Tobi ni dxandí bidii de idubi ladxidóꞌ
21
Undisa lú be biiya be ra cusaba ca ricu vueltu ndaani caja ra riaba ni usigaꞌde cabe Dios.
2 Ne biiya be bisaba ti viuda pobre chupa de gaayu huiiniꞌ.
3 Para na be:
―Gabe caꞌ laatu,
jma stale bisaba viuda riꞌ que ca xcaadxi ca.
4 Purti ca xcaadxi ca bidii ca Dios ni ma biaana si sticaꞌ,
ne laabe huaxiéꞌ napa be peru bisaba be irá ni napa be para ibani né be.
Ofrenda de una Viuda
Na Jesús zaxá yuꞌdu roꞌ
5 Bizulú tuuxa cuzeete pabiáꞌ sicarú yuꞌdu roꞌ que modo zuchaahui ni ne ca guie ne irá ni huasigaꞌde cabe Dios.
6 Para rabi be laacaꞌ:
―Irá ni cayuuya tu nagasi ri la?
ziuu dxi initilú cani,
dede qué ziaana ti guie luguiá sti guie.
Xi gaca ante iluxe guidxilayú
7 Para na caꞌ:
―Maistru,
padxí gaca irá ndi yaꞌ ne ximodo ganna du ora ma chi aca ni.
8 Oraque rabi be laacaꞌ:
―Laguuya gá qué chi chite cabe laatu,
purti zeeda stale ni usiguii,
zaná ca laaca nga Cristu,
ne ma bidxiña hora.
Peru cadi chi nanda di tu laacaꞌ.
9 Ne ora ganna tu cayaca guerra ne cadinde cabe rarí raricaꞌ,
cadi idxibi tu,
purti naquiiñe sa niru irá nga,
peru caꞌru idxiña dxi iluxe ni.
10 Ne laca rabi be laacaꞌ:
―Ziasa ti guidxi ucaa lú sti guidxi.
Zaqueca ziasa ti gobiernu ucaa lú sti gobiernu.
11 Zaca stale xu roꞌ,
ne stale guidxi zaca gubiña ne enda huará.
Zaree xiixa ibáꞌ ne zadxibi binni ora guꞌya ni,
ne laca zahuinni seña roꞌ ibáꞌ.
12 Peru para gaca irá nga la?
nirudóꞌ zanaaze cabe laatu ne zazabi nanda cabe laatu ne zinduu cabe xqueja tu ra yuꞌdu ne ra nuu rey ne gobernador,
ne zuseguyoo cabe laatu.
Irá nga zuni cabe laatu purti xpinne laatu.
13 Peru nga zacané para güí tu stiidxa nezalú cabe.
14 Cadi cuꞌ xaíque tu naquiiñe quixhe chaahui tu xi iníꞌ tu para usihuinni tu cadi cuchee tu.
15 Purti naa zudiee diidxa laatu ne enda biaani para useegu tu ruaa tutiica ucaa lú laatu.
16 Ne dede bixhoze tu ne jñaa tu zuluíꞌ laatu.
Ne zaqueca zuni ca biꞌchi tu ne ca lisaa tu ne ca xhamigu tu,
ne zuuti ca caadxi de laatu.
17 Ne irá binni zaca nanalaꞌdxi laatu purti xpinne laatu.
18 Peru nin ti guicha ique tu qué zanitilú.
19 Pa qué ixhacalaꞌdxi tu la?
zalá tu.
20 Ne ora guꞌya tu ma naguu soldadu leꞌ Jerusalén la?
lagana ma bidxiña dxi initilú ni ngue.
21 Oraque cani nuu Judea uxooñe lu ca dani,
ne cani nuu ndaani guidxi cadi iree.
Cani nuu rañaa la?
cadi ibigueta ndaani guidxi.
22 Purti ca dxi que nga quixe cabe irá ni biꞌni cabe para gaca ni casi cá lu Xquiꞌchi Dios.
23 Naná zaca para ca gunaa ni naca xiiñi ne cani cugadxi ca dxi que purti nabé nagana zaca ni para irá binni guidxi que ne naná ziaba ná caꞌ.
24 Zati caadxi lu guerra ne xcaadxi ziné cabe laa adxé adxé guidxi.
Zutu ñee cani cadi judíu guidxi Jerusalén biaꞌ dxi udii Dios lugar laacaꞌ.
Modo ibigueta Hombre Biseenda Dios
25 Oraque zahuinni seña ibáꞌ,
adxé zahuinni gubidxa ne beeu ne ca luceru.
Ne irá binni guidxilayú zadxibi dede qué zadxela xi guni ora guna diaga pabiáꞌ reciu caxidxi cadiñe ntaa nisadóꞌ.
26 Zadxibi binni dede zieeguꞌ,
purti ma nuu xizaa xi chi aca ndaani guidxilayú.
Zaniibi dxacha irá ni cá ibáꞌ.
27 Oraque zuuya cabe Hombre Biseenda Dios,
zeeda lade za de riaꞌqui biaani ne stale enda nandxóꞌ.
28 Ora guꞌya tu uzulú gaca irá nga la?
lauzuhuaa chaahuiꞌ,
laindisa ique purti ma cadxiña dxi ilá tu.
29 Ne laca udixhe be ti ejemplu para laacaꞌ,
rabi be laacaꞌ:
―Laguuya ca yaga duꞌga ne ca xcaadxi yaga.
30 Ora ma cabee ni biitu la?
ma nanna tu ma zeeda tiempu enda nandáꞌ.
31 Zacaca nga ora guꞌya tu gaca irá nga,
ma nanna tu ma bidxiña dxi guni mandar Dios.
32 Dxandí cayabe laatu,
irá ndi zaca ante gati ca binni nuu yanna riꞌ.
33 Ziuu dxi initilú ibáꞌ ne guidxilayú,
peru stiidxa qué ziaana sin gacaꞌ.
34 Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáꞌ Dios.
Pacaa zaguidxi ladxidóꞌ to,
ne nin ganna tu mala zanaaze dxi que laatu.
35 Purti ziaba ni luguiá irá binni guidxilayú casi ti trampa.
36 Nga runi lagataná.
Cadi guiaana dxí tu de iníꞌ né tu Dios para ganda ilá tu de irá ni chi gaca ca,
ne zacá zanda uzuhuaa tu nezalú Hombre Biseenda Dios.