Bibani Cristu
15
Yanna la?
hermanu caꞌ,
chi usietenaladxe laatu de evangeliu ni byue nia laatu.
Laani nga bini cre tu,
ne ma zuhuaa chaahui tu lú ni.
2 Pa gapa tu ni casi byue nia ni laatu la?
zalá tu,
pa dxandí ma bini cre tu.
3 Nirudóꞌ bisiide laatu ni biziideꞌ.
Ne ndi nga laani:
guti Cristu para biaxa stonda nu,
casi cá lu Xquiꞌchi Dios aca ni.
4 Bigaachi be ne bibani be rabionna gubidxa,
casi cá lu Xquiꞌchi Dios.
5 Oraque uyé be ra nuu Pedru ne laca uyé be ra nuu irá ca apóstol.
6 Laca uyé be ra nuu jma de gaayu gayuaa hermanu tobi si lugar.
Stale de laaca nabani ru de yanna,
ne xcaadxi de laaca ma guti.
7 Ne uyé be ra nuu Jacobo ne óraque ra nuu irá ca apóstol.
8 Naa zeda gaca casi baꞌdu ni gule caꞌru izaa xpeeu,
purti de últimu bihuinni be ra nuaaꞌ.
9 Jma huaxiéꞌ naa para ca xcaadxi apóstol,
ne qué iquiiñe para gabi cabe naa apóstol purti uzaya nanda ca xpinni Dios.
10 Peru yanna ma naca ni nacaꞌ purti uca Dios nachaꞌhui ne naa,
ne cadi pur gana si biꞌni be ni,
purti huayune xhiiña be jma que ca xcaadxi apóstol.
Peru cadi naa diaꞌ bine ni,
sínuque ucané be naa para gunda bine ni.
11 Peru gasti naca tu biꞌni dxiiña lade tu,
pa naa o pa laacabe,
purti tobi si ni rusiꞌdi du,
ne nga nga ni bini cre tu.
Zabani ca xpinni Cristu
12 Ma bisiꞌdi du laatu bibani Cristu de lade gueꞌtuꞌ.
Yanna xiñee nuu ru de laatu na cadi dxandí ribani gueꞌtuꞌ.
13 Purti pa qué ribani gueꞌtu la?
nin Cristu qué nibani.
14 Ne pa qué nibani Cristu la?
pur gana si canayuí du stiidxa be,
ne laca pur gana si bini cre tu,
15 ne canausiguii du ra cayuí du stiidxa Dios,
purti canayuí du bisibani be Cristu,
peru pa qué ribani gueꞌtu la?
cadi dxandí ni.
16 Purti pa qué ribani gueꞌtu la?
laca qué nibani Cristu.
17 Ne pa qué nibani Cristu la?
pur gana si runi cre tu laabe ne qué nixá stonda tu.
18 Ne laca ma binitilú ca xpinni Cristu ni ma guti.
19 Ne pa nicá lú nu Cristu para ndaani guidxilayú ri si la?
ñaana nu jma triste lade irá binni.
20 Peru ndi nga laani:
dxandí bibani Cristu de lade gueꞌtuꞌ,
ne nirudóꞌ laabe biasa be lade irá xixé cani ma guti.
21 Purti cásica pur tobi hombre bizulú enda guti la?
zaqueca pur stobi hombre biuu enda ribani de lade gueꞌtuꞌ.
22 Cásica rati irá binni purti za de Adán la?
zaqueca zabani irá cani aca né Cristu tobi si.
23 Sicarí nga gudixhe Dios aca ni:
nirudóꞌ ibani Cristu,
ne dxi gueeda la?
óraque ibani ca xpinni.
24 Ne raqué nga iluxe ni,
ra quixhe dxí Cristu irá xixé ni runi mandar ndaani guidxilayú,
purti zunitilú be irá ni cadi jneza ni nuu lu guidxilayú,
ne óraque ma zudii be ca xpinni be Dios Bixhoze be para guni mandar.
25 Purti napa be xidé guni mandar be dede cuaqui dxí Dios irá cani cadi nuu né laabe tobi si.
26 Ne ni unitilú be últimu nga enda guti.
27 Sicarí cá ni lu Xquiꞌchi Dios:
“Ma ulaꞌqui Dios irá xixé cosa xa ñee be.”
Peru ra na ni irá xixé cosa ca la?
cadi cuzeete di ni ne Dios nexhe xa ñee be,
purti laa gudixhe irá ni xa ñee be.
28 Gudixhe Bixhoze be irá ni xa ñee be,
ne ora ma runi mandar be irá ni la?
laca zuni mandar Bixhoze be laabe,
ti laa aca xaíque sti irá ni.
29 Pa cadi huandí ribani gueꞌtu la?
xiñee nuu tu riuu nisa xcuenta cani ma guti pue.
Xi para runi cabe ni pa qué lica ziuu dxi ibani gueꞌtuꞌ.
30 Ne laadu yaꞌ,
xiñee rudíꞌ du lugar riuu xpida du naxoo irá hora.
31 Hermanu caꞌ,
irá dxi nuaa para gateꞌ,
ne zanda ganna tu dxandí ni,
biaꞌca dxandí rieche nia laatu pur ni biꞌni Jesucristu Señor stinu luguiá tu.
32 Naa zanda pe gabe laatu casi ñaca udinde nia mani duxhu ndaani guidxi Efeso pur Cristu,
peru xi nibee nduaꞌ pa qué ribani gueꞌtuꞌ.
Ne pa ñaca cadi dxandí ni la?
niní nu casi na dichu que:
“Laidóꞌ ne laidéꞌ,
purti qué ganna nu pa nabani ru nu ixíꞌ.”
33 Peru cadi udii tu lugar chuꞌ tu quite laatu.
Casi na cabe:
“Pa idxaagu ni nadxaba la?
zacá ni lii.”
34 Lacuu xpiaani tu ne cadi uchee ru tu,
purti nuu de laatu caꞌru gunibiáꞌ chaahui Dios.
Cayabe ni laatu para ituí lú tu.
Ximodo ibani gueꞌtuꞌ
35 Peru zanda ca chuꞌ tu inaba diidxaꞌ:
“Ximodo ibani gueꞌtu ne ximodo cuerpu guiasa né cabe.”
36 Aque qué riene tu xa.
Ñee qué ganna tu pa intiisi biidxi udxiiba tu napa xidé gati para indani la?
37 Ora riguiꞌba ti biidxiꞌ,
trigu o intiica biidxiꞌ,
cadi biidxi queca iree,
sínuque ma yaga huiiniꞌ.
38 Ne Dios nga udii xpandaga ni,
casi laa racalaꞌdxiꞌ,
ne maca gudixhe be xi bandaga gapa ni.
39 Ne zaqueca cadi tobi si cuerpu nuu.
Adxé cuerpu sti hombre para cuerpu sti maniꞌ,
ne laca adxé cuerpu sti mani huiini para cuerpu sti benda.
40 Nuu ni bizáꞌ Dios para ibáꞌ ne nuu ni bizáꞌ be para ndaani guidxilayú,
peru adxé modo sicarú ni nuu para ibáꞌ ne adxé modo sicarú ni nuu para ndaani guidxilayú.
41 Ne adxé nga biaani sti gubidxa para biaani sti beeu,
ne laca adxé ni para biaani sti ca luceru,
ne laca adxé adxé biaani sti cada luceru.
42 Zacaca nga enda ribani gueꞌtuꞌ.
Riuꞌdxu cuerpu ni riuu ndaani yu,
peru dxi guiasa ni la?
zaca ni ti cuerpu ni qué ziuꞌdxuꞌ.
43 Ora rigaachi ni ndaani yu qué iquiiñe ni,
peru dxi guiasa ni zaca ni ti cuerpu sicarú.
Ora rigaachi ni ndaani yu,
qué gapa ni stipa,
peru dxi guiasa ni huaxa ma napa ni stipa.
44 Ora rigaachi ni ndaani yu,
naca ni cuerpu ni riquiiñe para ndaani guidxilayú riꞌ,
peru dxi guiasa ni,
zaca ni cuerpu ni iquiiñe ibáꞌ.
45 Sicarí cá lu Xquiꞌchi Dios:
“Adán,
primé hombre uca binni nabani.”
Peru zanda gabi nu Cristu nga rairopa Adán,
ne laa naca ti espíritu ni rudii enda nabani.
46 Ne zacá nga laani.
Cadi nirudóꞌ reeda cuerpu ni iquiiñe para ibáꞌ sínuque ni iquiiñe para ndaani guidxilayú,
ne óraque ru nanda ni iquiiñe para ibáꞌ.
47 Za primé hombre que de guidxilayú,
purti de yu uyáꞌ,
ne stobi que za de ibáꞌ.
48 Para enda nabani ndaani guidxilayú ri la?
zeda gaca nu casi primé hombre ni uyáꞌ de yu que,
peru para enda nabani ibáꞌ la?
zaca nu casi ni beeda de ibáꞌ que.
49 Cásica rindee nu hombre ni uyáꞌ de yu que yanna,
zaqueca ziuu dxi chi ndee nu ni beeda de ibáꞌ que.
50 Racaladxe gabe laatu,
hermanu caꞌ,
qué zanda chuꞌ cuerpu ni napa nu ndaani guidxilayú ri ra runi mandar Dios,
purti qué zanda chuꞌ ni riuꞌdxu lade cani qué riuꞌdxuꞌ.
51 Laguuya chaahui ni cucaa rarí diꞌ purti racaladxe guiene tu ni iruti huayene.
Cadi irá nu zati nu,
peru irá nu zuchaa Dios laanu
52 dxi xhidxi últimu trompeta que.
Ne zaca ni ti ratu huiini casi ora riguiñe laga cabe.
Purti zaxidxi trompeta que ne óraque zandisa Dios ca gueꞌtuꞌ,
ne ziasa né ca ti cuerpu ni qué ziuꞌdxuꞌ,
ne zuchaa be irá nu.
53 Purti riquiiñe aca cuerpu ni riuꞌdxu ne ni rati ri ti cuerpu ni qué zati.
54 Ne ora ma napa nu cuerpu ni qué ziuꞌdxu ne ni qué zati que la?
dxi que nga aca ni casi cá lu Xquiꞌchi Dios:
“Ma biluxe enda guti,
purti ma bini ganar enda nabani.
55 Ma qué zanda guniná ru enda guti,
ne ma qué zanda guni ganar ni.”
56 Ra gasti pecadu la?
qué zanda guniná enda guti,
ne qué ñanda ñuni pecadu gasti pa qué ñuu ley.
57 Peru gudíꞌ nu diuxquixe Dios,
purti laa nga acané laanu quixhe dxí nu ni pur ni biꞌni Jesucristu Señor stinu.
58 Nga runi,
hermanu stinne ni nadxiee caꞌ,
lauzuhuaa chaahuiꞌ,
ne cadi iree cueꞌ tu,
ne qué chuꞌ dxi usaana tu de guni tu xhiiña Señor biaꞌ ra ganda tiꞌ,
purti maca nanna tu cadi pur gana si cayuni tu ni.