canié huate siaꞌ raríꞌ.
Huayune dxiiña jma que laacabe,
huadiiñe jma que laacabe,
huayeguayuaa jma que laacabe.
Stale tiru huayuaa naxoo,
de yacadóꞌ guuti cabe naa.
24 Gaayu tiru udiñe ca judíu naa,
cada tiru ne treinta y nueve chicotasu.
25 Chonna tiru uluu cabe palu naa,
ne bichá cabe guie naa ti tiru,
ne chonna tiru biaazi barcu ra ziaa ne bixuba laahua lu nisadóꞌ ti dxi ne ti gueelaꞌ.
26 Huazaya irá ladu,
ne stale tiru huayuaa naxoo ra biree guiigu ne ra biree gubaana luaꞌ,
ne lade binni xquidxeꞌ,
ne lade cani cadi binni xquidxeꞌ,
ndaani guidxi ne ndaani guiꞌxhiꞌ,
ne lu nisadóꞌ.
Laca huayuaa naxoo lade cani na hermanu laa peru cadi dxandíꞌ.
27 Huayune dxiiña naná dede ra bidxagaꞌ,
ne nabé huabee xcaandaꞌ,
huayaana sin gahuaꞌ,
huayate nisa.
Ne laca stale tiru gasti ni gahuaꞌ,
huayaca naꞌnda ne huayaana sin lari gacuaꞌ.
28 Peru cadi nga si,
sínuque nuu ru ni cuchiiña naa.
Nuaa xizaa pur irá cani ma bini cre Cristu irá ra huayaaꞌ.
Riguaa xa ique laacaꞌ.
29 Ne pa nuu tobi qué ganda uzuhuaa chaahuiꞌ,
ñee na tu qué racaná ladxiduáꞌ casi ñaca naa cayaca ni la?
O pa nuu tu cayuni pur guiaba stobi,
ñee na tu qué rudu naa la?
30 Peru pa naquiiñe uchaya enda naróꞌ stinne la?
zuzeete ni rusihuinni gasti qué zanda gune stubeꞌ.
31 Dios,
Bixhoze Jesucristu Señor stinu,
ni qué ziuu dxi guiaana dxí de isaca,
nanna cadi cusiguieeꞌ.
32 Dxi nuaa Damasco zuba ti gobernador ni bicuí rey Aretas,
ne bizuhuaa gendarme ra puerta sti guidxi que para inaaze naa,
useguyoo naa.
33 Peru uluu ca hermanu naa ndaani ti dxumi su,
undete ca naa ra ventana sti lindaa ni nuu guidxi que,
ne zacá bilaꞌya de lu ná be.