Enda ranaxhii
13
Pa ninié irá idioma ni riníꞌ irá binni guidxilayú ne dede ni riníꞌ ca ángel,
peru qué ñanaxhiee binni la?
ñeda aca casi guiiba ni rixidxi laa o casi chin ni rixidxi reciu.
2 Ne pa ñapa gracia ñue nia binni ni ñabi Dios naa ne ñene irá ni nagaꞌchi ni qué riene binni,
ne ñanna irá xixé ni zanda ganna binni,
ne ñapa stale fe dede nutuuba dani de ra zuba,
peru qué ñanaxhiee binni la?
gasti nga naa.
3 Zaqueca pa niguiize irá ni napa lu ca pobre para ño caꞌ,
ne dede nudiee cuerpu stinne nicá gui,
peru qué ñanaxhiee laaca la?
abati niquiiñe ni naa.
4 Pa nadxii lu stobi la?
qué zadxiichi né gá lu laa,
ne ziá lu laa.
Pa nadxii lu stobi la?
qué zuyubu tidu lú,
ne qué zuchá lu enda naróꞌ stiuꞌ lú,
ne qué zuꞌnu lii nandxóꞌ,
5 ne qué zaníuꞌ xiixa diidxa para guniná lu laa,
qué zuyubu para lii siouꞌ.
Cadi neca gasti si guni lii maca cadxiichi neu laa,
ne qué ziuu neu laa xiana.
6 Pa nadxii lu stobi la?
qué zieche lu ora uchee,
sínuque ora guni jneza.
7 Ne pa nadxii lu laabe la?
zuni huantar lu laabe ne zuni cre lu laabe.
Intiica gueeda,
nuu neu laabe tobi si ne qué zaree lu gana.
8 Zadxiña dxi ma cadi naquiiñe güi cabe ni gabi Dios laacabe,
ne qué zaníꞌ cabe idioma ni qué niziidi cabe,
ne qué zaquiiñe irá enda biaani ni riquiiñe yanna.
Peru qué ziuu dxi initilú enda ranaxhii.
9 Caadxi si riene nu nagasi riꞌ,
ne zacaca rui nu ni gabi Dios laanu biaꞌ randa si,
10 peru zadxiña dxi ihuinni irá ni nayaꞌniꞌ,
ne dxi que ma qué zaquiiñe di ni nanna nu yanna riꞌ.
11 Dxi guca xcuidi la?
unié casi riníꞌ xcuidi,
uníꞌ ique casi riníꞌ ique xcuidi ne biene biaꞌ riene xcuidi.
Peru dxi ma biniise bisaana irá enda xcuidi que.
12 Nachuundu caduꞌya nu yanna riꞌ,
casi ñaca niduꞌya nu irá cosa lu ti espeju yooxhoꞌ,
peru zadxiña dxi iduꞌya chaahui nu cani casi riduꞌya saa nu lú nu yanna.
Caadxi si riene nagasi riꞌ,
peru zadxiña dxi guiene chaahue irá cosa,
casi runibiáꞌ chaahui Dios naa.
13 De lade irá nga la?
ziaana chonna cosa ni jma risaca:
guni cre nu Dios,
ne icá lú nu laa,
ne ganaxhii saa nu.
Peru ni jma risaca lade guionna nga la?
nga enda ranaxhii.