Diuxi qué zati ne binni zediꞌdiꞌ si
Diidxaꞌ ndaayaꞌ xtiꞌ Moisés, baꞌdunguiiu xtiꞌ Diuxi.
90
Tata Diuxi, lii huayápaluꞌ laadudede dxi bizulú guidxilayú.
2 Dede dxi caꞌruꞌ gale guixhidóꞌ
dede dxi caꞌruꞌ chuꞌ yú ne guidxilayú,
dede iza yooxhoꞌ ni maꞌ gudiꞌdiꞌ
ne dede ra guinitilú guendanabani,
lii nácaluꞌ Diuxi.
3 Lii ruꞌnuꞌ dé miatiꞌ
ora guiníuꞌ:
«Lagaca yu dé, binni guidxilayucaꞌ.»
4 Huandíꞌ, ti guixhiaapa iza, nácani para lii,
casi naca dxi xtiꞌ neegueꞌ, ma gudiꞌdiꞌ.
¡Zedagácacani casi chupa chonna xigaba xtiꞌ gueelaꞌ!
5 Rixubiyú xooloꞌ ca binni,
casi ñácacaꞌ ti bacaandaꞌ si;
6 casi ñácacaꞌ guixiyaa, ni rindani ne rieleꞌ siadóꞌ,
ne huadxí riguunduꞌ ne ribidxi.
7 Huandíꞌ, xiana xtiuꞌ rusiá laadu,
¡ruchenda ni laadu!
8 Ca xtóndadu ne guendanadxabaꞌ xtidu
rihuini cani neza luluꞌ.
9 Huandíꞌ, guendanabani xtidu
riluxeni runi guendaridxiichi xtiuꞌ;
ca iza xtidu zedagácacani casi ti guendaricaalaꞌdxiꞌ.
10 Chonna late gande chii iza si nga nexheꞌ guibani binni;
ca ni jma naguidxi ridxiñacaꞌ lu tapa late gande iza;
peru guendaricá lú guibani tobi xadxi
yuubaꞌ ne dxiiñaꞌ si nga redanécani.
¡Ca iza ca nagueenda ridíꞌdicaꞌ, zaqueca laadu!
11 Tu laa runibiáꞌ duxhuꞌ xtiꞌ xiana xtiuꞌ.
Tu laa runibiáꞌ guendaridxiichi xtiuꞌ.
12 Bisiidiꞌ laadu ugabaꞌ chaahuidu ca dxi xtidu,
tí ganda guizaa chaahuiꞌ xpiaanidu.
13 ¡Tata Diuxi, Biiyaꞌ laadu!
Pabiáꞌ ndiꞌ nouꞌ guindoou yaꞌ.
¡Bialaꞌdxiꞌ ca xpinnuꞌ!
14 Bichá laadu de guendaranaxhii xtiluꞌ ra guzulú dxi,
ti guidúꞌndadu ne stale guendanayecheꞌ biaꞌ dxi guibánidu.
15 Biaꞌca ca dxi guyuꞌdu xizaa
biáꞌ caca dxi bisiecheꞌ laadu.
16 ¡Biiyaꞌ guꞌyaꞌ ca xpinnuꞌ ne ca xiiñicaꞌ
guiráꞌ ca xhiiñaluꞌ ne guendanandxóꞌ xtiuꞌ!
17 Guendaranaxhii xtiꞌ Tata Diuxi, Diuxi ni bizáꞌ laanu,
chuꞌ ládenu.
¡Tata Diuxi, bizuhuaa chaahuiꞌ laadu, lu xhiiñadu!
¡Bizuhuaa chaahuiꞌ, zacá, xhiiñadu!