Lii nga rápaluꞌ naa
Ni gudixhe David gacaꞌ ne diidxaꞌ ndaayaꞌ bizeeteꞌ, dxi guyuu ndaaniꞌ cueva.
142
Ne ti ridxi guiibaꞌ ribidxeꞌ Tata Diuxi,ne ti ridxi guiibaꞌ rinabaꞌ laabe guialáꞌdxibe naa.
2 Neza lube nga riguixheꞌ ni cazaacaꞌ,
neza lube nga ruchiayaꞌ guiráꞌ xizaa xtinneꞌ
3 zacá runeꞌ ora nuaaꞌ naguunduꞌ.
Tata Diuxi, lii nannuꞌ paraa canazayaꞌ:
lu neza ziaaꞌ diꞌ,
guláꞌquicabe naa ti xaléꞌ.
4 Ruuyadxiéꞌ neza ndigaꞌ
ne guirutiꞌ tu gueeda gacané naa.
¡Nin tu gulá naa!
¡Nin tu ganna pa nuaaꞌ!
5 Lii nga rucaa ridxi, Tata Diuxi,
ne rabeꞌ lii:
«Lii nga gulaluꞌ naa;
purtiꞌ lii nga tobi lucha ni napaꞌ lu guendanabani diꞌ.»
6 Bizaalaꞌdxiꞌ ca xtidxeꞌ,
nuaaꞌ qué gapaꞌ stipa.
Bilá naa lu náꞌ ca ni ladxi naa,
purtiꞌ jma nadípacabe que naa.
7 Guleeꞌ naa ra deguayuaa diꞌ
tí ganda gusisacaꞌ lii.
Guiráꞌ binni nachaꞌhuiꞌ zabí sisi naa
dxi lii gacaneluꞌ naa.