Ti saa cubi guicaa Tata Diuxi
96
Laguundané Tata Diuxi ti saa cubi;guiráꞌ xixé binni guidxilayú, laguundané Tata Diuxi;
2 lagucheeche xtiidxabe decheca deche dxi,
laguundané Tata Diuxi, lacuu ndaayaꞌ lábe.
3 Laguzeeteꞌ guiráꞌ guendanandxóꞌ ne guendaridxagayaa xtibe
neza lú guiráꞌ guidxi roꞌ ne ca guidxi huiiniꞌ,
4 tí laabe nga Tata Diuxi ni nandxóꞌ
ni naquiiñeꞌ gusisácanu,
¡laatibe nga jma nadúxhube lade guiráꞌ ca bidóꞌ!
5 Ca xpidóꞌ ca guidxi ca gastiꞌ nga laacaꞌ,
huaxa Tata Diuxi nga bizáꞌ guibáꞌ.
6 ¡Dede riaquibiaaniꞌ ra nuu Diuxi!
¡Ndaaniꞌ yuꞌduꞌ xtibe nuu stipa ne ni sicarú!
7 Laatu binni guidxilayú, lagudii Tata Diuxi,
lagudii laabe stipa ne guendanandxóꞌ;
8 lagusisaca Tata Diuxi;
laguiuu ndaaniꞌ léꞌ xtiꞌ yuꞌduꞌ xtibe ne guna,
9 laguiuu ndaaniꞌ yuꞌduꞌ sicarú xtibe ne la ganaxhii laabe.
¡Guiráꞌ xixé binni guidxilayú gacaditi neza lube!
10 Lagabi ca guidxi roꞌ ca Tata Diuxi nga:
«¡Xaique roꞌ!»
Ne laabe bizuhuaa dxiichibe guidxilayú, tí cadi guiniibi;
ne tobi si xtiidxabe ne guiráꞌ xixé ca guidxi ca.
11 ¡Guiecheꞌ guibáꞌ ne guidxilayú!
¡Guindaabiꞌ nisadóꞌ ne guiráꞌ ni nuu ndaaniꞌ!
12 ¡Guiecheꞌ guiꞌxhiꞌ ne guiráꞌ ni nuu ndaaniꞌ!
¡Ca yaga nagáꞌ ni nuu ndaaniꞌ guiꞌxhiꞌ uguaꞌcaꞌ ridxi nayecheꞌ,
13 neza lú Tata Diuxi, ni maꞌ zeeda!
¡Ya, laabe maꞌ zeedabe zeeda gacaꞌ ni nabe lu guidxi layú,
ne zaca ni nabe lu guiráꞌ ca guidxi ni nuu ndaaniꞌ guidxilayú
ne diidxaꞌ huandíꞌ ne diidxaꞌ jneza!