Modo quixhe dxí ca xpinni Cristu lu enda ridinde
6
Xiñee ora napa tobi xqueja stobi,
maca ze tu ra nuu justicia.
Biaꞌ cá nga ridxiña tu la?
Xiñee qué rie tu ra nuu ca xcaadxi xpinni Cristu ne cadi ra nuu cani qué runi cre laabe yaꞌ.
2 Ñee qué ganna tu pa ca xpinni Cristu nga cuꞌ biaꞌ stonda binni guidxilayú la?
Yanna pa ziuu dxi cuꞌ biaꞌ tu stonda binni guidxilayú la?
xiñee qué zanda guuya tu ti xiixa huiini si ni cayaca lade tu.
3 Qué xa ganna tu pa laanu nga aca nu juez sti ca ángel.
Ne pa zacá ni la?
xiñee qué ganda quixhe dxí tu ni cayaca lade tu yanna ca.
4 Yanna casi pe chuꞌ dinde de laatu maca ze tu ra nuu cani iruti naca lade ca xpinni Dios.
5 Ndi huaxa cayabe laatu para ituí lú tu.
Ñee nin tobi de laatu cadi nuu xpiaani para quixhe dxí intiica aca lade ca hermanu la?
6 Peru laatu casi tinde né ti hermanu sti hermanu,
maca ziné ngue laa ra nuu justicia,
ni qué runi cre Dios.
7 Ra cadinde tu ca la?
racá nga riree chu tu lu neza sti Dios.
Ñee cadi jma galán ñaca ni,
qué nidxiichi tu ra nuchee né cabe laatu ne ñaxha cabe stitu la?
8 Peru laatu,
lugar de ñuni tu zacá la?
laga riguite tu stobi ne ruyubi tu iree uniti stobi,
ne runi tu ni dede ca hermanu pe stitu.
9 Ñee qué ganna tu pa qué ziuu cani qué runi jneza ra runi mandar Dios la?
Cadi quite ique tu laatu,
purti nin cani napa jnadxii,
nin cani runi cre bidóꞌ,
nin cani riuu né xheela stobi,
nin ca muxeꞌ,
nin cani riuu né muxeꞌ,
10 nin ca gubaanaꞌ,
nin cani rucaa ique puru si gapa bidxichi,
nin ca binni güeꞌ,
nin cani riguu dí,
nin cani ruxhii pobre,
nin tobi de ca nga qué ziuu ra runi mandar Dios.
11 Zacaca guca caadxi de laatu chiqué,
peru yanna ma bia ladxidóꞌ to ne ma ulee chu Dios laatu,
ne ma bixá stonda tu pur Señor Jesús ne pur Espíritu sti Dios stinu.
Yuꞌdu sti Espíritu Santu
12 Zándaca chuꞌ tu náꞌ:
“Libre naa gune ni racaladxeꞌ.”
Ne dxandíꞌ libre laanu guni nu intiisi,
peru nuu de laani qué zabee ndu nu gastiꞌ.
Zaa libre naa gune intiisi peru qué zudiee lugar icaya yaga lu ná nin tobi de laani.
13 Zándaca chuꞌ stobi náꞌ:
“Endaró la?
nuu para uchá ndaani cabe,
ne ndaani cabe para idxá endaró.”
Peru ziuu dxi unitilú Dios iropa cani.
Ne cuerpu stinu la?
napa nu ni cadi para quite nu luguiá gunaa,
sínuque sti Señor ni,
ne laa nga xpixuaana ni.
14 Bisibani Dios Señor de lade gueꞌtuꞌ,
ne laca zusibani laanu pur enda nandxóꞌ stiꞌ.
15 Ñee qué ganna tu pa naca cuerpu stinu tindaa cuerpu sti Cristu la?
Ne pa zacá ni la?
ñee zacaa tindaa cuerpu sti Cristu ca para gune ni tobi si ne cuerpu sti ti gunaa dxaba la?
Qué ziuu dxi.
16 Ñee qué ganna tu pa chuꞌ né tuuxa ti gunaa dxaba ma naca ca tobi si cuerpu la?
Purti sicarí cá ni lu Xquiꞌchi Dios:
“Neca chupa cabe peru zaca cabe tobi si.”
17 Peru tu ma nuu né Señor tobi si la?
tobi si Espíritu napa né laabe.
18 Lausaana enda rapa jnadxii.
Stobi stobi pecadu ni runi binni la?
qué ruchee ne cuerpu stiꞌ,
peru ni gapa jnadxii la?
ngue laca laa cuchee ne cuerpu stiꞌ.
19 Ñee caꞌru ganna tu pa cuerpu stitu nga yuꞌdu sti Espíritu Santu ni nuu ndaani ladxidóꞌ to la?
Dios bidii laatu Espíritu ca,
ne ma cadi stubi tu raca mandar tu.
20 Purti ma uzíꞌ Dios laatu,
ne naroꞌba gudixe be saca tu.
Nga runi lausisaca laabe pur cuerpu stitu ne pur espíritu stitu,
purti stibe cani.