Lii nga ricá luáꞌ
Guendaruundaꞌ diidxaguieꞌ bicaa David.
143
Tata Diuxi, bicaadiaga ndaayaꞌ xtinneꞌ;bizaalaꞌdxiꞌ ca diidxaruunaꞌ xtinneꞌ.
¡Bicabi naa, purtiꞌ lii ruꞌnuꞌ jneza ne qué rucheeluꞌ!
2 Cadi guxhubadondaluꞌ naa,
purtiꞌ neza luluꞌ guirutiꞌ nayá ladxidóꞌ.
3 Ca ni nanalaꞌdxiꞌ naa rizabinandacaꞌ naa,
ruxhaatacaꞌ naa layú;
cucaacaꞌ naa cuezaꞌ lu guelacahui,
casi nabeza ca gueꞌtuꞌ ni maꞌ xadxi guti.
4 Nabé nayati nuaaꞌ;
nisi capapa ladxiduáꞌ.
5 Ruxuíꞌ luáꞌ guiráꞌ ni gucaꞌ dxi que,
ne riníꞌ iqueꞌ guiráꞌ ni huayúniluꞌ.
6 Rundapenayáꞌ neza ra nuuluꞌ,
caquiiñeꞌ lii, casi rinabaꞌ yu bidxi nisa.
7 Tata Diuxi, ¡bicabi naa guiuba,
maꞌ cará bi xtinneꞌ!
Cadi gaꞌbuꞌ naa qué zacaneuꞌ naa,
pacaa zacaꞌ casi ca gueꞌtuꞌ.
8 Siadóꞌ guieꞌ biluíꞌ naa guendaranaxhii xtiuꞌ,
purtiꞌ lii ca luáꞌ.
Biluíꞌ naa xi neza sayaꞌ,
purtiꞌ lii nga ruyubi ladxiduáꞌ.
9 Bilá naa, Tata Diuxi, lu náꞌ ca ni nanalaꞌdxiꞌ naa,
purtiꞌ naa ruyubeꞌ lii gulaluꞌ naa.
10 Bisiidiꞌ naa guneꞌ ni naluꞌ,
purtiꞌ lii nga Diuxi ni bizáꞌ naa.
¡Xhieꞌdoꞌ ni nayá xtiuꞌ chiné naa
lu ti neza ni huandíꞌ!
11 Runi láluꞌ, Tata Diuxi, ¡bisibani naa!
Tí lii ruꞌnuꞌ jneza, ¡gulee naa lu xizaa!
12 Runi qué rucheeluꞌ, ¡binidé ca ni nanalaꞌdxiꞌ naa!
¡bixuuxe guiráꞌ xixécabe, purtiꞌ naa nga xpinnuꞌ!