Gracia ni rudii Espíritu Santu
12
Hermanu caꞌ,
racaladxe guiene tu de ca gracia ni rudii Espíritu Santu.
2 Ma nanna tu dxi qué ñuni cre tu Dios la?
uzá renda tu lu neza sti ca bidóꞌ ni qué riníꞌ.
3 Pur nga runi racaladxe usiene laatu ndiꞌ:
iruti zanda cuꞌ dí Jesús pa cusiníꞌ Espíritu sti Dios laa.
Zaqueca iruti zanda iníꞌ Jesús nga Señor pa cadi Espíritu Santu cusiníꞌ laa.
4 Sicarí nga zeeda ni:
adxé adxé gracia ricaa cada tobi ni runi cre Cristu,
peru tobi si Espíritu Santu rudii irá cani.
5 Zaqueca adxé adxé modo guni nu xhiiña Señor,
peru tobi si Señor nuu.
6 Laca adxé adxé ni runi cada tobi de laanu,
peru tobi si Dios racané laanu guni nu irá ni.
7 Rudii Espíritu Santu xiixa gracia cada tobi de laanu para acané saa nu.
8 Gudixhe Dios xi gracia udii Espíritu que cada tobi.
Nuu tu ucuaa gracia para guiene chaahui ti iníꞌ jneza,
ne nuu tu ucuaa gracia para usiidi ni jma nagana,
peru tobi si Espíritu bidii iropa ni.
9 Ne laca Espíritu queca bidii fe stobi,
ne laca laa bidii poder stobi para usianda binni huará.
10 Stobi bidii be poder laa para guni milagru,
ne stobi bidii be gracia laa para güi né binni ni gabi Dios laa,
ne stobi para ganna uná nga espíritu ni zeeda de Dios ne uná nga ni cadi zeeda de Dios,
ne stobi para iníꞌ idioma ni qué niziidiꞌ,
ne stobi para usiene binni xi uníꞌ ngue.
11 Peru Espíritu que si runi irá ni,
purti cada tobi rudii be laa ni racalaꞌdxi be.
Irá nu naca nu tobi si
12 Zanda uchaaga nu cuerpu stinu ca xpinni Cristu.
Ti cuerpu napa stale ndaa peru tobi si laa.
Zacaca nga ca xpinni Cristu.
Neca stale nu peru tobi si laanu.
13 Naca nu tobi si cuerpu purti uyúꞌ nisa nu pur tobi si Espíritu.
Tutiisi naca nu,
pa judíu o pa cadi judíu,
pa esclavu o pa cadi esclavu peru irá nu ma ucuaa nu tobi si Espíritu.
14 Cadi tindaa si napa cuerpu stinu,
sínuque stale ndaa.
15 Laga pa niná ti chu ñee cadi de cuerpu que laa purti cadi bataná laa,
ñee pur nga cadi zeeda ni lu cuerpu que la?
16 Zaqueca pa niná ti chu diaga cadi de lu cuerpu laa purti cadi guielú laa,
ñee pur nga cadi zeeda ni lu cuerpu que la?
17 Purti pa ñaca puru si guielú ñaca cuerpu stinu la?
ximodo ñuna diaga nu yaꞌ.
O ximodo ñuꞌ xii nu pa ñaca puru si diaga ñapa cuerpu stinu.
18 Peru cadi zacá ni,
sínuque cada ndaa gudixhe chaahui Dios lu cuerpu modo ucalaꞌdxiꞌ.
19 Pa ñaca tobi si ni naca irá ni la?
paraa ñuu cuerpu yaꞌ.
20 Peru modo nuu ni la?
dxandí stale ndaa ni,
peru tobi si cuerpu.
21 Qué zanda di iníꞌ guielú nu,
gabi bataná nu:
“Cadi caquiiñe diaꞌ lii.”
Nin ique nu qué zanda gabi ñee nu:
“Cadi caquiiñe diaꞌ laatu.”
22 Sínuque tindaa de cuerpu stinu ni ruluíꞌ huaxiéꞌ riquiiñe la?
ngue pe nga ni jma riquiiñeꞌ.
23 Ne ca ndaa ni jma huaxiéꞌ risaca la?
jma pe rusichaꞌhui nu laacaꞌ.
Ne ca ndaa ni rituí lú nu ihuinni la?
jma pe rapa chaahui nu laacaꞌ.
24 Ne ca ndaa ni gasti naca ihuinni la?
cadi caquiiñe guiaapa chaahuiꞌ.
Zacá pe gudixhe Dios gaca cuerpu stinu.
Jma bisichaahui be cani caquiiñe uzuchaahuiꞌ,
25 ti cadi chuꞌ dinde irá ni sínuque gapa saa cani laacani.
26 Pa acaná tindaa la?
zacaná irá xixé,
ne zaqueca pa chuꞌ tu usisaca tindaa la?
laca zieche né irá ca xcaadxi laa.
27 Laatu nga cuerpu sti Cristu,
ne cada tobi naca tindaa de laani.
28 Lade ca xpinni Cristu la?
nirudóꞌ ulí Dios ca apóstol,
rairopa cani ruiꞌ né binni ni rabi be laacaꞌ,
raguionna cani rusiidiꞌ,
ne óraque cani runi milagru,
cani rusianda binni huará,
cani racané stobi,
cani nexhe xhiiña Dios ladxi náꞌ,
ne cani riníꞌ idioma ni qué niziidiꞌ.
29 Peru cadi irá xpinni Cristu naca apóstol ne laca cadi irá ruiꞌ né binni ni gabi Dios laa,
ne cadi irá rusiidiꞌ,
ne cadi irá runi milagru,
30 ne cadi irá napa poder para usianda binni huará,
ne cadi irá riníꞌ idioma ni qué niziidiꞌ,
ne zaqueca cadi irá rusiene binni ni uníꞌ ngue.
31 Neca adxé adxé gracia rudii Dios cada tobi,
peru lauyubi gapa tu ca gracia ni jma riquiiñeꞌ.
Yanna ma chi ulué laatu ti neza ni jma rusi sicarú.