Guiráꞌ binni gusisaca Tata Diuxi
Cusisaca David Diuxi.
145
Zuzeeteꞌ guendanandxóꞌ xtiuꞌ, Diuxi ne Xaique xtinneꞌ;zaguaaꞌ ndaayaꞌ láluꞌ dxi ne gueelaꞌ.
2 Guiráꞌ dxi zaguaaꞌ ndaayaꞌ lii;
ne qué zianadxiéꞌ de gusisacaꞌ lii.
3 Nandxóꞌ nga Tata Diuxi ne naquiiñeꞌ guidunaxhii;
guendanandxóꞌ xtibe didi ni lú xquendabiaaninu.
4 Binni ne ca xiiñiꞌ zusisácacaꞌ guiráꞌ ca dxiiñaꞌ xtiuꞌ,
ne ziete guiráꞌ guendanandxóꞌ ni huayúniluꞌ.
5 Zuzeetecabe guiráꞌ guendanachaꞌhuiꞌ risaca xtiuꞌ,
naa zuzeeteꞌ guiráꞌ guendaridxagayaa huayúniluꞌ.
6 Zuzeetecabe guiráꞌ dxiiñaꞌ nadipaꞌ ne nadxiibi huayúniluꞌ,
ne naa zuzeeteꞌ guendanandxóꞌ xtiuꞌ.
7 Zuzeetecabe guendanachaꞌhuiꞌ xtiuꞌ qué gapa xibiáꞌ,
ne ridxi yaya zaníꞌcabe lii nga ruꞌnuꞌ jneza.
8 Tata Diuxi nadóꞌ ne riálaꞌdxiꞌ,
qué gannabe xii nga xiana, laabe nga guendaranaxhii.
9 Tata Diuxi nachaꞌhuiꞌ ne guiráꞌ xixé,
ne guendanadóꞌ rápabe ca dxiiñaꞌ xtibe.
10 ¡Guiráꞌ ni bizouꞌ, Tata Diuxi, gusisácacani lii!
¡Ne guiráꞌ ca xpinnuꞌ, cuꞌcaꞌ ndaayaꞌ lii!
11 ¡Guzeetecabe guiráꞌ guendanandxóꞌ xtiuꞌ!
¡Guzeetecabe guiráꞌ ca dxiiñaꞌ nadipaꞌ huayúniluꞌ!
12 ¡Guireeche lade binni pabiáꞌ nga nadípaluꞌ
tí gánnacabe pabiáꞌ nga nandxóꞌ xquídxiluꞌ!
13 Guidxi xtiuꞌ qué zará,
ne guendaraca ni nouꞌ qué ziuu dxi guiaana dxí.
14 Tata Diuxi racané ca ni riaba,
ne rindísabe ca ni cayati cabani.
15 Stale tu cá lú lii
cabézacabe gudiiu ni gócabe, cadi tidiꞌ xhióracabe.
16 Ruxheleꞌ nouꞌ, ne guidubi ladxidoꞌloꞌ
ruyaanuꞌ guiráꞌ ca ni nabani.
17 Tata Diuxi runi jneza ndaaniꞌ ca neza xtiꞌ,
ne nachaꞌhuiꞌ ca dxiiñaꞌ ni runi.
18 Tata Diuxi nuu gaxha de ca ni rucaaruaa laabe,
ca ni ribidxi laabe ne guidubi ladxidóꞌ.
19 Laabe rúnibe ni ná ca ni rusisaca laabe;
ora guinábacaꞌ laabe xiixa, rucaadiagabe laacaꞌ ne laaca rulabe laacaꞌ.
20 Tata Diuxi rápabe ca ni nadxii laabe,
ne ca ni qué guiquiiñe la? runitilube laacaꞌ.
21 ¡Ruaaꞌ diꞌ gusisácani Tata Diuxi!
¡Ne guiráꞌ tu cuꞌ ndaayaꞌ lá nandxoꞌbe,
dxi ne gueelaꞌ!