Cueꞌ ca guiiguꞌ xtiꞌ Babilonia
137
Zúbadu cueꞌ ca guiiguꞌ xtiꞌ Babilonia,ridúꞌnadu ritenaláꞌdxidu Sión.
2 Lu ca yaga guesa nuu ndaaniꞌ guidxi que
rugaandaduꞌ ca arpa xtidu.
3 Raqué, ca ni gunaazeꞌ ne bicaa yaga laadu,
ca ni guxha laadu guiráꞌ xtidu,
canábacaꞌ laadu guidúꞌndadu nayecheꞌ;
¡guidúꞌndahuadu saa xtiꞌ Sión!
4 Guidúꞌndahuadu saa xtiꞌ Tata Diuxi
ndaaniꞌ xquidxi ca dxuꞌ la?
5 ¡Pa naa gusiaandaꞌ lii, Jerusalén,
guibidxi nayáꞌ neza ndigaꞌ diꞌ!
6 ¡Iguiidiꞌ ludxeꞌ ndaaniꞌ yanneꞌ
pa naa qué guietenaladxeꞌ lii,
ne pa naa, Jerusalén,
qué quixheꞌ lii luguiáꞌ guendanayecheꞌ xtinneꞌ!
7 Tata Diuxi, cadi gusiaanduꞌ ni guníꞌ ca edomita,
dxi biaba Jerusalén, nácabe:
«¡Laguni dé ni, laguxuuxe ni dede xcuni!»
8 ¡Lii Babilonia, lii zacadeluꞌ!
¡Aque nayecheꞌ nga zaca
tu guquixe lii ni biꞌnuꞌ laadu!
9 ¡Nayecheꞌ gacaꞌ ca ni guinaaze ñee ca xiiñuꞌ,
ne ugaze laacaꞌ lu guie!