Guiráꞌ ni guyáꞌ cusisaca Tata Diuxi
148
¡Guisaca Diuxi!1 ¡Dede guibáꞌ lagusisaca Tata Diuxi!
¡Lagusisaca laabe dede ra jma nasoo!
2 ¡Lagusisaca laabe, laatu ca ni runi xhiiñaꞌ Diuxi guibáꞌ!
¡Guiratu ca ni runi xhiiñabe guibáꞌ, lagusisaca laabe!
3 ¡Lagusisaca laabe laatu, gubidxa ne beeu!
¡Lagusisaca laabe laatu, ca bele ni cuzaaniꞌ dxindxi guibáꞌ!
4 ¡Bisisaca laabe lii, guibáꞌ ni jma nasoo,
ne lii, nisa ni záꞌbiluꞌ guibáꞌ!
5 Lagusisaca lá Tata Diuxi,
purtiꞌ laabe ne xtiidxabe bizaꞌbe guirani;
6 guiráꞌ ni gudíxhebe qué zanitilú,
ne ca diidxaꞌ biaꞌ ni bisaanabe guirutiꞌ zaguiche.
7 ¡Lagusisaca Tata Diuxi guidxilayú,
maniꞌ duxhuꞌ ni nuu ndaaniꞌ nisadóꞌ, ne lii nisadóꞌ!
8 ¡Laatu gui ni riaba guibáꞌ, guie gui ne gupa!
¡Bi yooxhoꞌ ni runi ni nabe!
9 ¡Ca dani ne ca guiꞌxhiꞌ!
¡Guiráꞌ xixé ca yaga cedru ne ca yaga cuananaxhi!
10 ¡Ca maniꞌ nadóꞌ ne ca maniꞌ guiꞌxhiꞌ!
¡Ca maniꞌ ripapa ne ca maniꞌ rizá ndaaniꞌ!
11 ¡Ca xaique xtiꞌ guidxilayú ne guiráꞌ ca guidxi!
¡Ca xaique ne ca ni raca ni ná ndaaniꞌ guidxilayú!
12 ¡Nguiiu ne gunaa, binnihuayala ne binnigola!
13 ¡Guiráꞌ xixetu lagusisaca lá Tata Diuxi,
purtiꞌ lásibe nga nandxóꞌ!
¡Guendarisaca xtibe dídini lú guibáꞌ ne guidxilayú!
14 ¡Laabe bidiibe stipa xquídxibe!
¡Guiráꞌ xixé xpínnibe lagusisaca laabe,
ca israelita, xquídxibe ni nuu cueꞌbe!
¡Guisaca Diuxi!