Tata Diuxi nga rapa laanu
91
Ni nabeza ne riaapaꞌ xaꞌnaꞌ bandáꞌxtiꞌ Diuxidóꞌ, Diuxi ni nandxóꞌ,
2 riníꞌ ne rabi Tata Diuxi sica riꞌ:
«Lii nga lidxeꞌ,
lii nga yoo roꞌ ra rucacheluáꞌ,
¡Diuxi ni bizáꞌ naa, Diuxi ni ricá luáꞌ!»
3 Laatibe zanda gulabe lii
lu náꞌ guendananá ne lu náꞌ guendahuará ni gueeda,
4 zuchiibe lii ne xhiaabe,
ne xaꞌnaꞌ xhiaabe qué zazaacaluꞌ gastiꞌ.
¡Laabe qué zusaanabe lii, zápabe lii!
5 Cadi guidxiꞌbuꞌ ca bisi xtiꞌ gueelaꞌ,
cadi guidxiꞌbuꞌ ca bazandíꞌ xtiꞌ dxi,
6 nin ca guendaguidxa gueeda lu gueelaꞌ cahui,
nin ca guendaguti rizá ridxíꞌ;
7 zuuyuꞌ zuuticabe biaꞌ ti guixhiaapa binni neza bigaꞌ xtiuꞌ,
ne zuuyuꞌ zuuticabe biaꞌ chii guixhiaapaꞌ binni neza ndigaꞌ xtiuꞌ,
ne lii qué zácaluꞌ gastiꞌ.
8 Lii zuuyaꞌ dxíchiluꞌ ni:
ne zuuyuꞌ modo guiaba ca ni qué guiquiiñe.
9 Purtiꞌ lii gunabaladxiꞌluꞌ Tata Diuxi nga gapa lii,
biyubuꞌ Diuxidóꞌ gulá lii,
10 qué zadxiña nin guendananá lii,
ne qué ziuu guendahuará ndaaniꞌ lidxuꞌ;
11 purtiꞌ Diuxi zuseendabe ca xpínnibe ni nuu guibáꞌ
gapaꞌ lii ra tiisi cheuꞌ.
12 Zandíscabe lii ne nácabe
tí cadi guirenda nin ti guie ñeeu.
13 Zanda saluꞌ lade beedxeꞌ,
lade maniꞌ duxhuꞌ, lade beendaꞌ.
14 «Naa zulaꞌyaꞌ laabe,
zaguixheꞌ laabe ra cadi gacanabe,
purtiꞌ laabe nadxiibe naa ne runibiaꞌbe naa.
15 Dxi cuídxibe naa, zucabe laabe;
¡naa piaꞌ ziuaaꞌ cueꞌbe!
Zabeeꞌ laabe lu xizaa
ne zusisacaꞌ laabe;
16 zusigaa xquendanabanibe xadxí,
¡zulaꞌyaꞌ laabe ne zusiecheꞌ laabe ne guendarulá xtinneꞌ!»