Enda riníꞌ adxé idioma
14
Laucaa ique ganaxhii saa tu de idubi ladxidóꞌ to,
ne laca lauyubi gapa tu ca gracia ni rudii Espíritu Santu,
peru nirudóꞌ gracia para güi tu stiidxa Dios.
2 Purti ora caníꞌ tobi idioma ni iruti riníꞌ la?
cadi caníꞌ né di be binni guidxilayú,
purti qué zanda guiene binni guidxilayú laabe,
sínuque caníꞌ né be Dios.
Cusiníꞌ Espíritu Santu laabe xiixa ni caꞌru usiene Dios binni.
3 Peru tobi ni ruiꞌ stiidxa Dios la?
riníꞌ né binni para acané laaca iniisi ca lu neza sti Dios,
ne para usieche laacaꞌ,
ne para cuaqui dxí ladxidóꞌ caꞌ.
4 Ni riníꞌ sti idioma adxé la?
racané laca laa,
peru ni ruiꞌ stiidxa Dios,
racané irá xpinni Cristu.
5 Ñacaladxe nudii Espíritu gracia irá tu para niníꞌ tu adxé idioma,
peru ni jma ñacaladxe nga ñapa tu gracia para ñuiꞌ tu stiidxa Dios.
Jma risaca ni ruiꞌ stiidxa Dios que ni riníꞌ adxé idioma,
purti pa qué chuꞌ tu gabi binni xi na ni uníꞌ ngue la?
qué zacané di ni para uzuhuaa chaahui ca xpinni Cristu.
6 Hermanu caꞌ,
ximodo ñacaniá laatu pa ñaa ra nuu tu ne ninié adxé idioma ne qué ñue nia laatu ni biluíꞌ Dios naa,
ne qué nusiene laatu ni caꞌru ganna tu,
ne qué ñue nia laatu stiidxa Dios,
ne qué nusiide laatu gasti yaꞌ.
7 Cadi nabani flauta ni ruxhidxi cabe,
nin arpa,
peru pa qué iree laꞌna stidxi cani la?
ximodo ganna binni xi son que caxidxi yaꞌ.
8 Zaqueca pa icá corneta ne qué iree laꞌna la?
nuu xa tu nanna pa che guerra.
9 Zacaca nga zeda gaca tu.
Pa iníꞌ tu ni qué riene binni la?
ximodo ndi ganna cabe xi caníꞌ tu.
Casi ñaca caníꞌ stubi tu.
10 Nabé stale idioma nuu ndaani guidxilayú riꞌ,
peru irá ni nuu xi riníꞌ.
11 Peru pa qué randa riene nu xi na ca diidxa ni caníꞌ tobi la?
ruluíꞌ adxé binni laabe ne adxé binni laanu.
12 Zacaca laatu,
yáquexa racalaꞌdxi tu gapa tu gracia ni rudii Espíritu Santu la?
lauyubi gapa tu ca gracia ni jma racané irá ca xpinni Cristu.
13 Ngue runi,
ni riníꞌ adxé idioma la?
naquiiñe inaba lu Dios guiene ni para usiene ni binni.
14 Purti pa inié nia Dios sti idioma adxé la?
espíritu si stinne caníꞌ né laabe peru sin ne xquenda biaaneꞌ.
15 Yanna,
xi guneꞌ.
Sicarí guneꞌ:
zanié nia laabe ne espíritu,
peru laca zanié nia laabe ne xquenda biaaneꞌ.
Zuunda nia laabe ne espíritu,
peru laca zuunda nia laabe ne xquenda biaaneꞌ.
16 Pacaa,
pa udiiu diuxquixe Dios ne espíritu si la?
laga cani qué ñene yaꞌ.
Ximodo udii né cabe lii diuxquixe Dios.
17 Neca pa galán bidii lu diuxquixe Dios,
peru qué ñacanéu stobi que.
18 Rudiee diuxquixe Dios purti jma rinié adxé idioma que irá tu,
19 peru ora nuaa ra cayaca cultu la?
jma riuladxe inié neca gaayu si diidxa peru ne xquenda biaaneꞌ que inié chii mil diidxa de adxé idioma.
Purti ora rinié ne xquenda biaane la?
rusiide binni.
20 Hermanu caꞌ,
cadi iníꞌ ique tu casi riníꞌ ique xcuidi,
sínuque lainíꞌ ique casi riníꞌ ique ni huaniisi,
peru lagaca casi badu huiini luguiá enda malu.
21 Sicarí cá lu Xquiꞌchi Dios:
“Zanié nia ca binni ri de ruaa hombre ni riníꞌ adxé idioma,
ne de ruaa binni de adxé guidxi,
peru nin ne zacá qué zucaa diaga ca naa,
na Dios.”
22 Zacá rihuinni ora riníꞌ binni adxé idioma,
riquiiñe ni casi ti seña para cani qué runi cre,
ne cadi para cani runi cre.
Peru ora güi cabe xiixa ni biluíꞌ Dios laacabe la?
nga riquiiñe para cani ma runi cre ne cadi para cani qué runi cre.
23 Nga runi ora cayuni tu cultu,
pa irá tu caníꞌ tu adxé idioma ne gueda chuu caadxi ni qué gapa gracia que,
o ni qué runi cre,
ñee qué zaná ca ngue cayaca ique tu la?
24 Peru pa irá tu cayuíꞌ tu stiidxa Dios ne chuꞌ tobi ni qué runi cre o tobi ni qué gapa gracia iníꞌ adxé idioma la?
ziuu ngue razón pur ni caníꞌ tu que,
ne pur laani zuuya paraa cuchee,
25 ne zahuinni irá ni gaꞌchi ndaani ladxidóꞌ.
Oraque ziaba rilú ne zusisaca Dios,
ne zaníꞌ dxandí nuu né Dios laatu.
Modo naquiiñe aca cultu
26 Yanna ndi nga laani,
hermanu caꞌ:
ora guni tu cultu la?
tobi guꞌnda ti cantu,
ne stobi usiidi xiixa,
ne stobi güi né laatu xiixa ni biluíꞌ Dios laa,
ne stobi iníꞌ adxé idioma,
ne stobi usiene ni uníꞌ be.
Peru irá ni laguni para acané saa tu.
27 Ora nuu tu caníꞌ adxé idioma la?
zaa iníꞌ chupa o chonna si,
peru tobi gá,
ne óraque guiasa stobi usiene ni iníꞌ cabe que.
28 Peru pa qué guinni iruti tu usiene ni iníꞌ cabe la?
jma galán cadi uzuhuaa cabe iníꞌ cabe,
sínuque cada tobi iníꞌ né Dios stubi.
29 Zaqueca cani ruiꞌ ni gabi Dios laa.
Laca zanda iníꞌ chupa o chonna,
ne ca xcaadxi que guuya chaahui pa jneza caníꞌ cabe.
30 Peru pa uluíꞌ Dios xiixa nacubi tobi de cani zuba cucaa diaga raqué la?
igani ni caníꞌ que,
para uzulú ngue.
31 Purti tu gabi Dios laa xiixa iníꞌ la?
zaa iníꞌ,
peru tobi gá,
tobi gá,
ti irá tu iziidi tu,
ne acané saa tu para udxii lú tu ni.
32 Ni ruiꞌ stiidxa Dios naquiiñe guni mandar espíritu stiꞌ.
33 Purti qué riulaꞌdxi Dios chuꞌ tu hueru hueru,
sínuque riulaꞌdxi be gata chaahui irá cosa.
Cásica irá ra raca cultu sti ca xpinni Cristu la?
34 zaqueca lade tu,
cadi iníꞌ ca gunaa,
purti cadi ne laacabe nexhe iníꞌ cabe.
Napa cabe xidé uzuuba cabe diidxa,
purti nga ca cá lu ley.
35 Ne pa racalaꞌdxi cabe ganna cabe xiixa la?
inaba diidxa cabe xheela cabe ralidxi cabe,
purti cadi galán iníꞌ gunaa ora cayaca cultu.
36 Ñee na tu de laatu biale stiidxa Dios la?
o na tu deru laatu huayuna diaga tu ni.
37 Pa nuu tu na zanda güi né binni stiidxa Dios,
o na ma bidii Espíritu Santu laa xiixa gracia la?
napa xidé icaa ca diidxa ni cucaa lú tu ri casi stiidxa Señor.
38 Peru pa qué na be icaa be ni la?
cadi ulabi tu laabe.