Guendarusisaca xtiidxaꞌ Diuxi
Alef א
119
Aque nayecheꞌ nga rizá ca ni qué rucheene ca ni nabaniné xtiidxaꞌ Tata Diuxi.
2 Aque nayecheꞌ ribani ca ni runi ni nabe
ne guidubi ladxidoꞌcaꞌ ruyúbicaꞌ laabe,
3 ca ni qué runi ni nadxabaꞌ,
ca ni canazá lu xneza Tata Diuxi.
4 Lii guniꞌluꞌ guzuubacabe xtiidxaluꞌ
ne cadi gucheecabe.
5 ¡Tila ganda guzuhuaaꞌ dxiicheꞌ
ne guzuubaꞌ diidxaꞌ biaꞌ xtiuꞌ!
6 Ne qué zatuí diꞌ luáꞌ
ra guneꞌ guiráꞌ ni naluꞌ.
7 Zusisaca lii ne guidubi ladxiduáꞌ
dxi naa guiziideꞌ ca diidxaꞌ jneza xtiuꞌ.
8 ¡Racaladxeꞌ guneꞌ ni ná diidxaꞌ biaꞌ xtiuꞌ!
¡Qué chuꞌ dxi gusaanuꞌ naa!
Bet ב
9 Xi zanda guni ti baꞌdunguiiu para gapa ti guendanabani nayá.
¡Guzuubabe xtiidxaluꞌ xa!
10 Naa ruyubeꞌ lii ne guidubi ladxiduáꞌ;
gupa naa tí cadi guireechuáꞌ lu xtiidxaluꞌ.
11 Ndaaniꞌ ladxiduáꞌ nga napaꞌ ca xtiidxaluꞌ
tí cadi gucheeniáꞌ lii.
12 ¡Nandaayaluꞌ, Tata Diuxi!
¡Bisiidiꞌ naa ca diidxaꞌ biaꞌ xtiuꞌ!
13 Ne ruaaꞌ diꞌ zuzeeteꞌ
guiráꞌ ca diidxaꞌ guiniꞌluꞌ.
14 Ziecheꞌ lu neza xtiꞌ ca xtiidxaluꞌ,
jma que stale bidxichi.
15 Naa zaguixheiqueꞌ lu xtiidxaluꞌ,
ne zapachaahueꞌ ca neza xtiuꞌ.
16 Ziecheniáꞌ ca diidxaꞌ biaꞌ xtiuꞌ
ne qué ziuu dxi gusiaandaꞌ laacaꞌ.
Guimel ג
17 ¡Bidii guendanabani ni runi xhiiñaluꞌ diꞌ!
Ne zacá zuzuubaꞌ xtiidxaluꞌ.
18 Bixhaleꞌ luáꞌ, tí ganda guuyaꞌ
guiráꞌ guendaridxagayaa ni rusiidiluꞌ.
19 Dxuꞌ naa lu guidxilayú diꞌ;
cadi gucaachiluꞌ xtiidxaluꞌ neza luáꞌ.
20 Dxi ne gueelaꞌ caxaataꞌ ladxiduáꞌ
purtiꞌ racaladxeꞌ gunebiaꞌyaꞌ xtiidxaluꞌ.
21 Lii ridindeneuꞌ ca ni qué runilú, ca ni dxibadí
ca ni rireecueꞌ lu xtiidxaluꞌ.
22 Bixhaleꞌ naa de lu ca diidxaꞌ guidxa xtícabe ne lu guendariguiñeyú xtícabe,
purtiꞌ ruzuubaꞌ xtiidxaluꞌ.
23 Neca chuꞌ binni ni jma nandxóꞌ gacalaꞌdxiꞌ guniná naa,
naa zucaaꞌ iqueꞌ lu ca xtiidxaluꞌ.
24 Riecheniáꞌ ca xtiidxaluꞌ;
laacani rusiénecani naa.
Dálet ד
25 Maꞌ yaca gateꞌ;
¡dané naa, guendanabani casi guníuꞌ ca!
26 Maꞌ biluéꞌ lii ca xpiaꞌyaꞌ, ne bicábiluꞌ naa.
¡Bisiidiꞌ naa ca diidxaꞌ biaꞌ xtiuꞌ!
27 Dané naa guendabiaaniꞌ ti sayaꞌ lu ca xtiidxaluꞌ,
naa racaladxeꞌ gucaaꞌ iqueꞌ ca guendaridxagayaa xtiuꞌ.
28 Cayateꞌ guiiguꞌ lu ca nisa yuubaꞌ cayete luáꞌ;
¡bizuhuaa dxiichiꞌ naa, casi ná lu xtiidxaluꞌ!
29 Bixhaleꞌ naa lu neza xtiꞌ guendarusiguii,
ne gucané naa ne guendarusiidiꞌ xtiuꞌ.
30 Guliéꞌ neza ni huandíꞌ,
ne racaladxeꞌ ca xtiidxaluꞌ.
31 Tata Diuxi, tobi si naa ne ca xtiidxaluꞌ;
¡cadi gusutuiluꞌ luáꞌ!
32 Chixhe gá runeꞌ ni naluꞌ
purtiꞌ risiécheluꞌ ladxiduáꞌ.
He ה
33 Tata Diuxi, bisiidiꞌ naa neza xtiꞌ ca diidxaꞌ biaꞌ xtiuꞌ,
tí racaladxeꞌ sayanandaꞌ ni de ra guiluxe ni.
34 Dané naa guendabiaaniꞌ tí gapaꞌ xtiidxaluꞌ;
¡racaladxeꞌ guneꞌ ni nani ne guidubi ladxiduáꞌ!
35 Yené naa lu neza xtiꞌ ca xtiidxaluꞌ,
purtiꞌ luni nuu guendanayecheꞌ xtinneꞌ.
36 Biꞌniꞌ guicá lú ladxiduaꞌyaꞌ ca xtiidxaluꞌ
ne cadi guicá luni bidxichi ni zeeda lu guendanadxabaꞌ.
37 Gucané naa tí cadi sayanandaꞌ ca bidóꞌ ni cadi dxandíꞌ;
¡dané naa guendanabani ti sayaꞌ lu neza xtiluꞌ!
38 Biluíꞌ xtiidxaluꞌ ni runi xhiiñaluꞌ diꞌ
casi rudii xtiidxaluꞌ ca ni rusisaca lii.
39 Bixhaleꞌ naa de diidxaꞌ guidxa ni ridxibeꞌ,
purtiꞌ ca xtiidxaluꞌ nacháꞌhuicani.
40 Naa huanabalaꞌdxeꞌ ca xtiidxaluꞌ;
¡dané naa guendanabani, lii ruꞌnuꞌ jneza!
Vau ו
41 Biluíꞌ naa, Tata Diuxi, guendaranaxhii ne guendarulá xtiuꞌ,
casi peꞌ bidii xtiidxaluꞌ.
42 Zacá zanda guicabeꞌ ca ni rugaanda naa,
purtiꞌ naa ca luáꞌ xtiidxaluꞌ.
43 Cadi cueeuꞌ de ndaaniꞌ ruaaꞌ ca diidxaꞌ ni dxandíꞌ,
ti nabé ca luáꞌ ca xtiidxaluꞌ.
44 ¡Racaladxeꞌ guneꞌ ni na ca diidxaꞌ ni rusiidiluꞌ,
guiráꞌ dxi, dxi ne gueelaꞌ!
45 Zacá zanda zabanedxiéꞌ sin guicayaꞌ yaga,
purtiꞌ biyubeꞌ guneꞌ ni naluꞌ.
46 Zueꞌ ca xtiidxaluꞌ neza lú ca xaiqueroꞌ
ne qué zatuí luáꞌ.
47 Purtiꞌ nabé nadxieeꞌ ca xtiidxaluꞌ
ne riecheniáꞌ cani.
48 Nadxieeꞌ ne rinabalaꞌdxeꞌ ca xtiidxaluꞌ,
ne nabé ricá iqueꞌ ca diidxaꞌ biaꞌ xtiuꞌ.
Zain ז
49 Bietenalaꞌdxiꞌ diidxaꞌ ni bidii xtiidxaluꞌ ni runi xhiiñaluꞌ diꞌ:
lii biꞌnuꞌ guicayaluáꞌ ni.
50 Laani nga rizácani naa, lu xilase xtinneꞌ:
purtiꞌ ne xtiidxaluꞌ rusibániluꞌ naa.
51 Ca binnihuati dxi ne gueelaꞌ culaacaꞌ diidxaꞌ naa,
peru naa qué huaxeleꞌ de xtiidxaluꞌ.
52 Nabé redasilú naa ca diidxaꞌ ni guniꞌluꞌ chiqué,
ne lúcani, Tata Diuxi, ridxelaꞌ guendanayecheꞌ.
53 Ca binni qué guiquiiñeꞌ ni bisaana xtiidxaluꞌ
nabé ruchiichicaꞌ naa.
54 Ca diidxaꞌ biaꞌ xtiuꞌ huayácacani diidxariuundaꞌ xtinneꞌ
ndaaniꞌ guidxilayú riꞌ ra nacaꞌ ti dxuꞌ.
55 Tata Diuxi, huaxhinni ora ma nexheꞌ nabé rietenaladxeꞌ lii;
¡racaladxeꞌ guneꞌ guiráꞌ ni ná xtiidxaluꞌ!
56 Ndiꞌ nga ni naquiiñeꞌ guneꞌ:
guzuubaꞌ xtiidxaluꞌ.
Chet ח
57 Lii, Tata Diuxi, lii nga guiráꞌ ni napaꞌ;
naa maꞌ bidieeꞌ xtiidxaꞌ guneꞌ guiráꞌ ni naluꞌ.
58 Ne guidubi ladxiduáꞌ ruyubeꞌ gusiecheꞌ lii;
guca nachaꞌhuiꞌ ne naa, casi ná xtiidxaluꞌ que.
59 Guníꞌ iqueꞌ xi ná ca xpiaꞌyaꞌ,
ne bibiguetaꞌ bizuubaꞌ ca xtiidxaluꞌ.
60 Qué nindaadiaꞌ, nagueenda
bineꞌ guiráꞌ ni naluꞌ.
61 Ca ni qué guiquiiñe bitaagucaꞌ naa, gudixhecaꞌ ti xaléꞌ naa,
peru naa qué nusiaandaꞌ ca xtiidxaluꞌ.
62 Galaa gueelaꞌ riasaꞌ rudieeꞌ diuxquixe lii
runi guiráꞌ ni ruꞌnuꞌ jneza.
63 Naa ridxaagaꞌ ca ni rusisaca lii
ne ca ni ruzuubaꞌ xtiidxaluꞌ.
64 Tata Diuxi, guidxilayú dxaꞌ tipa de guendaranaxhii xtiuꞌ;
¡Bisiidiꞌ naa ca diidxaꞌ biaꞌ xtiuꞌ!
Tet ט
65 Tata Diuxi, nabé huyacaneluꞌ naa ni huayuneꞌ xhiiñaluꞌ,
casi ná lu xtiidxaluꞌ.
66 Bisiidiꞌ naa gannaꞌ guneluáꞌ ne dané naa guendabiaaniꞌ,
purtiꞌ naa ricá luáꞌ ca xtiidxaluꞌ.
67 Dxi qué huasabaꞌ iqueꞌ bicheeꞌ stale,
huaxa yanna maꞌ ruzuubaꞌ xtiidxaluꞌ.
68 Lii nacháꞌhuiluꞌ, ne ruꞌnuꞌ jneza;
¡bisiidiꞌ naa ca diidxaꞌ biaꞌ xtiuꞌ!
69 Ca binnihuati rusiguiicaꞌ rudxiibacaꞌ donda iqueꞌ,
peru naa ruzuubaꞌ xtiidxaluꞌ ne guidubi ladxiduáꞌ.
70 Laacabe nacahui xpiaanicabe,
peru naa la? riecheniáꞌ ca xtiidxaluꞌ.
71 Nabe gucané naa gusabaꞌ iqueꞌ,
purtiꞌ zacá biziideꞌ ca diidxaꞌ biaꞌ xtiuꞌ.
72 Naa jma rusisacaꞌ ca diidxaꞌ riree ruaaluꞌ,
que gayuaa de gayuaa bidxichi de oro ne de plata.
Yod י
73 Lii piouꞌ nga bizaꞌluꞌ ne bisiiduꞌ naa;
¡dané naa guendabiaaniꞌ ti guiziideꞌ ca xtiidxaluꞌ!
74 Ca ni rusisaca lii ziéchecaꞌ ra gúꞌyacaꞌ naa,
purtiꞌ ricá luáꞌ lu xtiidxaluꞌ.
75 Tata Diuxi, nannadxicheꞌ piaꞌ jneza nga ca xtiidxaluꞌ
ne jneza nga ruꞌnuꞌ ora riguuluꞌ xizaa naa.
76 ¡Guendaranaxhii xtiuꞌ guiquiiñeni para gápani naa,
casi bidii xtiidxaluꞌ naa que!
77 Bidii xquendaranaxhiiluꞌ naa, ne bisibani naa,
purtiꞌ naa riuaaꞌ nayecheꞌ ne ca xtiidxaluꞌ.
78 Guituí lú ca binnihuati
ni runiná naa neca cadi cayuneꞌ laacaꞌ gastiꞌ;
naa racaladxeꞌ guicá iqueꞌ ca xtiidxaluꞌ.
79 Ca ni rusisaca lii ca guidaagucaꞌ naa,
laacaꞌ runibiaꞌcaꞌ xtiidxaluꞌ.
80 Gacaꞌ ladxiduáꞌ nayá lu ca diidxaꞌ biaꞌ xtiuꞌ,
tí cadi chuꞌ ni gusutuí luáꞌ.
Caf כ
81 Dede ripapa ladxiduáꞌ ribezaꞌ gulaluꞌ naa;
¡ti xtiidxaluꞌ nga ca luáꞌ!
82 Dede nayati nuu ca guieluáꞌ cabezaꞌ ca diidxaꞌ guniꞌluꞌ que,
ne riniéꞌ:
«Padxí ndiꞌ gueeda guizacaluꞌ naa.»
83 Neca maꞌ nacaꞌ ti binnigola ni maꞌ qué runi gastiꞌ, ni huasiaandacabe laa,
naa qué huasiaandaꞌ ca diidxaꞌ biaꞌ xtiuꞌ.
84 Pabiáꞌ dxi tiꞌ ndiꞌ cuezaꞌ yaꞌ.
Padxí tiꞌ nga guxhuubadondaluꞌ ca ni ladxi naa diꞌ pue.
85 Ca binnihuati ca ni qué rapa ca xtiidxaluꞌ
maꞌ gudaañecaꞌ jma guiruyú para gusábacaꞌ naa.
86 ¡Gucané naa, ládxicabe naa qué guzaabeꞌ gastiꞌ!
¡Guiráꞌ ca xtiidxaluꞌ huandíꞌ cani!
87 Maꞌ yaca guiniteluáꞌ lu guidxilayú,
ne qué huasaanaꞌ guneꞌ ni ná xtiidxaluꞌ.
88 Dané naa guendanabani casi ná guendaranaxhii xtiluꞌ,
ne zacá zanda guneꞌ ca diidxaꞌ ni biree ruaaluꞌ.
Lámed ל
89 Tata Diuxi, xtiidxaluꞌ qué zará;
¡cá dxiichiꞌ ni guibáꞌ!
90 Lii qué ziuu dxi gucheeluꞌ;
lii bizuhuaa dxiichiluꞌ guidxilayú, ne zaqué biaana ni.
91 Guiráꞌ ni gudíxheluꞌ nexhe chaahuiꞌ cani,
casi ná lu xtiidxaluꞌ,
ne guirani nuuni ora tiisi guiquiiñeluꞌ cani.
92 Pa ñaca ca xtiidxaluꞌ qué nusiéchecaꞌ naa la?
maꞌ nunduuxeꞌ xilase naa.
93 Qué ziuu dxi gusiaandaꞌ ca xtiidxaluꞌ,
purtiꞌ runi laacani huadiiluꞌ naa guendanabani.
94 ¡Bilá naa, xpínniluꞌ naa,
ne nabé huazayanandaꞌ ca xtiidxaluꞌ!
95 Ca ni qué guiquiiñeꞌ cabeza sicaꞌ pora gunduuxecaꞌ naa,
huaxa naa cabeza siaꞌ ca xtiidxaluꞌ.
96 Huayuuyaꞌ guiráꞌ xixé ni nuu riluxe,
huaxa ca xtiidxaluꞌ qué riracaꞌ.
Mem מ
97 ¡Aque nadxieeꞌ xtiidxaluꞌ!
¡Nisi laani cá iqueꞌ guidubi dxi!
98 Dxi gueelaꞌ xtinneꞌ nga ca xtiidxaluꞌ;
ne laacani huadiicani naa guendabiaaniꞌ jma que ca ni nanalaꞌdxiꞌ naa.
99 Naa jma rieneꞌ que ca ni rusiidiꞌ naa
purtiꞌ nabé ricá iqueꞌ ca xtiidxaluꞌ.
100 Naa jma rieneꞌ lade ca binnigola
purtiꞌ naa ruzuubaꞌ xtiidxaluꞌ.
101 Guxhañeeꞌ lu neza dxabaꞌ
tí ganda guneꞌ ni ná xtiidxaluꞌ.
102 Qué huaxelediáꞌ lu ca xtiidxaluꞌ
purtiꞌ lii nga rusiidiluꞌ naa.
103 Ni bidii xtiidxaluꞌ jma nanaxhi ni ndaaniꞌ yanneꞌ
que dxiñayaga ndaaniꞌ ruaaꞌ.
104 Lu ca xtiidxaluꞌ nga huacaaꞌ guendabiaaniꞌ;
ngue runi nanaladxeꞌ ca ni rizá ruchee.
Nun נ
105 Ca xtiidxaluꞌ nácani ti biaaniꞌ xañeeꞌ
ne ti biaaniꞌ lu xnezaꞌ.
106 Naa bidieeꞌ xtiidxaꞌ, ne zuneꞌ ni guniéꞌ:
¡zuneꞌ ni ná ca diidxaꞌ jneza xtiuꞌ!
107 Tata Diuxi, nabé nuaaꞌ xizaa;
¡dané naa guendanabani, casi ná lu xtiidxaluꞌ!
108 Tata Diuxi, gucuaa ca diidxaꞌ guna caree ruaaꞌ diꞌ,
ne bisiidiꞌ naa ca xtiidxaluꞌ.
109 Nabé rizabinanda guendaguti naa,
huaxa qué ziuu dxi gusiaandaꞌ ca ni bisiidiluꞌ naa.
110 Ca ni qué guiquiiñe gudixhecaꞌ ti xaléꞌ naa,
peru naa qué nireechuáꞌ de ca xtiidxaluꞌ.
111 Ca xtiidxaluꞌ nácacani ti bidxichi ni biaananiáꞌ ni qué ziuu diꞌ dxi guirá,
purtiꞌ laacani risiéchecani ladxiduáꞌ.
112 Ne guidubi ladxiduáꞌ rabeꞌ zuneꞌ ni ná ca diidxaꞌ biaꞌ xtiuꞌ,
dxi ne gueelaꞌ, guiráꞌ xixé dxi.
Sámec ס
113 Nanaladxeꞌ binni napa chupa ladxidóꞌ,
peru nadxieeꞌ xtiidxaluꞌ.
114 Lii rulaluꞌ naa ne rápaluꞌ naa;
lu xtiidxaluꞌ ricayaꞌ luaꞌ.
115 ¡Laguixeleꞌ de naa, binni qué guiquiiñecaꞌ,
tí racaladxeꞌ guneꞌ ni ná xtiidxaꞌ Diuxi!
116 Dané naa stipa, casi bidii xtiidxaluꞌ naa, ti zacá zabaneꞌ;
¡cadi gucheeneuꞌ naa, ca luáꞌ lii!
117 Gucané naa, ti zacá zalaꞌyaꞌ;
ne zacá zuneꞌ ni ná ca diidxaꞌ biaꞌ xtiuꞌ.
118 Lii qué racalaꞌdxuꞌ ca ni rireechú lu diidxaꞌ biaꞌ xtiuꞌ,
purtiꞌ canapapa xquendabiaanicaꞌ.
119 Ca binni qué guiquiiñe xtiꞌ guidxilayú diꞌ nácacaꞌ guixi neza luluꞌ;
nga runi nadxieeꞌ xtiidxaluꞌ.
120 Ridxibi ladeꞌ, racaditi neza luluꞌ;
¡ne rusabaꞌ iqueꞌ neza lú ca xtiidxaluꞌ!
Ayin ע
121 Qué huayuu dxi gusaanaꞌ de guneꞌ ni jneza;
cadi gusaanuꞌ naa lu náꞌ ca ni runiná naa.
122 Biiyaꞌ naa, gupa guendanazaaca xtinneꞌ;
cadi guniná ca ni qué guiquiiñe ca naa.
123 Ca guieluáꞌ maꞌ zeguizuíꞌ cabeza gulaluꞌ naa,
cabezaꞌ gulaluꞌ naa, casi guniꞌluꞌ que.
124 Gunaxhii ni runi xhiiñaluꞌ diꞌ casi ná lu xquendaranaxhiiluꞌ;
¡bisiidiꞌ naa ca diidxaꞌ biaꞌ xtiuꞌ!
125 Naa nga runeꞌ xhiiñaluꞌ.
Dané naa guendabiaaniꞌ,
racaladxeꞌ gannaꞌ xi ná xtiidxaluꞌ.
126 Tata Diuxi, maꞌ naquiiñeꞌ guꞌnuꞌ xiixa,
purtiꞌ maꞌ cadi cuzuubacabe xtiidxaluꞌ.
127 Ngue runi naa nadxieeꞌ ca xtiidxaluꞌ
stale stale peꞌ, jma que oro chaꞌhuiꞌ.
128 Nga nga runi rizayanandaꞌ ca xtiidxaluꞌ
ne nanaladxeꞌ xpiaꞌ ni nadxabaꞌ.
Pe פ
129 Nabé nga sicarú ca xtiidxaluꞌ;
ngue runi ruzuubaꞌ cani.
130 Ca diidxaꞌ ni rusiéneluꞌ, ruzaaniꞌ cani,
ne rusiénecani binni nadóꞌ.
131 Dede ricaalaꞌdxeꞌ ruxhaleꞌ ruaaꞌ,
purtiꞌ rizaabiladxeꞌ ca xtiidxaluꞌ.
132 Biiyaꞌ naa, ne bilaselaꞌdxiꞌ naa,
casi runineuꞌ ca ni nadxii lii.
133 Bisá naa casi ná lu xtiidxaluꞌ;
cadi gusaanuꞌ gutaaguꞌ guendanadxabaꞌ naa.
134 Bilá naa lu guendanaxoo xtiꞌ binni,
naa racaladxeꞌ guneꞌ ni nouꞌ.
135 Biiyaꞌ naa ne guendanachaꞌhuiꞌ, naa runeꞌ xhiiñaluꞌ,
ne bisiidiꞌ naa ca diidxaꞌ biaꞌ xtiuꞌ.
136 Dede ruxooñeꞌ nisa luáꞌ
purtiꞌ cadi cazaaláꞌdxicabe xtiidxaluꞌ.
Tsade צ
137 Tata Diuxi, lii ruꞌnuꞌ jneza;
ne ca xtiidxaluꞌ nazaaca cani.
138 Guiráꞌ ca xtiidxaluꞌ
dxandíꞌ cani ne jneza cani.
139 Runi nadxieeꞌ xhaataꞌ xtiidxaluꞌ cayacanaꞌyaꞌ,
purtiꞌ ca ni nanalaꞌdxiꞌ naa maꞌ bisiaandaꞌ cani.
140 Ca diidxaꞌ ni guniꞌluꞌ gudiꞌdicani stale guendananá;
ngue runi, ni runi xhiiñaluꞌdiꞌ nadxiicani.
141 Nahuiiniꞌ ladxiduáꞌ, riguiñeyúcabe naa,
peru naa qué huasiaandaꞌ diaꞌ ca xtiidxaluꞌ.
142 Jneza nga ca guendarulidxe xtiluꞌ,
ne ca ni rusiidiluꞌ dxandíꞌ cani.
143 Huayabaꞌ lu guendanagana ne lu xizaa,
peru ca xtiidxaluꞌ bisiéchecani naa.
144 Ca xtiidxaluꞌ jneza cani;
¡dané naa guendariene tí ganda guibaneꞌ!
Cof ק
145 Ne guidubi ladxiduáꞌ rucaaꞌ ridxi lii, Tata Diuxi;
¡bicabi naa, racaladxeꞌ guneꞌ ni ná ca diidxaꞌ biaꞌ xtiuꞌ!
146 Lii nga rucaaꞌ ridxi, gucané naa
tí ganda guneꞌ ni ná ca xtiidxaluꞌ.
147 Caꞌruꞌ lica guirá gueelaꞌ, riasaꞌ rinabaꞌ lii gacaneuꞌ naa;
ti ca luáꞌ ca xtiidxaluꞌ.
148 Caꞌruꞌ lica guixhinni, maꞌ nuu ca guieluáꞌ cabezacaꞌ
guiníꞌ iqueꞌ lu ca xtiidxaluꞌ.
149 Tata Diuxi, bicaadiaga xtiidxaꞌ, runi xquendaranaxhiiluꞌ;
dané naa guendanabani, casi ná lu xtiidxaluꞌ.
150 Maꞌ gaxha nuu ca ni nanda naa cadxiichicaꞌ,
peru zitu zuhuaacaꞌ de ca xtiidxaluꞌ.
151 Lii, Tata Diuxi, nuuluꞌ gaxha,
ne guiráꞌ ca xtiidxaluꞌ dxandíꞌ cani.
152 Maꞌ xadxi nga runebiaꞌyaꞌ ca diidxaꞌ bisaanuꞌ,
ne qué ziuu dxi guiniti cani.
Resh ר
153 Biiyaꞌ xizaa xtinneꞌ, bilá naa,
purtiꞌ naa qué huasiaandaꞌ ca xtiidxaluꞌ.
154 Bizuhuaa lu xtiidxaꞌ ne bilá naa;
¡dané naa guendanabani, casi ná lu xtiidxaluꞌ!
155 Guendaracané xtiuꞌ, zitu zuhuaacani de ca ni nadxabaꞌ,
purtiꞌ qué rizá nándacaꞌ diidxaꞌ biaꞌ xtiuꞌ.
156 Tata Diuxi, nabé naroꞌbaꞌ guendaranaxhii xtiuꞌ;
¡dané naa guendanabani, casi ná lu diidxaꞌ jneza xtiuꞌ!
157 Stale nga tu nanalaꞌdxiꞌ naa ne tu ruxhaatanáꞌ naa,
huaxa naa qué rixaleꞌ de ca xtiidxaluꞌ.
158 Qué racaladxeꞌ diaꞌ ca ni rudxii deche,
ca ni qué ruzuubaꞌ xtiidxaluꞌ.
159 Tata Diuxi, biiyaꞌ pabiáꞌ nga nadxieeꞌ ca xtiidxaluꞌ;
¡dané naa guendanabani, runi guendaranaxhii xtiuꞌ!
160 Lu xtiidxaluꞌ nuu guiráꞌ ni dxandíꞌ;
laacani qué zará cani ne jneza cani.
Sin שׁ
161 Stale binni nadipaꞌ rizabinanda naa sin guneꞌ laaca gastiꞌ,
huaxa ladxiduáꞌ rusabaꞌ iqueꞌ neza lú ca xtiidxaluꞌ.
162 Nayecheꞌ nuaaniáꞌ ca xtiidxaluꞌ,
casi tobi ni ridxela ti bidxichi roꞌ.
163 Nanaladxeꞌ guendarusiguii, qué racaladxeꞌ diaꞌ ni;
huaxa nadxieeꞌ ca diidxaꞌ ni rusiidiluꞌ.
164 Guidubi dxi rusisacaꞌ lii
purtiꞌ jneza ca xtiidxaluꞌ.
165 Ca ni nadxii ca xtiidxaluꞌ nuu dxí ladxidoꞌcaꞌ,
ne gastiꞌ ni gusaba laacaꞌ.
166 Tata Diuxi, naa ribezaꞌ gulaluꞌ naa,
purtiꞌ huayuneꞌ ni ná xtiidxaluꞌ.
167 Naa ruzuubaꞌ xtiidxaluꞌ
ne nadxieeꞌ cani ne guidubi ladxiduáꞌ.
168 Naa ruzuubaꞌ xtiidxaluꞌ ne runeꞌ ni naluꞌ;
¡lii runibiaꞌluꞌ guiráꞌ xpiaꞌyaꞌ!
Tau ת
169 Guidxiña ca ridxi xtinneꞌ neza luluꞌ, Tata Diuxi;
¡dané naa guendariene, casi ná lu xtiidxaluꞌ!
170 Chindá ca ndaayaꞌ xtinneꞌ neza luluꞌ;
¡bilá naa, casi ná xtiidxaluꞌ!
171 Ndaaniꞌ ruaaꞌ guieleꞌ diidxaꞌ gusisacaniáꞌ lii,
purtiꞌ lii bisiidiluꞌ naa ca diidxaꞌ biaꞌ xtiuꞌ.
172 Ruaaꞌ riꞌ guundaꞌ ti saa xtiꞌ diidxaꞌ bidiiu que,
purtiꞌ guiráꞌ ca xtiidxaluꞌ jneza cani.
173 Nuuca nuuca naluꞌ gacané naa,
purtiꞌ naa guliéꞌ zaya nandaꞌ ca xtiidxaluꞌ.
174 Tata Diuxi, ¡racaladxeꞌ gulaluꞌ naa!
¡Purtiꞌ naa nuaaꞌ nayecheꞌ ne ni rusiiduꞌ!
175 Racaladxeꞌ guibaneꞌ tí gusisacaꞌ lii;
ne guiráꞌ guenda jneza xtiluꞌ gacané naa.
176 Biniteꞌ casi riniti ti dendxuꞌ; ¡gudáꞌ gudayubi naa,
purtiꞌ naa caꞌruꞌ gusiaandaꞌ ca xtiidxaluꞌ!