Laidúꞌndaꞌ neza lú Tata Diuxi ne stale guendanayecheꞌ
95
Latáꞌ, guidúꞌndanu nayecheꞌ neza lú Tata Diuxi;guidúꞌndanenu ni rapa ne ni rulá laanu.
2 Guidxíñanu neza lube gudiꞌnu diuxquixe laabe,
ne guidúꞌndanu saa ra gusisácanu laabe.
3 Tí Tata Diuxi naca Diuxi nandxóꞌ,
ne laabe nga Xaique roꞌ xtiꞌ guiráꞌ bidóꞌ.
4 Ndaaniꞌ nabe naazebe ca xilate ni jma gueteꞌ xtiꞌ guidxilayú;
xtibe nga ca dani ni jma nasoo.
5 Xtibe nga nisadóꞌ, laabe bizaꞌbe ni;
¡ne nápebe bizaꞌbe guidxilayú bidxi!
6 Latáꞌ, guiabaxíbinu ganaxhiinu laabe;
guzuxíbinu neza lú Tata Diuxi,
tí laabe bizaꞌbe laanu.
7 Laabe nga Diuxi ni bizáꞌ laanu, ne nácanu xquídxibe;
laanu nga dendxuꞌ ni nuu lu layú xtibe.
La gucaadiaga xi cayábibe laatu yannadxí:
8 «Cadi guquidxitu ladxidoꞌto, casi bíꞌnitu Meribá;
casi dxi biuutu Masá, ndaaniꞌ yu dachi,
9 casi biꞌniꞌ ca bixhozególatu naa,
nin ne biiyacaꞌ guiráꞌ ni bineꞌ caguubiaꞌcaꞌ naa.
10 Chupa late gande iza bidxiicheniáꞌ ca binni que,
ne guniéꞌ:
"Ca binni diꞌ maꞌ biree doo íquecaꞌ;
¡qué ruzuubacaꞌ xtiidxaꞌ!"
11 Nga runi guniéꞌ ne xiana ndaaniꞌ ladxiduáꞌ
qué ziuu dxi chúꞌcabe ra riziiladxeꞌ.»