Tata Diuxi nga Xaique roꞌ ni jma nandxóꞌ
99
¡Tata Diuxi nga Xaique roꞌ!¡Laabe nápabe banguꞌ xtibe luguiáꞌ ca querubín!
Gacaditi ca guidxi roꞌ, ne zaqueca guidubi naca guidxilayú.
2 Tata Diuxi nga nandxóꞌ lu dani Sión;
ne dídibe lú guiráꞌ ca guidxi ca.
3 Guidunaxhii lábe, tí nandxóꞌ ni ne naduxhuꞌ ni;
¡Diuxi nga nandaayaꞌ!
4 Lii nga ti Xaique nandxóꞌ ni nadxii ni jneza;
laaca lii nga gudíxheluꞌ gácadu tobi si.
Huayanaxhiiluꞌ ca xiiñiꞌ Jacob
ne ti diidxaꞌ huandíꞌ ne nazaaca.
5 ¡Lagusisaca Tata Diuxi, Diuxi ni bizáꞌ laanu,
ne lagusuxibi xañeebe!
¡Diuxi nga nandaayaꞌ!
6 Moisés ne Aarón nuu lade ca gueꞌdxeꞌ xtibe;
Samuel nuu lade ca ni bicaa ruaa laabe.
Tata Diuxi bicabi laacabe
dxi laacabe gurídxicabe laa.
7 Diuxi guniꞌne laacabe
de lade za,
ne laacabe bíꞌnicabe guiráꞌ ni gudxi Diuxi laacabe
ne diidxaꞌ biaꞌ ni bidiibe laacaꞌ.
8 Tata Diuxi, Diuxi ni bizáꞌ laadu, ¡lii bicábiluꞌ laacabe!
Gúcaluꞌ neza lúcabe ti Diuxi ni ruxhá donda,
peru zaqueca bisabanouꞌ laacabe dxi bicheecabe.
9 Lagusisaca Tata Diuxi, Diuxi ni bizáꞌ laanu,
¡laguzuxibi ñee dani nandaayaꞌ xtibe!
¡Tata Diuxi, Diuxi ni bizáꞌ laanu, nandaayaꞌ!