Raríꞌ nuu ladxiduáꞌ Diuxi
Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa David.
 
108
Raríꞌ nuu ladxiduáꞌ, Diuxi ni bizáꞌ naa,
¡nuuni para gúꞌndani saa xtiuꞌ!
Ladxiduáꞌ, bibani;
2 laguibani arpa ne salteriu;
¡tí gucuaaneꞌ dxi cubi diꞌ!
3 Ndaaniꞌ guiráꞌ guidxi huiiniꞌ ne guidxi roꞌ
zuundaꞌ saa xtiluꞌ, Tata Diuxi.
4 Guendaranaxhii xtiluꞌ jma naroꞌbaꞌ ni que guibáꞌ.
¡Ne guenda qué ruchee xtiluꞌ rugaandani guibáꞌ nasiá!
5 ¡Diuxi ni bizáꞌ naa, lii nuulu guibáꞌ ra jma nasoo;
guendanandxóꞌ xtiluꞌ ruchá guidxilayú!
6 Bilá laadu ne stipa xtiluꞌ,
ti guilá ca ni nadxiiluꞌ.
¡Bicabi laadu!
 
7 Guníꞌ Diuxi dede ndaaniꞌ yuꞌduꞌ xtiꞌ:
«¡Ne stale guendanayecheꞌ zandaa Siquem,
ne zaguiizeꞌ ca layú xtiꞌ Sucot!
8 Xtinneꞌ nga Galaad ne Manasés;
Efraín naca bichuga ni riguaaꞌ iqueꞌ;
ne Judá nga dximba rulidxeniáꞌ;
9 Moab naca ninchaa ra riguiibeꞌ nayaꞌ;
ne luguiáꞌ Edom zulaa xquelaguiꞌdeꞌ;
¡ne zuundaꞌ saa nayecheꞌ ra quixhedxiéꞌ ca filisteo!»
 
10 Tu laa chiné naa guidxi napa lindaa guie.
Tu laa zanda chi guluíꞌ naa paraa riaana Edom.
11 Lii xa, Diuxi, bidxii décheluꞌ laadu;
¡maꞌ qué naluꞌ guireeneluꞌ ca xpínnidu ni chidxelasaa!
12 Gucané laadu quixhedxidu ca ni nanalaꞌdxiꞌ laadu,
tí stipa xtiꞌ binni gastiꞌ nga laa.
13 Ne stipa xtiꞌ Diuxi zúnidu stale guendanandxóꞌ;
¡laabe zuxhatañeebe ca ni nanalaꞌdxiꞌ laadu!