Enda xheelaꞌ
7
Yanna ma chi tidxe laatu ni unaba diidxa tu naa lu guiꞌchi ni biseenda tu lua que.
Galán ñuni hombre pa qué nichaganáꞌ.
2 Peru para cadi gapa binni jnadxii la?
jma galán cada hombre gapa xheelaꞌ,
ne zaqueca cada gunaa gapa xheelaꞌ.
3 Cada hombre naquiiñe ibani né xheela modo ma nexhe ibani binni ni ma bichaganáꞌ,
ne zaqueca guni gunaa ne xheelaꞌ.
4 Ora ma bichaganá ti gunaa la?
ma cadi laa runi mandar cuerpu stiꞌ,
sínuque xheelaꞌ.
Zaqueca ora ma bichaganá hombre,
ma cadi laa runi mandar cuerpu stiꞌ,
sínuque xheelaꞌ.
5 Cadi na tu qué gasi né tu xheela tu.
Peru pa iropa tu racalaꞌdxi tu usaana tu ni caadxi para ganda ucaa ique tu iníꞌ né tu Dios la?
zaa laguni ni.
Peru ibigueta guni tu casi zeeda tu,
purti nagana guni mandar tu cuerpu stitu xadxí,
paxa ora gueda uquiinde binidxaba laatu.
6 Cayabe irá ndi laatu,
cadi purti napa tu xidé guni tu ni,
sínuque purti gasti naca ti guni tu ni.
7 Ñacaladxe irá hombre ñaca casi naa,
peru nanna adxé ni gudixhe Dios para cada tobi,
ne cada tobi adxé adxé gracia bidii be laa.
8 Yanna,
chi inié nia cani caꞌru ichaganá ne ca viuda.
Galán pa guiaana ca sin ichaganá ca casi biaanaꞌ.
9 Peru pa qué ganda guiaana ca stubi ca la?
zaa ichaganá caꞌ,
purti jma galán ichaganá cabe pa qué ganda guni huantar cabe stubi cabe.
10 Peru cani ma bichaganá la?
chi tidxe laaca cadi ni na iqueꞌ,
sínuque ni na Señor,
cadi usaana gunaa xheelaꞌ.
11 Ne pa chuꞌ ti gunaa usaana xheela la?
napa xidé guiaana stubi,
o pacaa la?
ibigueta né xheelaꞌ.
Ne zaqueca hombre,
cadi ilaa né xheelaꞌ.
12 Yanna ni chi tidxe ca xcaadxi la?
naa siaꞌ canié ni,
ne cadi ni gudxi Señor naa.
Pa nuu tuuxa hermanu napa xheela ni qué runi cre Cristu la?
cadi ilaa né xheela pa na xheela cueza né laa.
13 Ne zaqueca pa nuu hermana napa xheela ni qué runi cre Cristu,
ne na xheela cueza né laa la?
laca cadi usaana xheelaꞌ.
14 Purti pa qué runi cre ti hombre peru runi cre xheela la?
ziuu ndaaya pur xheelaꞌ.
Ne zaqueca gunaa ni qué runi cre,
laca ziuu ndaaya pur xheelaꞌ.
Pa qué ñaca ni zacá la?
ca xiiñi tu ñaca casi xiiñi cani qué runi cre,
peru pur tobi de laatu ni ma runi cre la?
ziuu cabe ndaayaꞌ.
15 Peru pa ma qué na ni qué runi cre cueza né xheela ni runi cre la?
cadi uyubi modo ucueeza laabe,
purti cadi guridxi Señor laanu para tinde nu.
16 Purti zándaca ulá lu xheela lu,
hermana.
Zacaca lii,
hermanu,
zándaca ulá lu xheela luꞌ.
17 Ni naca tu dxi uníꞌ né Dios laatu la?
nga ca aca tu yanna,
purti nga ni gudixhe Señor para cada tobi de laatu.
Nga ca nga rabe irá cani runi cre Cristu.
18 Pa uníꞌ né Dios tobi ni ma guca circuncidar la?
zacá guiaana.
O pa uníꞌ né be tobi ni caꞌru gaca circuncidar la?
cadi guni pur gaca circuncidar.
19 Gasti naca pa guca circuncidar cabe o pa coꞌ,
sínuque ni naquiiñe nga uzuuba cabe stiidxa Dios.
20 Cada tobi guiaana né ni naca dxi uníꞌ né Señor laa.
21 Pa nacu esclavu dxi uníꞌ né Señor lii la?
qué chi izaalaꞌdxuꞌ.
Peru laca pa ruluíꞌ zanda ireeu de laani la?
biyubi modo guꞌnu ni.
22 Purti ni naca esclavu dxi uníꞌ né Señor laa la?
neca naca ru esclavu peru ma bindaa Señor laa.
Ne cani cadi naca esclavu dxi uníꞌ né be laa la?
ma naca esclavu stibe.
23 Ma uzíꞌ Dios laatu,
ne naroꞌba gudixe be saca tu.
Nga runi cadi udii tu lugar icá tu yaga lu ná binni guidxilayú.
24 Hermanu caꞌ,
modo naca tu dxi uníꞌ né Dios laatu la?
zacá laibani nezalú Dios yanna.
25 Qué ñabi di Señor naa xi gabe cani caꞌru ichaganáꞌ,
peru racaladxe gulidxe laacaꞌ,
ne cadi idxibi tu icaa tu ni.
Jneza ni purti cayacané Dios naa gune ni.
26 Naa rabe jma galán guiaana tu casi nuu tu ca,
purti nagana xpida nu ca dxi riꞌ.
27 Pa ma napu xheelu la?
cadi guꞌnu pur ixale lu de laabe.
Peru pa caꞌru ichaganá lu la?
cadi uyubu ichaganouꞌ.
28 Peru pa ichaganá ti hombre la?
cadi cuchee,
ne pa ichaganá ti binni dxaapa laca cadi cuchee.
Peru xi si la?
zaca ni nagana para cani ichaganáꞌ,
ne ñacaladxe nulaꞌya laatu de irá nga.
29 Hermanu caꞌ,
ndi nga ni cayabe laatu.
Ma huaxiéꞌ dxi riaadxa laanu.
Nga runi cadi izaalaꞌdxi tu ni nuu ndaani guidxilayú riꞌ.
Cani ma napa xheela la?
guni xhiiña Dios biaꞌ runi cani qué gapa xheelaꞌ.
30 Ne cani nuu triste la?
cadi ulabi ca ni.
Cani cayeche la?
guni sica ni cadi cayecheꞌ,
ne cani rizíꞌ la?
guni sica cadi sti cazíꞌ.
31 Ne cani caquiiñe de ni nuu ndaani guidxilayú ri la?
cadi para nga si ibani caꞌ.
Purti ma cadiꞌdi guidxilayú caduꞌya nu riꞌ.
32 Ñacaladxe nibani tu sin niguu xaíque tu gastiꞌ.
Purti ti hombre ni caꞌru ichaganá zanda ucaa ique xhiiña Señor ne xi zanda guni para chuꞌlaꞌdxi Señor.
33 Peru ti hombre ni ma bichaganáꞌ jma cá ique ni nuu ndaani guidxilayú riꞌ ne xi zanda guni para chuꞌlaꞌdxi xheelaꞌ.
34 Laca zacaca nga ma adxé gunaa ni ma bichaganáꞌ ne ni caꞌru ichaganáꞌ.
Purti ni caꞌru ichaganá la?
jma cá ique xhiiña Señor ne ximodo zanda guiaana cuerpu sti ne ladxidóꞌ para Señor.
Peru gunaa ni ma bichaganáꞌ jma cá ique ni nuu ndaani guidxilayú ri ne xi zanda guni para chuꞌlaꞌdxi xheelaꞌ.
35 Cayabe ndi laatu para bien stitu,
ne cadi para cuaa doo laatu.
Racaladxe acaniá laatu guni tu ni jneza ne ni nachaꞌhuiꞌ,
ti cadi chuꞌ xiixa ucueeza laatu de ganaxhii tu Señor.
36 Pa nuu tuuxa ruuya ma cayoꞌxho xiñi dxaapa ne caꞌru ichaganáꞌ,
ne na cadi galán nga sínuque jma galán pa ichaganá be la?
zaa guni ni culuiꞌlaꞌdxiꞌ.
Cadi cuchee pa ucheela laabe.
37 Peru pa nuu stobi na jma jneza gapa xiñi dxaapa sin ichaganáꞌ,
ne gasti cucueeza laa de guni ni ruluiꞌlaꞌdxi la?
laca jneza cayuni pa zacá na ladxidóꞌ.
38 Nga runi jneza cayuni ni cucheela xiñi dxaapa.
Ne ni qué na ucheela xiñi dxaapa la?
jma rusi jneza cayuni.
39 Ora ma bichaganá ti gunaa la?
qué zanda gapa stobi laga nabani xheelaꞌ,
purti zacá na ley.
Peru ora ma guti xheela be la?
ma zanda ichaganá be tutiisi acalaꞌdxi be,
peru gaca ni ti xpinni Señor.
40 Peru para naa zuluá siaꞌ jma nayeche zabani be pa guiaana be stubi be,
ne rabe nga ni cayabi Espíritu sti Dios naa.