Ti guendaruundaꞌ ni rusisaca
Guendaruundaꞌ diidxaguieꞌ. Diidxariuundaꞌ rusisacanécabe Diuxi dxi sábadu.
92
Tata Diuxi ni nandxóꞌ,¡aque sicarú nga gudiicabe diuxquixe lii
ne gúꞌndacabe saa ra guiete láluꞌ!
2 Siadóꞌ ne huaxhinni guzeetecabe
guendaranaxhii xtiuꞌ ne guendaruni jneza xtiuꞌ,
3 guzeetecabe ni ne saa xtiꞌ yagalé,
ne saa nasisi xtiꞌ arpa ne salteriu.
4 Ay Tata Diuxi,
¡lii maꞌ bisiechuꞌ naa ne guiráꞌ ni huayuꞌnuꞌ!
¡Ca dxiiñaꞌ xtiuꞌ ruchá tipa cani ladxiduáꞌ!
5 Ay Tata Diuxi,
¡aque nandxóꞌ nga guiráꞌ ni ruꞌnuꞌ xa!,
¡ne guirutiꞌ zanda ganna xi ná xquendabiaaniluꞌ!
6 ¡Ca ni qué náꞌ guiene diidxaꞌ qué zanda ganna cani!
7 Ca binni nadxabaꞌ ne ca binni qué guiquiiñeꞌ la?
riniisicaꞌ casi guixiyaa, ne ridalecaꞌ,
para guinitilú sicaꞌ ne qué chuꞌruꞌ dxi guibánicaꞌ,
zaroobacaꞌ ne zadálecaꞌ para gatiꞌ sicaꞌ.
8 Peru lii, Tata Diuxi, dxi gueelaꞌ zasácaluꞌ.
9 Ndiꞌ nga ti diidxaꞌ ni huandíꞌ, Tata Diuxi:
ca ni nanalaꞌdxiꞌ lii, zacadecaꞌ;
ne ca ni qué guiquiiñe, zarechendásecaꞌ.
10 Lii rudiiluꞌ naa stale stipa
casi stipa xtiꞌ ti yuze,
ne ruchaluꞌ nisa rindáꞌ naxhi iqueꞌ.
11 Zuyadxiꞌcheꞌ ra guiaba ca ni nanalaꞌdxiꞌ naa;
¡ne zunadiagaꞌ ca ridxi naná xtiꞌ ca ni qué guiquiiñeꞌ!
12 Ca ni nachaꞌhuiꞌ riélecaꞌ casi guiéꞌ ziña,
ne rácacaꞌ nagáꞌ casi ca cedru xtiꞌ Líbano.
13 Ndaaniꞌ yuꞌduꞌ xtiꞌ Tata Diuxi nga nuu xcúcabe;
ne riélecabe ndaaniꞌ léꞌ xtiꞌ Diuxi xtinu.
14 Neca maꞌ nagólacabe, zudii rucabe cuananaxhi;
ne zácacabe naguidxi ne nagáꞌ,
15 ne zuzeetecabe Tata Diuxi, ni rapa naa,
nacháꞌhuibe ne rúnibe ni jneza.