Xi aca cani napa jnadxii
5
Ma nanna binni nuu ni napa jnadxii lade tu.
Nin cani qué runi cre Dios,
qué huadxiña ra ma bidxiña tu ca,
purti nuu tobi de laatu dede ma nuu né jmadrasta.
2 Ne laatu,
lugar de ñuu tu triste lágala raca tu nandxóꞌ.
Ma niladxi tu ni cayuni nga lade tu.
3 Neca nuaa zitu de laatu,
peru ladxiduáꞌ nuu né laatu,
ne ma gudixhe xi aca hombre ca,
casi ñaca ñuaa piaꞌ lade tu,
purti bisaana Jesús Señor stinu ladxi naya gune ni.
4 Lagapa ti junta irá tu,
ne laganna ziuu né ladxiduáꞌ laatu ne laca ziuu né Señor Jesucristu laatu ne enda nandxóꞌ stiꞌ.
5 Ne lausaana hombre ca lu ná binidxaba para usaba ná cuerpu stiꞌ,
ti ganda ilá xhialma dxi gueeda Señor Jesús.
6 Cadi uchá tu enda naróꞌ stitu pur ni cayuni tu ca.
Maca nanna tu pa uchee tu caadxi la?
zacá ni irá tu.
Casi na dichu que:
“Caadxi si levadura riuꞌcha biaꞌ tiica cuba pan.”
7 Nga runi lausaana de uchá tu enda naróꞌ stitu,
casi ñaca cabee tu levadura yooxho lade tu,
ti guiaana tu nayá.
Ne maca nayá ladxidóꞌ to nezalú Dios purti guti Cristu pur xpecadu tu casi biiti ca xpinni Dios dendxu huiini ndaani guidxi Egipto para ilá xpida caꞌ.
8 Yáquexa ma bilá Cristu laanu zacá la?
usihuinni nu ni lu xpida nu,
nayá,
sin enda rusiguii,
casi ñaca ni pan sin levadura.
Zacá zahuinni ma biree levadura yooxhoꞌ,
o zanda gabi nu,
enda runi ni na ique,
ne irá ni cadi jneza.
9 Lu sti guiꞌchi ni bicaa lú tu que,
gudxe laatu cadi idxaaga tu cani napa jnadxii.
10 Peru cadi zácaxa tu cayabe laatu usaana tu de idxaaga tu irá binni ni napa jnadxii o cani puru si rucaa ique gapa bidxichi,
o cani ribaꞌnaꞌ,
o cani runi cre bidóꞌ,
purti pa ñaca zacá ni la?
ñapa tu xidé niree tu de ndaani guidxilayú riꞌ.
11 Sínuque ndi nga ni gudxe laatu:
Cadi idxaaga tu nin tobi de cani na hermanu laa ne napa jnadxii o ni puru si rucaa ique gapa bidxichi,
o ni runi cre bidóꞌ o ni riguu dí o ni rixudxi o ni ribaꞌnaꞌ.
Ni runi zacá la?
nin cadi lica go né tu laa gueta.
12-13 Purti cadi xcuenta diaꞌ udxiiba donda ique cani qué runi cre Cristu.
Nga xcuenta Dios guni.
Peru pa cuchee tobi de laanu la?
napa nu xidé gabi nu laa paraa cuchee.
Nga runi lacuee ni cuchee ca lade tu,
casi cá lu Xquiꞌchi Dios guni nu.