Diuxi nanna guirani
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
139
Tata Diuxi, lii huaguu biaꞌluꞌ naa, ne nannuꞌ tu naa;
2 lii nannuꞌ guiráꞌ ni runeꞌ;
dede zitu lii nannuꞌ xi cá iqueꞌ.
3 Nannuꞌ guiráꞌ ra rizayaꞌ,
¡nannuꞌ xi guiráꞌ runeꞌ!
4 Caꞌruꞌ lica guiree diidxaꞌ ndaaniꞌ ruaaꞌ,
ne lii, Tata Diuxi, mápeca nannuꞌ ni.
5 Lii nutaaguluꞌ naa;
naguixhenaluꞌ luguiaꞌyaꞌ.
6 Guendabiaaniꞌ ca nabé nandxóꞌ, paraa naa ne laani yaꞌ;
¡nayaꞌniꞌ xhaatani ngue runi qué rieneꞌ ni!
7 Paraa ndiꞌ ñaaꞌ, ñuaaꞌ zitu de xieedóꞌ xtiuꞌ,
paraa ndiꞌ nuxhooñeluáꞌ, niduubaꞌ zitu de lii.
8 Pa naa niguibaꞌ luguiáꞌ guibáꞌ,
raqué nuuluꞌ;
ne pa naa ñeteꞌ ra jma gueteꞌ guidxilayú,
laacaca nuuluꞌ raqué;
9 pa naa nipapaꞌ ñaa neza ra rindani gubidxa,
pacaa ñaa nindezaꞌ ra riluxe nisadóꞌ ni nuu neza ra riaaziꞌ gubidxa,
10 neca raqué nugaanda naluꞌ naa;
¡náꞌ ndígaluꞌ qué nundaa naa!
11 Pa nicá iqueꞌ nucacheluáꞌ lu guelacahui,
o biaaniꞌ ni nutaaguꞌ naa ñaca guelacahui,
12 guelacahui que, qué ñanda diꞌ nucaachiꞌ naa neza luluꞌ,
ne gueelaꞌ nuzaaniꞌ dxindxi casi ridxíꞌ.
¡Guelacahui ne biaaniꞌ tobi si cani neza luluꞌ!
13 Lii nga bizaꞌluꞌ guidubi nacaꞌ;
lii bizaꞌluꞌ naa ndaaniꞌ jñaaꞌ.
14 Rusisacaꞌ lii purtiꞌ ridxagayaa,
cadxagayaa guiráꞌ ni huayuꞌnuꞌ.
¡Nannadxiꞌcheꞌ piaꞌ zacá ni!
15 Qué ñaca nagaꞌchiꞌ para lii ra caniisi ladeꞌ,
laga cuzáꞌcabe naa ra jma nagaꞌchiꞌ,
laga cuzáꞌcabe naa de ra jma nariꞌniꞌ guidxilayú.
16 Bizaluluꞌ biiyaꞌ ra cuzáꞌcabe naa;
guiráꞌ nga cá lu xquíꞌchiluꞌ.
Ca dxi xquendanabaneꞌ,
lii mápeca bigabuꞌ ca dxi xtiꞌ xquendanabaneꞌ
neca caꞌruꞌ lica guidxiña ni tobi cani.
17 Ay Diuxi,
aque gueꞌlaꞌ nga ca xquendabiaaniluꞌ;
¡qué ziuu diꞌ dxi guirá cani!
18 Pa ñacaladxeꞌ nugabaꞌ cani la? jma stale cani que yuxi;
ne pa niluxe nugabaꞌ cani la? nuaaꞌ ruaꞌ ne lii.
19 Ay Diuxi,
guxha guendanabani xtiꞌ ca ni qué guiquiiñe,
ne bixheleꞌ naa neza lú ca ni ruuti binni,
20 ca ni riníꞌ lii
ne ca ni riasa huati luguialuꞌ.
21 Tata Diuxi,
ñee cadi nanaladxeꞌ ca ni nanalaꞌdxiꞌ lii la?
Ne qué racaladxeꞌ ca ni rucaalú lii la?
22 ¡Nanaladxeꞌ piaꞌ laacabe ne guidubi ladxiduáꞌ!
¡Ne racaladxeꞌ guuyaꞌ laacabe!
23 Ay Diuxi,
guluu biaꞌ naa, biiyaꞌ chaahuiꞌ ladxiduáꞌ;
guluu biaꞌ naa, ne binibiáꞌ chaahuiꞌ xquendabiaaneꞌ;
24 biiyaꞌ pa ziaꞌ lu neza xtiꞌ guendanadxabaꞌ,
ne bisá naa lu ti neza ni qué zucá.