Guendarucaa ridxi Diuxi ni nandxóꞌ
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa David.
109
Ay Diuxi,cadi guseguruaaluꞌ bicabi naa ra canieniáꞌ lii,
2 tí ca ni rusiguii ne ca ni qué guiquiiñeꞌ ca
caniꞌcaꞌ naa,
cadi huandíꞌ diꞌ guiráꞌ ni caníꞌcabe ca.
3 Dí xtícabe naguu leꞌ naa;
¡cucaalúcabe naa, naa cadi cayuneꞌ laacabe gastiꞌ!
4 Runi guendaranaxhii xtinneꞌ, rucaalúcabe naa;
huaxa naa rinieniáꞌ lii.
5 Caguíxecabe naa ne guendanadxabaꞌ guiráꞌ guendanachaꞌhuiꞌ xtinneꞌ,
ne runi guendaranaxhii xtinneꞌ, nanaláꞌdxicabe naa.
6 Gulaꞌquiꞌ tobi ni nadxabaꞌ guzuhuaa lu xtiidxabe,
ti laca laa gudxiibaꞌ donda íquebe;
7 ra caguu biáꞌcabe laabe ugaanicabe donda luguiabe;
ne ni zuguaa lu xtiidxabe, gudxiibaꞌ jma donda íquebe.
8 ¡Guibánibe huaxiéꞌ dxi,
ne gueeda stobi guicaa ca bidxichi xtibe!
9 ¡Gácacaꞌ ca xiiñibe bizabi
ne xheelabe guiaanaꞌ stubi!
10 ¡Sá renda ca xiiñibe, sacaꞌ guinábacaꞌ guna!
¡Guiládxicabe laacaꞌ ndaaniꞌ yoo yuxe xticaꞌ!
11 Gueeda ni ruquixe bidxichi
chiné guiráꞌ xtibe.
Gueeda dxuꞌ gaxha laabe guiráꞌ
ni gulee ndube lu xhiiñabe.
12 Cadi chuꞌ tu guiaꞌ laabe
zaqueca ca bizabi xtibe.
13 Guinitilú ca lisaa xtibe,
ne guixá ca lábe, tí guirutiꞌ guietenalaꞌdxiꞌ laabe.
14 Cadi gusiaandaꞌ diꞌ Tata Diuxi guendanadxabaꞌ xtiꞌ bixhózebe
ne cadi guxhá diꞌ donda xtiꞌ jñaabe;
15 gapa Tata Diuxi laacabe ndaaniꞌ ique,
ne laabe la? guixá xtiidxabe ndaaniꞌ guidxilayú riꞌ.
16 Qué ñánnabe xii nga guendariáꞌ;
guzabinandabe ca binni nazíꞌ ne ca binni nahuiiniꞌ ladxidóꞌ
dede ra bitinátibe laacaꞌ.
17 Nabé gucuá lube dí,
yanna la? ¡cuꞌ dícabe laabe!
Qué ñacaláꞌdxibe ndaayaꞌ,
yanna la? ¡guirutiꞌ cuꞌ ndaayaꞌ laabe!
18 Guiréndabe dí casi riréndabe lari;
ne guiaazini ndaanibe ne dxitaladibe
casi ñácani nisa o za;
19 ¡guiréndabe ni casi lari,
ne guixiini ndaanibe casi rixii doo!
20 ¡Zacá guquixe Tata Diuxi ni ca ni nanalaꞌdxiꞌ naa
ne ca ni riníꞌ naa!
21 Huaxa lii la? Tata Diuxi,
bisisaca láluꞌ, ne guca nachaꞌhuiꞌ ne naa.
¡Bilá naa runi guendanachaꞌhuiꞌ xtiꞌ xquendaranaxhiiluꞌ!
22 Nabé nazíꞌ nuaaꞌ, napaꞌ xizaa,
naná nuu ladxiduáꞌ.
23 Cayayaꞌ casi ti bandáꞌ,
¡sica ñacaꞌ gusúꞌ rixubiyú bi naa!
24 Xtiꞌ ni qué huayahuaꞌ nisi racaditi xibeꞌ;
ne nabé maꞌ nalaseꞌ nuaaꞌ tí qué gapaꞌ ni gahuaꞌ.
25 ¡Ruxidxi binni naa!
¡Ora gúꞌyacabe naa, runiibi íquecabe, rugaandacabe naa!
26 Tata Diuxi ni bizáꞌ naa, gucané naa;
¡bilá naa ne guendaranaxhii xtiluꞌ!
27 Tata Diuxi, gánnacabe ni,
lii nga bidii naluꞌ naa.
28 Zaa cuꞌ dícabe naa
inque si lii cuꞌ ndaayaluꞌ naa.
Zaa guituí lúcabe
laga naa, xpinnuꞌ, chuaaꞌ nayecheꞌ.
29 ¡Ca ni nanalaꞌdxiꞌ naa, guituí lucaꞌ!
¡Guiréndacabe xtuí ca casi ti lari!
30 Qué zianadxiéꞌ diaꞌ de gudieeꞌ xquixe Tata Diuxi;
¡ne zusisacaꞌ laabe lade stale binni!
31 Ti laabe ruzuhuaabe lu xtiidxaꞌ ca ni nazíꞌ xquendanabani,
ne rulabe laacaꞌ lu náꞌ ca ni cudxiibaꞌ donda.