Naca Pablu xaíque stícabe
10
Naa nga Pablu.
Cayaca nachaꞌhui ne laatu ne canié nia laatu ne diidxa nadóꞌ casi ñaca Cristu caníꞌ né laatu.
Nuu tu na ridxibe inié ora nuaa lade tu.
Ixele siaꞌ,
óraque ru ma caniéꞌ.
2 Peru gabe caꞌ laatu,
laguni jneza ti cadi tinde nia laatu ora chaa ra nuu tu,
purti qué zadxibe inié nia cani na cadi dxandí xhiiña Dios ndi canayuneꞌ.
3 Neca binni guidxilayú laadu peru qué rucáꞌ lú du casi rucaa lú binni guidxilayú.
4 Purti ni riquiꞌñe du para ucáꞌ lú né du la?
cadi casi ni riquiiñe binni guidxilayú,
sínuque nandxóꞌ ni casi nandxóꞌ Dios ni bidii cani laadu para uchiá né du intiica ni quixhe cabe para cadi chindá stiidxa Dios ra nuu cabe.
5 Ruseꞌgu du ruaa cani riguiñe yu stiidxa Dios,
cani raca nandxóꞌ ne riguixhe xiixa para qué chuꞌ tu gunibiáꞌ Dios.
Ruyubi du ucueeza du irá ni riníꞌ ique binni guidxilayú,
ti iníꞌ ique ca ni na Cristu.
6 Ne ora ma irá tu uníꞌ tu zuzuuba tu diidxa la?
zusaba ná du de laatu ni qué guni ni.
7 Laatu ruuya tu ni rihuinni si.
Pa nuu de laatu na ma xpinni Cristu laa la?
ganna dxichi laca xpinni Cristu naa.
8 Ne neca nabé ruzeete naca xaíque stitu,
peru qué rituí lua inié ni,
purti bisaana Señor naa guuya iniisi tu lu jneza,
ne cadi para guutua ñee laatu.
9 Cadi zácaxa tu cuchibe siaꞌ laatu pur ni rucaa lu ca guiꞌchi ni ruseenda ra nuu tu.
10 Nuu tu na ridinde nia laatu ne rinié naduxhu lu guiꞌchi ni rucaa lú tu,
peru ora ma nuaa ra nuu tu ma qué ruluíꞌ pa zanda gune xiixa,
ne qué ganna iniéꞌ.
11 Ganna ca cani caníꞌ zacá,
cásica ni rucaa lu guiꞌchi ora nuaa zitu de laatu la?
zacaca zanié ora chaa ra nuu tu.
12 Zitu zuhuaa lua uchaaga naa cani rudxiiba laca laa.
Gasti xpiaani cabe.
Laca laacabe riníꞌ cabe pa jneza cayuni cabe ne qué ruyubi cabe xi na Dios,
ne ruchaaga biaꞌ saa cabe ni runi cabe.
13 Laadu qué zuni du dxiiña ni qué niguixhe Dios guni du ne óraque udxiꞌba du laadu ti bini du ni.
Dios riguixhe ra guni du dxiiñaꞌ,
ne biseenda laadu dede ra nuu tu ndaani guidxi Corinto.
14 Ne cadi cayúꞌ du lú ni gudixhe Dios para stobi,
purti nirudóꞌ laadu yegüí du stiidxa Cristu lade tu.
15 Qué rudxiꞌba du laadu lu xhiiña stobi,
sínuque ribeza du idale fe stitu ti irooba xhiiña du lade tu sin tidi du biaꞌ ra ma nexhe guni du dxiiñaꞌ.
16 Ne óraque ma zanda chi güi du stiidxa Cristu ca xcaadxi guidxi ni nuu cherica de xquidxi tu,
ra iruti caꞌru guni dxiiñaꞌ,
purti qué zudxiꞌba du laadu lu xhiiña stobi.
17 Casi cá lu Xquiꞌchi Dios:
“Tu acalaꞌdxi udxiiba laa la?
iníꞌ ni biꞌni Señor pur laa.”
18 Purti qué risaca ni rudxiiba laca laa,
sínuque ni rudxiiba Señor laa,
ngue nga risaca.