Stipa xtiꞌ Tata Diuxi nga ni jma nandxóꞌ
118
Lagudii xquixe Tata Diuxi, purtiꞌ laa nachaꞌhuiꞌ,ne qué zará xquendaranaxhii.
2 Guiníꞌ ca israelita:
«Guendaranaxhii xtiꞌ Tata Diuxi qué zará.»
3 Guiníꞌ ca gueꞌdxeꞌ:
«Guendaranaxhii xtiꞌ Tata Diuxi qué zará.»
4 Guiníꞌ ca ni rusisaca Tata Diuxi:
«Guendaranaxhii xtiꞌ Tata Diuxi qué zará.»
5 Lu xizaa xtinneꞌ bicaaridxeꞌ Tata Diuxi;
laabe bicaadiagabe naa ne bilabe naa.
6 Tata Diuxi nuuné naa; ngue runi qué ridxibediáꞌ.
Xii ndiꞌ zanda guni binni naa yaꞌ.
7 Tata Diuxi nuuné naa; laabe racanebe naa.
¡Zuuyaꞌ dxíꞌchepiaꞌ ra gata dxí ca ni nanalaꞌdxiꞌ naa!
8 Jma jneza nga guicayaluáꞌ Tata Diuxi
ne cadi guicayaluáꞌ binni.
9 Jma jneza nga guicayaluáꞌ Tata Diuxi
ne cadi guicayaluáꞌ ca binni risaca.
10 Stale guidxi roꞌ bitaaguꞌ naa,
peru naa gudixhedxiéꞌ laacabe ne lá Tata Diuxi.
11 Bitaagucabe naa nin qué ñanda nicayabieꞌqueꞌ,
peru naa gudixhediéꞌ laacabe ne lá Tata Diuxi.
12 Gurí zísicabe naa casi ribí zisi bizu,
xiana xtícabe biuiꞌ sica riuiꞌ bele xtiꞌ yagaguiichi;
¡peru naa gudixhediéꞌ laacabe ne lá Tata Diuxi!
13 Bilaanácabe naa ne xiana, ti ñabaꞌ,
Tata Diuxi beeda gucané naa.
14 Ne naa ruundaꞌ para Tata Diuxi, laabe rudiibe naa stipa.
¡Laabe nga ni rulá naa!
15 Ndaaniꞌ lidxi ca binni tobi si ladxidóꞌ
nuu saa nayecheꞌ ti qué huayuu dxi guniticaꞌ:
«¡Stipa xtiꞌ Tata Diuxi qué runiti!
16 ¡Stipa xtiꞌ Tata Diuxi nga ni jma nandxóꞌ!
¡Stipa xtiꞌ Tata Diuxi qué runiti!»
17 ¡Naa qué zatediáꞌ, naa zabaneꞌ
tí ganda güeꞌ guiráꞌ ni biꞌniꞌ Tata Diuxi!
18 Naná nga huasabanáꞌ Tata Diuxi naa,
peru qué nusaanadibe naa lu náꞌ guendaguti.
19 ¡Laguxhaleꞌ ca ndagayoo xtiꞌ yuꞌduꞌ,
racaladxeꞌ guiuaaꞌ gudieeꞌ xquixe Tata Diuxi!
20 Ndiꞌ nga ndagayoo xtiꞌ Tata Diuxi,
ne neza diꞌ nga guiuu ca ni qué ruchee.
21 Rudieeꞌ xquixe lii, Tata Diuxi, purtiꞌ rucábiluꞌ naa
ne purtiꞌ rulaluꞌ naa.
22 Guie ni qué ñacalaꞌdxiꞌ ca ni cucuí yoo que,
laani nga guie nuaꞌ yoo ca.
23 Ndiꞌ nga ni biꞌniꞌ Tata Diuxi,
nga nga runi cadxagayaadu.
24 Ndiꞌ nga dxi ni biꞌniꞌ Tata Diuxi dxiiñaꞌ;
¡nga nga runi dxatipa ladxidoꞌdo, nuudu nayecheꞌ!
25 Tata Diuxi, ¡bilá laꞌ laadu!
Tata Diuxi, gucané laꞌ laadu, ¡gácadu naguidxi ne nazaaca!
26 ¡Nandaayaꞌ nga ni zeeda ne lá Tata Diuxi!
Dede ndaaniꞌ yuꞌduꞌ xtiꞌ Tata Diuxi riguꞌdu ndaayaꞌ laatu.
27 Tata Diuxi nga Diuxi; ¡laabe ruzaanibe laanu!
Laguzulú saa ne lachiné bandaga yaa
dede ra nuu mexaꞌ ndaayaꞌ.
28 Naa rudieeꞌ xquixe lii ne rusisacaꞌ guendanandxóꞌ xtiuꞌ,
purtiꞌ lii nga Diuxi xtinneꞌ.
29 Lagudii xquixe Tata Diuxi, purtiꞌ laa nachaꞌhuiꞌ,
ne qué zará xquendaranaxhii.