Cadi ngueca diꞌ bíꞌnibe ne guiráꞌ guidxi
147
¡Guisaca Diuxi!¡Pabiáꞌ sicarú nga guidúꞌndanu saa guna Diuxi xtinu!
¡Laabe nga riquiiñeꞌ guidúꞌndanenu saa naxhi!
2 Tata Diuxi biꞌniꞌ chaahuiꞌ Jerusalén xti bieque,
ne rutópabe ca xpinni Israel, ca ni reeche ndase.
3 Laabe rusiándabe ca ni naná ladxidóꞌ,
ne ruchendabe lari ra biruugucaꞌ.
4 Laabe nga riniꞌbe panda beleguí nga guicá,
ne tobi tobi cani riguixhebe lácani.
5 Nandxóꞌ nga Diuxi xtinu, ne nandxóꞌ nga stipa xtibe;
ne guendabiaaniꞌ xtibe qué gapa xibiáꞌ.
6 Tata Diuxi rindísabe ca ni nadóꞌ,
ne riguiñeyube ca ni nadxabaꞌ.
7 Laguundaꞌ guna Tata Diuxi, ne stale xquixe;
laguundaꞌ saa xtiꞌ Diuxi xtinu, ra caxidxi arpa.
8 Laabe rutaagube guibáꞌ ne ca za,
rusábabe nisaguié guidxilayú,
rúnibe nagáꞌ ca guixi nuu ndaaniꞌ guiꞌxhiꞌ,
9 ruyaanabe ca maniꞌ,
ne ruyaanabe ca xiiñiꞌ ca biaꞌquiꞌ ora cabidxiaacaꞌ.
10 Cadi xtipa maniꞌ ninca bidxi náꞌ binni nga
ni jma rusiecheꞌ Tata Diuxi;
11 ni rusiecheꞌ laabe nga ca ni rusisaca laabe,
ca ni ricá lú xquendaranaxhiibe.
12 Jerusalén, bisisaca Tata Diuxi;
Sión, bisisaca Diuxi xtiuꞌ.
13 Purtiꞌ laabe biquídxibe ni rundiibi ca ndagayoo xtiuꞌ,
ne guluube ndaayaꞌ ca xiiñiluꞌ ndaaniꞌ guidxi.
14 Laabe ribaꞌquiꞌ dxibe xquídxiluꞌ,
ne ruyaanabe lii ne xubaꞌ ni jma nazaaca.
15 Laabe ruseendabe xtiidxabe guidxilayú,
ne xtiidxabe rireeche nagueenda.
16 Laabe ruzaꞌbe guie guia casi ñácani guichaladi dendxuꞌ,
ne rucheechebe yaya xtini casi ñácani yu dé.
17 Laabe rusábabe guie gui casi ñácani biní xubaꞌ;
ne nanda ni ruseendabe, rusichongani nisa.
18 Peru ne xtiidxabe, rusiabe ni;
rúnibe gundubi bi, ne rusixooñebe nisa.
19 Laabe biluiꞌbe ca xtiidxabe Jacob, Israel,
ca xtiidxabe, ca diidxaꞌ biaꞌ xtibe.
20 Cadi ngueca diꞌ bíꞌnibe ne xcaadxi guidxi roꞌ ca,
laacani qué ñunibiáꞌdicani xtiidxabe.
¡Guisaca Diuxi!