Irá ni biluíꞌ Señor laabe
12
Qué zabee nduaꞌ gasti udxiiba laca naa.
Ni jma naquiiñe nga uzeete irá ni biluíꞌ Señor naa ne ni biiya casi ñaca lu bacaandaꞌ.
2 Runebiaꞌya ti hombre ni runi cre Cristu,
ma raca catorce añu undisa Dios laabe yené laabe ibáꞌ,
peru qué ganna diaꞌ pa ne cuerpu stibe uyé o pa sin cuerpu.
Dios si nanna.
3 Peru nanna uyé be,
casi rabe laatu ca,
pa ne cuerpu o pa espíritu si stibe nga qué ganna diaꞌ.
Dios si nanna.
4 Peru biasa be uyé be,
ne ni bina diaga be raqué la?
iruti zanda iníꞌ ni,
ne cadi nexhe iníꞌ binni ni.
5 Ñanda nuchaya enda naróꞌ stibe,
peru qué zuchaya enda naróꞌ stinne sin uzeete cani rusihuinni gasti qué zanda gune stubeꞌ.
6 Neca pe ñacaladxe nudxiiba laca naa,
qué niree ni enda huati purti dxandí ni.
Peru qué rune ni,
ti iruti udxiiba naa jma que biaꞌ ruuya cabe naca ne biaꞌ iniéꞌ.
7 Nabé sicarú ni biluíꞌ Dios naa ne ñanda ñabe naa risaca purti biiya irá ni.
Peru para cadi gune ni,
beeda ti yuuba luguiaꞌya casi ra ridaabi guichi.
Biseenda binidxaba ni para guniná naa.
8 Ma chonna tiru unaba lu Señor cuee ni de naa.
9 Peru na rabi naa:
“Naa nuaa para acaniá lii,
ne nga si caquiiñuꞌ.
Purti jma rihuinni enda nandxóꞌ stinne ora cayaadxa stipa lii.”
Nga runi jma rieche ora huaxiéꞌ stipa napaꞌ,
purti óraque jma rusi rihuinni enda nandxóꞌ sti Cristu luguiaꞌyaꞌ.
10 Ne nga ca runi rieche ora racanaꞌya pur Cristu ne ora rudxii deche cabe naa,
ne ora qué gapa ni caquiiñeꞌ,
ne ora riladxi cabe naa,
ne ora nuaa lu ni nagana,
purti nanna ora riaadxa stipa naa la?
jma rusi racané Cristu naa.
11 Ma bidxiiba laca naa casi runi tobi ni nahuati,
peru laatu biquiinde tu naa gune ni.
Laatu nga nudxiiba tu naa.
Neca qué risaca gastiꞌ,
peru qué risaca ni na apóstol laa que jma que naa,
ne rusisaca sica tu laacaꞌ.
12 Bine dxiiña lade tu sin nixhacaladxeꞌ,
ne bihuinni dxandí apóstol naa pur ca seña ne milagru ne dxiiña nandxóꞌ ni biiya tu bine lade tu.
13 Ti modo si qué ñune laatu casi bine ca xcaadxi xpinni Cristu:
qué ñabe laatu ñacané tu naa.
Laguni perdonar naa pa cadi jneza ni bine laatu ca.
Ra cuzeete Pablu pabiáꞌ nadxii laacabe
14 Ma ne ndi raguionna tiru chaa ra nuu tu.
Peru laca qué zanaba acané tu naa purti cadi cuyube stitu sínuque laatu.
Cadi naquiiñe utopa lú binni para bixhoze ne jñaa,
sínuque bixhoze cabe ne jñaa cabe nga utopa lú para laacabe.
15 Qué ziaꞌya unite irá ni napa pur laatu,
dede nin xpida qué ziaꞌya para ganda acaniá laatu iniisi tu.
Peru ruzuluáꞌ siaꞌ laga jma cayanaxhiee laatu la?
jma huaxiéꞌ nadxii tu naa.
16 Ruluíꞌ nuu de laatu na bisiguiee laatu ne udxite siaꞌ laatu,
neca nanna caꞌ qué nudiee lugar ñuaꞌ tu naa.
17 O na tu udxite laatu ra biseenda cani uyé ra nuu tu que la?
18 Unié nia Titu chi ganna laatu,
ne biseenda nia laa sti hermanu.
Ñee udxite si Titu laatu dxi uyé la?
Ñee cadi tobi si modo uzá du,
ne cadi iropa du bini du dxiiña de idubi ladxidóꞌ do lade tu la?
19 Zándaca ma na tu cuyubi si du guiaana du bien ne laatu.
Peru cadi zacá di ni,
sínuque caní du nezalú Dios ni na Cristu iní du.
Ne cayuni du ni,
hermanu ni nadxiee caꞌ,
para acané du laatu.
20 Purti cadxibe chindaya cadi cayuni tu casi ñuuladxe ñuni tu.
Ne zaqueca zándaca qué chuꞌlaꞌdxi tu modo chaa ra nuu tu.
Cadxibe gueda ndaya laatu nuu dinde tu,
cada tobi qué na tidi stobi lú,
cadxiichi tu,
cada tobi cuyubi para laa si,
caníꞌ saa tu,
cayaani ná saa tu,
cada tobi cudxiiba laca laa,
ne cadi cayuni tu cultu jneza.
21 Ne laca cadxibe guni laatu gueda usituí Dios stinne lua ne guuna ora guuya nuu caadxi de laatu ni huachee dede ma xadxí,
ne caꞌru inaba perdón,
caꞌru usaana enda rapa jnadxii ne irá ni cadi jneza ni riulaꞌdxi xcuerpu.