Ca dxiiñaꞌ ni biꞌniꞌ Diuxi runi Israel
105
¡Lagudii diuxquixe Tata Diuxi!¡Laguzeeteꞌ lábe!
Ne lagabi guiráꞌ guidxi xi guiráꞌ ni maꞌ bíꞌnibe.
2 Laguundaꞌ saa nayecheꞌ ra guiete lábe.
¡Ne laguiꞌniꞌ guiráꞌ guendasicarú ni maꞌ bíꞌnibe!
3 Laguchá bi yánnitu runi lá nandxoꞌbe.
¡Gacaꞌ nayecheꞌ ladxidóꞌ
ca ni cuyubi Tata Diuxi!
4 Laguyubi Tata Diuxi, laguyubi stipa xtibe;
ne cadi gusaanatu de guyúbitu laabe.
5 Laguietenalaꞌdxiꞌ guiráꞌ ca dxiiñaꞌ nandxóꞌ huayúnibe,
ne laguietenalaꞌdxiꞌ guiráꞌ diidxaꞌ huaniꞌbe;
6 laatu, ca ni zá lu xneza Abraham;
laatu, ca xiiñiꞌ Jacob, ca ni gulibe.
7 Laabe nga Tata Diuxi, ni bizáꞌ laanu;
¡laabe nga xaique xtiꞌ guidxilayú!
8 Neca peꞌ tidi chii gayuaa neza binni
qué ziaandaꞌ diꞌ ca diidxaꞌ bidiibe laanu,
9 dxa diidxaꞌ bitaagunebe Abraham,
dxa diidxaꞌ bidiibe Isaac,
10 dxa diidxaꞌ ni bíꞌnibe diidxaꞌ biaꞌ neza lú Jacob,
ti diidxaꞌ bindiibi dxiichibe ni qué ziuu dxi guixagueꞌ ni guicaa Israel,
11 laabe guniꞌbe:
«Chi gudieeꞌ lii layú xtiꞌ Canaán
laani nga xindxaa xtiuꞌ.»
12 Zaqué gúdxibe laacaꞌ dxi huaxhieꞌcaꞌ,
dxi nácacaꞌ dxuꞌ ndaaniꞌ ca layú que,
13 dxi canazacaꞌ cheríꞌ chericaꞌ
lu ti guidxi ne sti guidxi,
14 Diuxi qué niná ñuu tu ñuniná laacabe,
ne gúdxibe ca xaique que:
15 «Qué chitánatu ca binni ni maꞌ guliéꞌ,
ne cadi guninatu ca ni rucheeche xtiidxaꞌ.»
16 Biseendabe ti gubiña ndaaniꞌ guidxi Canaán,
ne gúxhabe xquendarocaꞌ.
17 Huaxa bisá nírube José neza lucaꞌ,
ti miatiꞌ ni bitoocabe sica ridoo maniꞌ.
18 Bininácabe ñeebe ra bindiibicabe ni ne guiibaꞌ;
¡bisábacabe laabe ndaaniꞌ lidxiguiibaꞌ!
19 Tata Diuxi guluubiaꞌ xpiaaniꞌ José,
dede ra bizaa ni guníꞌ xcaanda José que.
20 Dxa xaique ni raca ni ná luguiáꞌ stale binni,
guníꞌ gundaacabe laabe;
21 xaique diꞌ bíꞌnibe gacaꞌ José xpixuaanaꞌ guiráꞌ ni nápabe ndaaniꞌ lídxibe
ne ndaaniꞌ xquídxibe,
22 tí ganda gusiidibe ne gusiaanibe xpiaaniꞌ
ca xcaadxi xaique ne ca binnigola que.
23 De raqué beeda Israel, ni rábicabe Jacob,
beedandezabe casi dxuꞌ lu guidxi Egipto,
ndaaniꞌ layú xtiꞌ Cam.
24 Diuxi bitale xquidxi Jacob,
ne bíꞌnibe laacaꞌ jma nadipaꞌ que ca egipcio.
25 Ne laaca laabe bicaabe ca egipcio
gucaalucaꞌ ca binni Israel
ne quítecaꞌ ca xpínnibe.
26 Ora que Diuxi biseendaꞌ Moisés ni runi xhiiñabe,
ne Aarón, ni gulibe que,
27 ne laacaꞌ bisaanacaꞌ duubaꞌ xtiꞌ Diuxi lu layú dachi,
¡raqué bíꞌnicabe stale guendaridxagayaa lu layú xtiꞌ Cam!
28 Diuxi biseendaꞌ ti guelacahui luguiáꞌ Egipto,
huaxa ca binni que, qué nuzuubacaꞌ xtiidxabe.
29 Bisirínibe nisa guiiguꞌ xticaꞌ,
ne biitibe ca xpéndacaꞌ;
30 bichabe bidxiꞌ ndaaniꞌ guidxi que,
dede ra rasi xaique que bidxá bidxiꞌ.
31 Guníꞌ Diuxi, ne bidxá tábano ne biuxiꞌ
lu guidubi guidxi que.
32 Ra nusábabe nisaguié bisábabe nisaguié gui,
ne bisábabe bele lu guidubi guidxi que.
33 Binitilube guiráꞌ ca yaga uvas ne ca yaga duꞌgaꞌ chaꞌhuiꞌa xticaꞌ;
¡binitilube guiráꞌ yaga nagáꞌ xtiꞌ Egipto!
34 Guníꞌ Diuxi, ne beeda stale gusúꞌ;
¡dede bicahui guibáꞌ, qué gápacaꞌ xigabaꞌ!
35 ¡Binduuxecame guiráꞌ ca guixiyaa xtiꞌ guiꞌxhiꞌ
ne gudócame guiráꞌ ca guela que!
36 ¡Biseendabe guendaguti, ndaaniꞌ Egipto,
guiráꞌ ca baꞌduꞌ lugola xtiꞌ ca egipcio!
37 Diuxi gulee ca xpinni de ndaaniꞌ guidxi Egipto,
ne biguaꞌbe laaca oro ne plata,
ne nin tóbicaꞌ qué nirenda ñeecaꞌ.
38 Dede biecheꞌ ca egipcio cayuuyacaꞌ careecabe,
bidxibi daatacaꞌ laacabe.
39 Biseendaꞌ Tata Diuxi ti za gudii bacaꞌndaꞌ laacabe,
ne biseendaꞌ ti bele guzaaniꞌ laacabe huaxhinni.
40 Gunábacabe guendaró, ne Diuxi bidii laacabe bere xunaxi,
ne guetastiá xtiꞌ guibáꞌ bichá ndaanicabe.
41 Diuxi gundaa ti dani, ne bisidá nisa
ni bixooñeꞌ sica ti guiiguꞌ ndaaniꞌ layú dachi que.
42 Purtiꞌ bietenaláꞌdxibe dxa diidxaꞌ nandaayaꞌ
ni bidiibe Abraham ni runi xhiiñabe que.
43 Zacá nga gulee Diuxi xpinni ndaaniꞌ guidxi Egipto,
lade ridxi nayecheꞌ,
44 ne bidiibe laacaꞌ layú xtiꞌ sti guidxi,
ne bidiibe laacaꞌ guela ni bidxiibaꞌ stobi,
45 tí guiénecabe ne guzuubacabe
ca diidxaꞌ biaꞌ ne ni rusiidiꞌ Tata Diuxi.
¡Guisaca Diuxi!