Guendarudii xquixe Tata Diuxi
Ni bicaa David.
138
Zudieeꞌ xquixe lii, Tata Diuxi, ne guidubi ladxiduáꞌ;ne zuundaꞌ saa xtiuꞌ neza lú ca bidóꞌ.
2 Zuzuxiꞌbeꞌ ne zudxieeꞌ luáꞌ neza ra zuba yuꞌduꞌ ndaayaꞌ xtiuꞌ
tí gudieeꞌ xquixe lii runi xquendaranaxhiiluꞌ ne diidxaꞌ huandíꞌ xtiuꞌ,
purtiꞌ gudíxheluꞌ láluꞌ ne diidxaꞌ xtiuꞌ
luguiáꞌ guiráꞌ ni nuu.
3 Dxi bicaaridxeꞌ lii bicábiluꞌ naa,
ne bitáleluꞌ stipa.
4 Guiráꞌ xixé xaique ni nuu ndaaniꞌ guidxilayú zusisácacaꞌ lii
ra gunadiagacaꞌ ca diidxaꞌ ni gudiiu.
5 Zusisácacabe Tata Diuxi runi guiráꞌ ni maꞌ biꞌniꞌ,
purtiꞌ nandxóꞌ nga ra nuu Tata Diuxi.
6 Neca peꞌ Tata Diuxi dxiꞌbaꞌ ra nasoo,
ruuyabe ca ni nahuiiniꞌ ladxidóꞌ,
ne dede zitu runibiaꞌbe ca ni ruchá bi yanni.
7 Ora nuaaꞌ lu ti naxoo,
lii rusibániluꞌ naa;
rucheeche naluꞌ stípaluꞌ ne rulaluꞌ naa
lu náꞌ ca ni nanalaꞌdxiꞌ naa.
8 ¡Tata Diuxi, ne guendanayecheꞌ zunduuxeꞌ dxiiñaꞌ xtiꞌ luguiaꞌyaꞌ!
Tata Diuxi, xquendaranaxhiiluꞌ qué zará;
¡cadi gusaana ndahuiluꞌ dxiiñaꞌ ni maꞌ bizululuꞌ!