Xquixe ni rudii ti xaique Diuxi
Ni bicaa David.
144
¡Nandaayaꞌ gacaꞌ Tata Diuxi, ni rulá naa!Laabe rusiidibe ne riguixhenabe naa
para guidxelasaaꞌ lade gui;
2 laabe nga xhamiguáꞌ ni qué rucheené naa, ti yoo ra rilaꞌyaꞌ,
ti layú ra jma nagaꞌchiꞌ rucacheluáꞌ, ni rulá naa;
laabe nga ruchiibe naa, ne laabe rápabe naa;
laabe nga riguixhebe ca guidxi ca xañeeꞌ.
3 Tata Diuxi,
tu naca binni, para guicá íqueluꞌ laa.
Tu naca miatiꞌ, para gusisaca xhaataluꞌ laa.
4 Binni zedagaca casi ti guendaricaalaꞌdxiꞌ;
xquendanabani ridiꞌdiꞌ casi ti bandáꞌ.
5 Tata Diuxi,
bixhaleꞌ ndaga guibáꞌ, ne biete;
gudaꞌnaꞌ ca dani ca ti guchacaꞌ guꞌxhuꞌ;
6 bilaa ca bazandíꞌ, ca beleguí xtiuꞌ,
ne bicheeche ndase ca ni nanalaꞌdxiꞌ lii.
7 Dede ra dxiꞌbuꞌ ca bisigaa nouꞌ,
ne bilá naa lu nisadóꞌ roꞌ diꞌ,
bilá naa lu náꞌ ca dxuꞌ diꞌ,
8 ca ni rusiguii
ne rindisanáꞌ ndigacaꞌ ne rucaaruaa huaticaꞌ lii.
9 Tata Diuxi,
chiguundaꞌ ti diidxaꞌ cubi gucaadiagaluꞌ;
chiguundaꞌ ti ndaayaꞌ ne salteriu guicouꞌ.
10-11 Lii, ni racaneuꞌ ca xaique ca guiree nducaꞌ;
lii, ni bilaluꞌ David ni runi xhiiñaluꞌ,
bilá naa ruaa guiibaꞌ duxhuꞌ diꞌ;
bilá naa lu náꞌ ca dxuꞌ diꞌ,
ca ni rusiguii
ne rindisanáꞌ ndigacaꞌ ne rucaaruaa huaticaꞌ lii.
12 Ca xiiñidu caniisicaꞌ casi yagahuiiniꞌ ndaaniꞌ leꞌ;
ca xiiñidxaapadu nácacaꞌ casi yagañee ni bizáꞌ dxiiñacabe
ca ni nuaꞌ ca yagaruaa xtiꞌ yuꞌduꞌ.
13 Dxaꞌ tipa troja xtidu,
de guiráꞌ lú guendaró nuu ndaaniꞌ ni.
Cadale ca xhiúzedu gayuaa de gayuaa,
ne zaqueca gayuaa de gayuaa cadalecaꞌ lu layú xtidu.
14 Ca yuze nagola xtidu racaxhiiñicaꞌ,
qué rixana seecame.
Qué raca diꞌ ridxi yaya ndaaniꞌ neza xtidu.
15 ¡Aque nayecheꞌ nga guidxi ni napa guiráꞌ ndiꞌ!
¡Aque nayecheꞌ nga guidxi ni napa Tata Diuxi casi Diuxi xtiꞌ!