Tata Diuxi nga ruxhubadonda guidxilayú
94
¡Bisihuinni luluꞌ, Tata Diuxi, Diuxi ni ruquixe binni guendanadxabaꞌ!
2 Lii nga ni riguubiáꞌ donda xtiꞌ guidxilayú;
¡biasa luguiáꞌ ca ni nayáꞌ,
ne biquixe laacabe guiráꞌ ni huayúnicabe!
3 Tica padxí pue, Tata Diuxi,
tica padxí ndiꞌ guiluxe guendanayecheꞌ xtiꞌ ca ni qué guiquiiñe.
4 Guiráꞌ ca nadxabaꞌ ca
ruchácaꞌ bi yannicaꞌ, qué rapa xpiáꞌcaꞌ;
¡ne ruchácabe naróꞌ xtícabe!
5 Ay Tata Diuxi,
laacabe runinácabe xpínniluꞌ;
¡ne rusutuícabe lucaꞌ!
6 Ruuticabe gunaa bizabi ne dxuꞌ;
ne ruuticabe ca bizabi.
7 Nácabe qué ruuyaꞌ Tata Diuxi,
Diuxi xtiꞌ Jacob qué ganna xi cayúnicabe.
8 ¡Laganna, binnihuaticaꞌ!
Padxí nga natu chuꞌ xpiaanitu.
9 Ñee natu qué runadiaga
ni bizáꞌ diáganu la?
Ñee natu qué ruuyaꞌ
ni bizáꞌ guiélunu la?
10 Ñee natu qué zusábabe laatu la?
pa laabe rusabanabe ca guidxi ca yaꞌ.
Ñee natu qué gánnabe la?
pa laabe riguube guendabiaaniꞌ ndaaniꞌ ique binni.
11 Nannadxichi Tata Diuxi
nisi guendahuati ricá ique binni.
12 Ay Tata Diuxi,
nayecheꞌ nga ribani ca ni rulídxeluꞌ laa
ne ca ni rusiidiluꞌ laa
13 ti gápacabe guendanayecheꞌ
dxi gueeda ca dxi naxoo,
laga calaa ga xpaꞌ
binni qué guiquiiñe.
14 Tata Diuxi qué ziuu dxi gusaanabe ca xpínnibe,
qué susaanabe laaca stúbicaꞌ.
15 Guendaruni jneza zabiguetani ndaaniꞌ yoo ra riuu biaꞌ xtonda binni,
ne guiráꞌ binni nayá ladxidóꞌ zazá nándani.
16 Tu guiasa gulá naa
lu náꞌ ca ni nadxabaꞌ ne ca ni qué guiquiiñe.
17 Pa qué ñacané Tata Diuxi naa la?
mape ca ñuaaꞌ lu dxí doꞌ xtiꞌ guendaguti.
18 Dxi naa guniéꞌ:
«Caree chuuchi ñeeꞌ»,
guendaranaxhii xtiuꞌ, Tata Diuxi, beeda gacané naa.
19 Ora maꞌ cayaca yayá xquendabiaaneꞌ
ne cutaaguꞌ xizaa naa la?
lii racaneuꞌ naa ne rusiécheluꞌ ladxiduaꞌyaꞌ.
20 Lii qué zadxaagaluꞌ ca xaique nadxabaꞌ ni riguubiáꞌ xtonda binni,
ca ni qué runi jneza ne rutuñeecaꞌ diidxaꞌ biaꞌ;
21 ca ni riníꞌ xtiidxaꞌ guniná binni qué guzaabiꞌ gastiꞌ ne nayá ladxidóꞌ,
ca ni rugaasacabe lu náꞌ guendaguti.
22 Tata Diuxi nga yoo ni rapa naa;
Diuxi ni bizáꞌ naa nga naca ti guie ni rulá naa.
23 Tata Diuxi zuni
laca guendanadxabaꞌ xtícabe gunduuxeꞌ laacabe.
¡Diuxi xtinu zunidé laacabe!