Gatigá rucaalú Israel Diuxi
106
¡Guisaca Diuxi!Lagudii xquixe Tata Diuxi, ti laa nachaꞌhuiꞌ,
ne qué zará guendaranaxhii xtiꞌ.
2 Tuu ndiꞌ zanda guiníꞌ guiráꞌ ca guendanandxóꞌ xtiꞌ Tata Diuxi.
Tuu ndiꞌ zanda gusisaca laabe casi naquiiñeꞌ guisácabe.
3 Nayecheꞌ riuu ladxidóꞌ ca ni runi ti dxiiñaꞌ jneza
ne qué riaanadxicaꞌ de gúnicaꞌ ni jneza.
4 Bietenalaꞌdxiꞌ naa, Tata Diuxi, dxi gacaneluꞌ ca xpínniluꞌ;
cadi gusiaandaluꞌ naa dxi guedagulaluꞌ laacabe,
5 tí guuyaꞌ guendanayecheꞌ xtiꞌ ca binni guliluꞌ,
ti guiecheniáꞌ ne guchayaꞌ bi yanneꞌ
ne guidxi xtiuꞌ.
6 Huacheedu casi bichee ca bixhózedu;
bicahui ludu; ne bínidu jma guendanadxabaꞌ.
7 Ca bixhozególadu, ca ni guyuu Egipto,
qué nulábicaꞌ guiráꞌ ca dxiiñaꞌ nandxóꞌ bíꞌniluꞌ;
bisiaandacaꞌ guendaranaxhii xtiluꞌ,
biásacaꞌ luguialuꞌ cueꞌ nisadóꞌ xiñáꞌ.
8 Huaxa Diuxi bilá laacabe, bisihuini guendanandxóꞌ xtiꞌ
bisihuini tu naca.
9 Gudindenebe nisadóꞌ xiñáꞌ ne bicuiidxibe laa.
Ne bitiidibe xpínnibe ndaanini
casi ñácani ti layú dachi.
10 Zaqué bilabe laaca lu náꞌ ca ni nanalaꞌdxiꞌ laacaꞌ,
ne de stipa xticaꞌ.
11 Nisa que bindaahua ca ni ladxi laacabe,
nin tóbicaꞌ qué nilacaꞌ.
12 Raqué ruꞌ gúnnacabe nuu Diuxi,
ne biindacabe diidxaꞌ ndaayaꞌ xtibe.
13 Qué nindaa diꞌ bisiaandacabe guiráꞌ ca dxiiñaꞌ ni biꞌniꞌ Diuxi,
ne qué nibézacabe ñannacabe xi cá íquebe.
14 Raricáꞌ, lu guendastubi xtiꞌ layú dachi,
bicaalúcabe Diuxi,
ne gunabaxiánacabe laa guni ni nácabe.
15 Diuxi biziguendané laacabe,
huaxa biseendaꞌ ti guendahuará nadxabaꞌ lugiácabe.
16 Lu ca layú ra biaanacabe que,
gúpacabe ti xiana ndaaniꞌ ladxidóꞌcabe luguiáꞌ Moisés,
ne luguiáꞌ Aarón, Aarón diꞌ nga gulí Tata Diuxi guni xhiiñaꞌ.
17 Raqué bixaleꞌ guidxilayú ne gubini Datán,
ne guiráꞌ ca xpinni Abiram.
18 ¡Guzebele guiráꞌ xixécabe!
¡Bele que bizaaquini guiráꞌ ca ni qué guiquiiñeꞌ que!
19 Lu dani Horeb que bizáꞌcabe ti yuze huiiniꞌ,
ti bidóꞌ de oro bisiácabe, ne bisisácacabe laa;
20 ¡bichaacabe Diuxi ni nandxóꞌ
runi ti yuze ni ro guixiyaa!
21 Bisiaandacabe Diuxi, ni bilá laacabe,
ni biꞌniꞌ stale dxiiñaꞌ ni nandxóꞌ ndaaniꞌ guidxi Egipto,
22 ni biꞌniꞌ stale guendaridxagayaa ndaaniꞌ guidxi xtiꞌ Cam
ne stale guendaridxagayaa lu nisadóꞌ xiñáꞌ.
23 Guníꞌ Diuxi nunitilú laacabe;
huaxa Moisés, ni gulibe que, bizuhuaa lu xtiidxacabe,
ne bicueeza lu xiana xtiꞌ Diuxi,
zaqué tiꞌ maꞌ qué nuxuuxe diꞌ laacabe.
24 Qué nindaa diꞌ gudiñeyúcabe dxa guidxi sicarú ni cudii Diuxi laacabe,
qué ninácabe nicaacabe xtiidxabe;
25 ndaaniꞌ lídxicabe de lari que guníꞌcabe Tata Diuxi,
ne qué ninácabe nuzuubacabe xtiidxaꞌ.
26 Ngue runi laabe gundisanabe luguiacaꞌ,
ne gúdxibe laacaꞌ ne guidubi ladxidoꞌbe
zuutibe laaca lu ca layú dachi que,
27 ne laaca guniꞌbe zuutibe guiráꞌ ca xiiñicaꞌ ne ca xhiágacaꞌ,
ne zucheeche ndásebe laacaꞌ lade ca guidxi ni qué runibiáꞌ laabe que.
28 Gúcacabe xpinni Baal-peor,
ne gudócabe guiráꞌ ca guendaró ni raꞌtaꞌ lu ca bidóꞌ yati que.
29 Ne guiráꞌ guendanadxabaꞌ ni bíꞌnicabe que bichiichicabe Diuxi,
biseendaꞌ ti guendaguidxa luguiácabe.
30 Peru Finees biasa ne biiti ni napa donda que,
zaqué tiꞌ gucuanati lu guendaguidxa que.
31 Ne Diuxi guníꞌ jneza nuu dxiiñaꞌ bíꞌnibe que,
ne zaqué bisaanani lade ca binni lídxibe ni nabani ne ni chigale ruꞌ.
32 Laaca bichiichicabe Diuxi
cueꞌ nisa xtiꞌ Meribá,
ne runi xtóndacabe
gucaná Moisés;
33 bisindácabe ladxidoꞌbe,
ne qué ñúnilube ni guniꞌbe.
34 Ne qué ñunidécabe ca guidxi
ni gudxi Tata Diuxi laacabe gunitilúcabe.
35 Laga la,
biúꞌchacabe ca binni ni qué runibiáꞌ Diuxi,
ne gucuaacabe xpiaꞌcaꞌ;
36 gunaxhiicabe bidóꞌ guie, bidóꞌ yaga,
ngue runi binitilúcabe,
37 gudíxhecabe casi guna ca xiñigaanacabe ne ca xiñidxaapacabe
lu náꞌ ca binnidxabaꞌ que.
38 Bixhiicabe rini xtiꞌ ca ni qué gapa donda,
rini xtiꞌ ca baꞌdunguiiu ne ca badudxaapaꞌ xtícabe,
ne bizugáꞌdecabe ni ca bidóꞌ ni nuu Canaán.
Zaqué guca biidiꞌ guidxilayú ne ca rini que,
39 laacabe laaca gucabiidicabe ne biúꞌdxucabe
ne guiráꞌ ca dxiiñaꞌ nadxabaꞌ ni bíꞌnicabe.
40 Bidxiichiné Tata Diuxi ca xpinni,
bidxiibe laacaꞌ, ca ni gucaꞌ xpínnibe que;
41 bisaanabe laacaꞌ ladxináꞌ ca ni qué runibiáꞌ Diuxi,
ne ca binni diꞌ bixhatañee yannicabe;
42 ca binni diꞌ, bixhatañee laacabe,
ne gudiñeyú laacabe xañee.
43 Stale bieque bilá Diuxi laacabe,
huaxa laacabe bicaalúcabe laa,
laaca xquendanadxabacabe bichenda laacabe.
44 Ra bíꞌyabe, nuucaꞌ xizaa
ne cabidxiaacaꞌ,
45 bietenaláꞌdxibe dxa diidxaꞌ bitaagunebe laacaꞌ
bichaabe xtiidxabe,
purtiꞌ xquendaranaxhiibe naroꞌbaꞌ ni;
46 ¡Diuxi bicuudxi ladxidóꞌ ca ni cuxhatañee laacabe que,
ne ca ngue biaꞌ laacabe!
47 ¡Tata Diuxi ni bizáꞌ laadu, bilá laadu!
¡Gulee laadu lade ca guidxi diꞌ
ti gusisácadu lá ndaayaluꞌ,
ne guiduundadu saa xtiuꞌ nayecheꞌ!
48 ¡Nandaayaꞌ gacaꞌ lá Tata Diuxi, Diuxi xtiꞌ Israel,
lu guidubi dxi, lu guidubi gueelaꞌ!
¡Ne guiratu guiniꞌtu:
«Zacá gácani»!
¡Guisaca Diuxi!