Guendarusisaca ca dxiiñaꞌ xtiꞌ Diuxi
146
¡Guisaca Diuxi!Zusisacaꞌ Tata Diuxi ne guidubi ladxiduáꞌ.
2 Laga nabaneꞌ zusisacaꞌ Tata Diuxi;
zuundaꞌ saa xtiꞌ Diuxi ni bizáꞌ naa laga nuaaꞌ guidxilayú.
3 Cadi cuézatu gulá binni risaca laatu,
binni si nga laacabe qué zanda diꞌ gulácabe,
4 purtiꞌ dxi gáticabe ribiguetaꞌ rácacabe yu,
ne dxi caca riluxe dxiiñaꞌ xtícabe.
5 Aque nayecheꞌ nga binni racané Diuxi xtiꞌ Jacob laa,
binni ni ricá lú Tata Diuxi, Diuxi ni bizáꞌ laa.
6 Laabe bizaꞌbe guibáꞌ, guidxilayú, nisadóꞌ,
ne guiráꞌ ni nuu ndaanicaꞌ.
Laabe qué rache diꞌ xtiidxabe.
7 Laabe rúnibe jneza ne ca ni caxii,
ne ruyaanabe ca ni candaana.
Tata Diuxi rundaa ca ni daguyoo;
8 Tata Diuxi rusiaanibe lú ni qué ruuyaꞌ;
Tata Diuxi rindisaꞌ ca ni maꞌ biaba;
Tata Diuxi nadxii ca ni nachaꞌhuiꞌ;
9 Tata Diuxi rapa ca binni de sti guidxi,
ne racané ca bizabi ne ca gunaa ni maꞌ guti xheelaꞌ,
ne ca ni nadxabaꞌ la? runítibe xnezacaꞌ.
10 Ay Sión, Tata Diuxi nga zaca xaique dxi ne gueelaꞌ;
Diuxi xtiuꞌ qué ziuu dxi gusaana de gacaꞌ xaique.
¡Guisaca Diuxi!