Ndaayaꞌ xtiꞌ tobi ni nuu xizaa
Diidxaꞌ ndaayaꞌ xtiꞌ tuuxa nuu xizaa ne naguunduꞌ nuu ladxidóꞌcabe guiráꞌ ni cayuniná laa neza lú Tata Diuxi.
102
Tata Diuxi, bicaadiaga ndaayaꞌ xtinneꞌ,¡bizaalaꞌdxiꞌ naa, bicaadiaga xtidxeꞌ!
2 Cadi guxooñeluluꞌ naa
dxi chuaaꞌ xizaa;
¡bicaadiaga laꞌ naa!,
¡guiuba ga bicabi naa ra gucaaridxeꞌ lii!
3 Gunna guendanabani xtinneꞌ rinitilú casi guꞌxhuꞌ,
ne dxitaladeꞌ riaꞌquiꞌ casi buu,
4 ladxiduáꞌ nuu nayati
casi guixiguunduꞌ;
¡daꞌguꞌ ladxiduáꞌ, qué ganda gahuaꞌ!
5 Dede maꞌ guiꞌdiꞌ guidiladeꞌ lu dxitaladeꞌ
runi guendariguu liibi xtinneꞌ.
6 Nacaꞌ casi ti maniꞌ bisi ni nabeza lu layú dachi,
nacaꞌ casi ti damaꞌ ruunaꞌ lade yoo yuxe.
7 Qué raseꞌ.
Nacaꞌ casi ti maniꞌ huiiniꞌ stubi nuu ique yoo.
8 Ca ni qué racalaꞌdxiꞌ naa dxi ne gueelaꞌ culaacaꞌ diidxaꞌ naa,
ne riguudinécabe laꞌyaꞌ.
9 Ra ñahuaꞌ gueta, laga dé cayahuaꞌ;
nisa riete luáꞌ, riúꞌchani nisa cayeeꞌ,
10 runi xiana xtiuꞌ ne runi cadxiichuꞌ,
gundisuꞌ naa ne gudiñentaaluꞌ naa.
11 Ca dxi xtinneꞌ ridíꞌdicaꞌ casi ti bandáꞌ;
ziguunduáꞌ casi guixiyaa.
12 Hauxa lii, Tata Diuxi, qué ziuu dxi guinitiluluꞌ;
¡ne láluꞌ qué ziaandaꞌ diꞌ!
13 Biasa, bialaꞌdxiꞌ Sión,
maꞌ gunda dxi;
¡dxi guxhaluꞌ xtonda ni!
14 Ca xpínniluꞌ nadxiicaꞌ guie xtiꞌ Sión;
ne riuubaꞌ laacabe gúꞌyacabe nácani yoo yuxe.
15 Guiráꞌ guidxi roꞌ ne guiráꞌ xaique roꞌ ni nuu guidxilayú
zusisácacaꞌ lá ndxoꞌ Tata Diuxi
16 dxi gúꞌyacabe gunichaahuibe Sión,
ne guihuini guendanandxóꞌ xtibe,
17 dxi gúꞌyacabe gacanebe binni nazíꞌ,
ne gucaadiagabe xtídxicaꞌ.
18 Guirani guicani lu guiꞌchiꞌ
tí ca ni gueeda ruꞌ ganna ni,
tí ca ni caꞌruꞌ gale ruꞌ
ganaxhiicabe Tata Diuxi.
19 Dede guibáꞌ ra jma nasoo,
ruuyadxi Tata Diuxi guidxilayú diꞌ,
20 tí gulábibe yuubaꞌ xtiꞌ ca ni daguyoo
ne gulabe ca ni maꞌ nexheꞌ gatiꞌ;
21 tí guidunaxhii ne guisaca lábe
ndaaniꞌ guidxi Sión, ne Jerusalén,
22 dxi guidaaguꞌ guiráꞌ binni ne guiráꞌ guidxi roꞌ
gusisacaꞌ laabe.
23 Galaa ruꞌ zeꞌ xquendanabaneꞌ maꞌ gúxhabe stipa naa;
ne maꞌ bisihuiinibe ca dxi xtinneꞌ.
24 Naa rabe laabe:
«Diuxi ni bizáꞌ naa,
cadi chineuꞌ naa, deruꞌ galaa neza nuu guendanabani xtinneꞌ.»
¡Ca iza xtiuꞌ qué gapa dxi guiluxe!
25 Dede dxi bizaꞌluꞌ guidxilayú gudixhechaahuiluꞌ laa;
ne laaca lii bizaꞌluꞌ guibáꞌ.
26 Guirani zanitilú,
huaxa lii zaqué si lii.
Guirani ziuxe, casi riuxe lari;
¡huaxa lii zuchaaluꞌ cani ne guirani zuchaa,
sica ruchaa binni lari!
27 Huaxa lii zaqué si lii;
ca iza xtiuꞌ qué gápacaꞌ ra guilúxecaꞌ.
28 Lii zápaluꞌ ca xiiñiꞌ ni runi xhiiñaluꞌ;
ne lii piouꞌ nga guiníuꞌ zacá gácani.