Naa zuguaaꞌ ndaayaꞌ Tata Diuxi
Ni bicaa David.
103
Naa zuguaaꞌ ndaayaꞌ Tata Diuxi ne guidubi ladxiduáꞌ;guidubi nacaꞌ zuguaaꞌ ndaayaꞌ lá nandxoꞌbe.
2 Naa zuguaaꞌ ndaayaꞌ Tata Diuxi ne guidubi ladxiduáꞌ;
ne qué zusiaandaꞌ ca guendanazaaca huadiibe naa.
3 Laabe nga rusiándabe guiráꞌ guendahuará xtinneꞌ,
ne laabe ruxhabe guiráꞌ guendanadxabaꞌ ni bineꞌ,
4 ne laca laabe rulabe naa lu náꞌ guendaguti,
ne ranaxhixhaatabe naa,
5 laabe rudiibe naa ni jma nazaaca,
ne rudiibe naa stipa casi ti bisiá.
6 Tata Diuxi nanna gulidxi jneza
ca ni cayuninácabe laa.
7 Biluiꞌbe ca neza xtibe ne xhiiñabe
Moisés ne ca guidxi xtiꞌ Israel.
8 Nanaxhi ladxidóꞌ Tata Diuxi ne riáꞌ binni;
qué ridxiichigabe ne laabe nga guendaranaxhii.
9 Qué rácabe naduxhuꞌ ne laanu gatigá,
ne xiana xtibe qué rindaa;
10 qué huaquixedibe laanu
guiráꞌ guendanadxabaꞌ ne ca donda xtinu;
11 naroꞌbaꞌ guendaranaxhii ni nápabe ca ni nadxii laabe
casi naroꞌbaꞌ guibáꞌ lu guidxilayú riꞌ.
12 Biaꞌ de ra rindani gubidxa ne ra riaaziꞌ gubidxa,
biaꞌ ca zitu bixhálebe xtóndanu de laanu;
biaꞌ ca nga zitu rusáꞌbibe guendaruchee xtinu.
13 Casi ranaxhii binni xiiñiꞌ,
zacá nga ranaxhii Tata Diuxi, ne ca ni ruzuubaꞌ xtiidxaꞌ;
14 laabe nánnabe xiné guyanu;
nannadxíchibe yu dé nga laanu.
15 Guendanabani xtiꞌ binni guidxilayú nácani casi guixiyaa;
rieleꞌ ni casi ti guieꞌ guiꞌxhiꞌ;
16 casi peꞌ gundubi bi ni rinitulú ni,
ne guirutiꞌ ruꞌ ranna xi gucaꞌ xa de laani.
17 Huaxa guendaranaxhii xtiꞌ Tata Diuxi qué ziuu dxi guirani
luguiáꞌ ca ni rusisaca laabe;
ne qué zianadxibe de gúnibe jneza luguiacaꞌ
ne luguiáꞌ xiiñicaꞌ, ne xhiágacaꞌ,
18 sica riꞌ ranaxhiibe ca ni bitaaguné laabe diidxaꞌ
ne ca ni qué rusiaandaꞌ guzuubaꞌ xtiidxabe.
19 Tata Diuxi zuba guibáꞌ,
ne dede racá raca guiráꞌ ni nabe.
20 ¡Laatu ángel ni nandxoꞌcaꞌ, lacuu ndaayaꞌ Tata Diuxi!
Laatu, ca ni ruzuubatu xtiidxabe,
ne rúnitu ni nabe.
21 ¡Guiráꞌ xpinni Tata Diuxi ca ni runi xhiiñabe ca ni runi ni nabe,
lacuu ndaayaꞌ laabe!
22 ¡Guiráꞌ xixé ni bizáꞌ Tata Diuxi,
cuꞌ ndaayaꞌ laabe ratiisi nuu!
¡Naa zuguaaꞌ ndaayaꞌ Tata Diuxi ne guidubi ladxiduáꞌ!