Guendaranaxhii xtiꞌ Tata Diuxi nuu nuuca
107
Lagudii xquixe Tata Diuxi ti laa nachaꞌhuiꞌ,ne qué rirá guendaranaxhii xtiꞌ.
2 Zacá laguiniꞌ, laatu, ca ni bilá Tata Diuxi,
ca ni bilabe lu náꞌ ca ni nanalaꞌdxiꞌ laatu,
3 ca ni bitópabe lade ca guidxi
ni nuu neza guiaꞌ ne neza gueteꞌ,
neza ra rindani ne neza ra riaaziꞌ gubidxa.
4 Guzá réndatu ndaaniꞌ layú dachi,
qué guidxela gatu ti neza ni chiné laatu ra nuu ti guidxi cuézatu ndaaniꞌ;
5 candaanatu, cayátitu nisa,
¡maꞌ biaꞌ qué gatisitu!
6 Lu xizaa xtitu bicaatu ridxi Tata Diuxi,
ne laabe bilabe laatu.
7 Bizuhuaabe laatu lu ti neza nachaꞌhuiꞌ
ni yené laatu lu ti guidxi ra cuézatu.
8 Lagudii xquixe Tata Diuxi runi xquendaranaxhii,
¡ne purtiꞌ racanebe binni!
9 Laabe rugueꞌbe nisa ca ni cayati nisa,
ne ruyaanabe ca ni candaana.
10 Bibánitu lu guelacahui,
bitaagunáꞌ xilase laatu, gucuatu yaga ne guiibaꞌ,
11 purtiꞌ bicaalutu Tata Diuxi,
ne qué ninatu nuzuubatu xtiidxabe.
12 Ngue nga runi bidiibe laatu dxiiñaꞌ naná;
birenda ñeetu, ne qué ñuu tuuxa ñacané laatu.
13 Lu xizaa xtitu bicaatu ridxi Tata Diuxi,
ne laabe bilabe laatu;
14 Guleebe laatu lu guelacahui,
ne bixhádxebe laatu ra catu yaga ne guiibaꞌ.
15 Lagudii xquixe Tata Diuxi runi xquendaranaxhii,
¡ne purtiꞌ racanebe binni!
16 ¡Laabe nga binidebe ca ndagayoo ni guyáꞌ ne bronce!
¡Laabe nga binidebe ca guiibaꞌ ziuulaꞌ xtiꞌ ndagayoo!
17 Ca binni huará ne ni nuu xizaa
runi xquendanadxábacaꞌ ne xtóndacaꞌ,
18 qué ganda gocaꞌ, daꞌguꞌ ladxidoꞌcaꞌ;
¡maꞌ nexhecaꞌ lu náꞌ guendaguti!
19 Lu yuubaꞌ xtícabe bicaacabe ridxi Tata Diuxi,
ne laa bilá laacabe lu xizaa que;
20 biseendaꞌ xtiidxaꞌ ra nuucabe ne bisianda laacabe;
¡bilá laacabe de ñécabe ndaaniꞌ baꞌ!
21 Lagudii xquixe Tata Diuxi runi xquendaranaxhii,
¡ne purtiꞌ racanebe binni!
22 Lagudii laabe guna, lagudii laabe xquixe
ne laguzeeteꞌ ne guendanayecheꞌ guiráꞌ dxiiñaꞌ huayúnibe.
23 Ca binni ni rutoo biábacaꞌ nisadóꞌ.
Ne ca balaagaꞌ xticaꞌ gucuaacaꞌ neza,
24 galaa batóꞌ nisadóꞌ que, biiyacabe
guiráꞌ guendaridxagayaa bizáꞌ Tata Diuxi.
25 Ne ridxi xtiꞌ Tata Diuxi biaba ti nisaguié bi
ni gudiñentaa nisadóꞌ que;
26 dede guiaꞌ guibáꞌ riasa nisa que,
ne riabantaa dede xaꞌnaꞌ nisadóꞌ;
¡ca binni que bidxibi daatacaꞌ lu guendanaxoo que!
27 Bidxé lucaꞌ sica binnigüeꞌ;
¡abatiꞌ niquiiñeꞌ laacaꞌ guiráꞌ ni nánnacaꞌ!
28 Lu xizaa xtícabe bicaacabe ridxi Tata Diuxi,
ne laa gudixhe dxí ladxidóꞌcabe;
29 bicueezabe nisaguié bi que,
bíꞌnibe ni ti bi ndase,
ne gudixhedxibe nisadóꞌ.
30 Ora bíꞌyacabe nexhe dxí nisadóꞌ que, biéchecabe,
Diuxi guleecá laacabe ruaa ti nisa ra cá íquecabe chindácabe.
31 Lagudii xquixe Tata Diuxi runi xquendaranaxhii,
¡ne purtiꞌ racanebe binni!
32 ¡Ra guidaaguꞌ binni guidxi, gucaa ridxi nayecheꞌ gúnabe!
¡Ra guidxagalú ca binnigola gusisácacaꞌ laabe!
33 Tata Diuxi rucuiidxiꞌ nisa guiiguꞌ, ne ra rindani nisa,
rúnibe cani layú dachi ne layú bidxi;
34 ra nuu layú gudxa rúnibe ni layú zidi,
runi guendanadxabaꞌ xtiꞌ ca ni nabeza luni;
35 ne zaqueca ra nuu ti layú dachi rúnibe ni ti nisa gueꞌlaꞌ
ne ra nuu ti layú bidxi rusindánibe nisa;
36 raqué rucuibe ca ni candaanacaꞌ,
para gúnicaꞌ xquídxicaꞌ.
37 Laacaꞌ riguucaꞌ biní, rudxiibacaꞌ yaga uva,
ne rutopacaꞌ stale xcuaananaxhini.
38 Tata diuxi riguu ndaayaꞌ laacabe, rutale laacabe,
ne zaqueca ca xhiúzecabe.
39 Ne pa gáticabe ne guixiéꞌcabe la?
purtiꞌ nuu tu ruxhii laacabe,
ne rutiidiꞌ laacabe guendananá ne guendazíꞌ,
40 Diuxi rudxii deche ca ni ruxhii binni,
ne ruchebe lucaꞌ ti za réndacaꞌ,
qué guidxelacaꞌ neza checaꞌ.
41 Laabe ribeebe ca ni nazíꞌ xquendanabani lu xilase xticaꞌ;
¡rutálebe lisaa xticaꞌ casi ridale dendxuꞌ!
42 Ca binni nachaꞌhuiꞌ, ora gúꞌyacaꞌ ndiꞌ la? riéchecaꞌ,
ne ca ni nadxabaꞌ la? ridaaguꞌ ruaacaꞌ.
43 Tu nuu xpiaaniꞌ,
naquiiñeꞌ gapa dxiichiꞌ diidxaꞌ diꞌ ndaaniꞌ iqueꞌ,
ne guiene xquendaranaxhii Tata Diuxi.