Gusisácanu ni bizáꞌ laanu
104
¡Zaguaaꞌ ndaayaꞌ Tata Diuxi ne guidubi nacaꞌ!¡Aque nandxoꞌloꞌ xa, Tata Diuxi ni bizáꞌ naa!
Bizuchaahuiluꞌ ne guendanandxóꞌ ne guendasicarú;
2 biréndaluꞌ ti lari riaꞌquiꞌ biaaniꞌ.
¡Lii bichiaaluꞌ guibáꞌ casi ribiaa lari!
3 ¡Ndaaniꞌ nisa bicuiluꞌ lídxiluꞌ, raricaꞌ, luguiáꞌ!
¡Bíꞌniluꞌ ca za ca piquiiliꞌa xtiuꞌ;
ladxináꞌ bi ripapaluꞌ!
4 Bi nga naca baduluguidxi xtiuꞌ,
ne xtuxhu bele nga runi xhiiñaluꞌ.
5 Bizuhuaa dxiichiluꞌ ñee guidxilayú
ti qué chuꞌ dxi guichaachani ra zuhuaani.
6 Ti gueꞌlaꞌ nisadóꞌ nutaaguꞌ guidxilayú
casi ñaca nirenda ni ti lari.
Zacá nusiaapa nisa ca dani.
7 Huaxa lii gudindeneuꞌ ni, ne zeni;
chixhe chixhe bitópani xnísani ra binadiagani ridxi guiibaꞌ xtiuꞌ.
8 Ziguiꞌbani dani
ne ziyeteni,
yeguiaanani ra gudíxheluꞌ guiaanani,
9 ra guníuꞌ cadi tídidini,
tí cadi gundaahuani guidxilayú.
10 Lii ruseenduꞌ ca nisa ni rindani
ra nuu ca guiiguꞌ ca ni ruxhooñeꞌ lade dani.
11 Nisa ca nga reꞌ ca maniꞌ guiꞌxhiꞌ;
laani ritiidini guendarati nisa xtiꞌ ca ndxacu nuu ndaaniꞌ guiꞌxhiꞌ.
12 Ruaa ca guiiguꞌ ca
nuu lidxi ca maniꞌ huiiniꞌ xtiꞌ guibáꞌ;
¡raqué ruundacame, ladenáꞌ ca yaga nagáꞌ!
13 Dede ra liꞌdxuꞌ, ra nasoo,
ruzeeluꞌ ca dani ne nisa xtiꞌ guibáꞌ;
ne nisa ziaꞌ xtiꞌ guibáꞌ rutiidiluꞌ guendarati nisa xtiꞌ guidxilayú.
14 Rusindániluꞌ guixiyaa go maniꞌ,
ne ca guela ni rudxiibaꞌ binni
tí gapa ti gueta go,
15 gueta rudii stipa laa,
ne vino, ni rusiecheꞌ xquendanabanibe,
ni runi guzaaniꞌ lube jma que za.
16 Ridiꞌdiꞌ guendarati nisa xtiꞌ ca yaga,
ca cedru xtiꞌ Líbano ni bizuhuaa Tata Diuxi.
17 Stale maniꞌ huiiniꞌ rúnicaꞌ lídxicaꞌ lade nácani,
ne lu ca yaga guiꞌriꞌ nabeza ca maniꞌ gupa.
18 Lu ca dani nasoo ro ca dendxuꞌ guiꞌxhiꞌ,
ne lade guie ribeza ca bixiidxuꞌ.
19 Bizaꞌluꞌ beeu ti chuꞌ biaꞌ dxi;
gubidxa maꞌ nanna pora guiaaziꞌ.
20 Rusicahuiluꞌ gueelaꞌ,
tí ganda cuee lú ca maniꞌ guiꞌxhiꞌ.
21 Ca beedxeꞌ riguu beedxecaꞌ guiuba guiaba tuuxa maniꞌ lu nacaꞌ;
canábacaꞌ Diuxi gudii ni gocaꞌ.
22 Casi peꞌ cuee lú gubidxa, ribiꞌcaꞌ
rigatacaꞌ ra lídxicaꞌ.
23 Ora que riree binni riguni xhiiñaꞌ
dede ra guicahui.
24 ¡Biaa guiráꞌ nga ni bizaꞌluꞌ xa, Tata Diuxi!
Guiráꞌ ni biniꞌluꞌ ne guendabiaaniꞌ;
¡dxaꞌ tipa guidxilayú ne guiráꞌ ni bizaꞌluꞌ!
25 Racá nuu nisadóꞌ, xilaga ne qué gapa xibiáꞌ,
de guiráꞌ lú maniꞌ nuu ndaanini,
nahuiiniꞌ, naroꞌbaꞌ;
26 luni rixubalaahua ca balaagaꞌ, raqué nuu Leviatán,
ti maniꞌ duxhuꞌni ni bizaꞌluꞌ quiteneni.
27 Guiráꞌ ca maniꞌ diꞌ ca lucaꞌ lii
cabézacame gudiiu ni gócame.
28 Lii rudiiu, laaca rutopacaꞌ;
lii ruxhalenouꞌ, laacaꞌ rocaꞌ ni jma sicarú;
29 pa gucaachiluꞌ luluꞌ, ridxíbicaꞌ;
pa gaxhaluꞌ xhieꞌcaꞌ, ráticaꞌ,
ne ribiguetacaꞌ rácacaꞌ yu dé.
30 Huaxa pa lii guseendaluꞌ xhieꞌdoꞌ xtiuꞌ ra nuucaꞌ, ribánicaꞌ,
ne zacá rusibániluꞌ guidxilayú.
31 ¡Guendanandxóꞌ xtiꞌ Tata Diuxi qué rirá!
¡Riechené Tata Diuxi guiráꞌ ni bizáꞌ!
32 Ora guyadxí Tata Diuxi guidxilayú dede racaditi ni;
¡ne ora rigáꞌnabe ca dani dede ruchácani guꞌxhuꞌ!
33 Biaꞌ dxi guibaneꞌ,
zuundaꞌ saa xtiꞌ Tata Diuxi ni bizáꞌ naa.
34 Tila chuꞌ laꞌdxiꞌ Diuxi guendabiaaniꞌ xtinneꞌ,
purtiꞌ laasibe nga riecheniáꞌ.
35 ¡Guinitilú lu guidxilayú ca ni ruchee!
¡Ne guinitilú ca ni nadxabaꞌ!
¡Naa zaguaaꞌ ndaayaꞌ Tata Diuxi ne guidubinaca ladxiduáꞌ!
¡Guisaca Diuxi!