Diidxaꞌ bitaaguné Diuxi David
Ni gudixhe Etán ezrahíta que gacaꞌ.
89
Tata Diuxi, lu diidxariuundaꞌ xtinneꞌzaniéꞌ nacháꞌhuiluꞌ;
ne gatigá zuzeeteꞌ
tobi lucha si xtiidxaluꞌ.
2 Zucheecheꞌ diidxaꞌ, zaniéꞌ, qué ziuu dxi guirá guendaranaxhii xtiluꞌ;
zaniéꞌ tobi lucha si lii ne qué ruchaaluꞌ,
casi ca qué ruchaa guibáꞌ.
3 Bitaaguneluꞌ David ti diidxaꞌ;
ne guꞌdxuꞌ laabe:
4 «Zuneꞌ ca binni ni za de lii
xaique dxi lii maꞌ zeuꞌ.»
5 Ay Tata Diuxi,
guiráꞌ xixé ni nuu guibáꞌ
rusisácacaꞌ guiráꞌ ni jneza xtiuꞌ ne guendaridxagayaa xtiuꞌ.
6 ¡Tata Diuxi, gastiꞌ ruꞌ sti Diuxi gacaꞌ casi lii,
ne qué guinni ruꞌ stobi xaguibáꞌ ugaanda lii!
7 Diuxidóꞌ ni naduxhuꞌ,
lade guiráꞌ ca bidóꞌ nuu guibáꞌ.
8 Tata Diuxi, Diuxi ni nandxóꞌ,
xtiluꞌ nga guiráꞌ xixé stipa ne ni dxandíꞌ nuguu leꞌ lii;
¡gastiꞌ ruꞌ stobi casi lii!
9 Lii riguixhedxiluꞌ nisadóꞌ bani,
ne laaca riguixhedxiluꞌ ni ora maꞌ cadiñentaa ni;
10 bituñeeluꞌ maniꞌ duxhuꞌ xtiꞌ nisadóꞌ
casi ti gueꞌtuꞌ;
ne stipa si xtiꞌ naꞌluꞌ
bisuxhooñeluꞌ guiráꞌ ni nanalaꞌdxiꞌ lii.
11 Xtiluꞌ nga guibáꞌ ne guidxilayú;
ne lii bizaꞌluꞌ guidxilayú ne guiráꞌ ni nuu ndaanini.
12 Lii bizaꞌluꞌ neza guiaꞌ ne neza gueteꞌ;
ca dani Tabor ne Hermón cayuundacaꞌ nayecheꞌ cuzeetecaꞌ láluꞌ.
13 Nadipaꞌ naluꞌ ca;
náꞌ ndígaluꞌ nadipaꞌ ne nandxóꞌ.
14 Xpánguluꞌ zuhuaa dxiichini lu diidxaꞌ biaꞌ ne ni nazaaca;
guendaranaxhii ne guendaruni jneza rireecaꞌ ruchagalucaꞌ lii.
15 Ay Tata Diuxi,
aque nayecheꞌ nga guidxi ni rusisaca lii ne stale guendanayecheꞌ,
ne zizacaꞌ cuzaaniꞌ xpiaaniluꞌ laacaꞌ,
16 ne guidubi dxi riechené láluꞌ
ne riquitelaꞌdxiꞌ ne guendaruni jneza xtiuꞌ.
17 Dxandíꞌ peꞌ, lii nga stipa xtini ne runi lii sicarú ni;
guendanandxóꞌ xtidu ridale purtiꞌ zacá racalaꞌdxuꞌ.
18 ¡Tata Diuxi nga ni rapa laadu!
¡Xaique roꞌ xtidu nga Bidóꞌ xtiꞌ Israel!
19 Ti dxi guníuꞌ lu bacaandaꞌ,
guꞌdxuꞌ ca ni qué rucheené lii:
«Guliéꞌ tobi ni nadxibalú lade ca xpinneꞌ,
bizuhuaa laabe ra jma nasoo ne gucaniáꞌ laabe.
20 ¡Bidxelaꞌ David ni runi xhiiñaꞌ!
Ne za ndaayaꞌ xtinneꞌ bineꞌ laabe xaique,
21 ne qué ziuu dxi guiaadxaꞌ guendaracané xtinneꞌ laabe.
Ne guendanandxóꞌ xtinneꞌ zuzuhuaa dxiichibe,
22 ne ca ni nanalaꞌdxiꞌ laabe qué zucaalúdicaꞌ laabe,
nin ca ni nadxabaꞌ qué zaguiñentaa laabe.
23 Zuxhatañee ca ni nanalaꞌdxiꞌ laabe;
¡zabee laacaꞌ de lube!
¡Zuxuuxeꞌ ca ni qué racalaꞌdxiꞌ laabe!
24 Laabe zápabe guendaranaxhii ne guendaruni jneza xtinneꞌ,
ne naa zutaleꞌ stipa xtibe.
25 Zuzuhuaaꞌ dxiicheꞌ laabe ne zudieeꞌ laabe stipa ti gacaꞌ ni nabe
dede nisadóꞌ Mediterráneo dede lu guiiguꞌ Éufrates.
26 Laabe zábibe naa:
"Lii nga bixhozeꞌ;
Diuxi xtinneꞌ, ni rulá ne rapa naa."
27 Ne naa zuneꞌ laabe baꞌduꞌ lugola xtinneꞌ,
zuneꞌ laabe ni jma nandxóꞌ lade guiráꞌ ca xaique xtiꞌ guidxilayú.
28 Dxi gueelaꞌ zanaxhieeꞌ laabe,
ne qué zache xtiidxaꞌ ne laabe.
29 Ca binni lídxibe zabicaꞌ lu xpángube
dxi gueelaꞌ, laga nuu guibáꞌ.
30 »Pa laacabe gusiaandacabe ni bisiideꞌ laacabe
ne qué sa nándacabe ca xtiidxaꞌ,
31 ne pa laacabe qué guizaaláꞌdxicabe ca diidxaꞌ biaꞌ xtinneꞌ
ne qué guzuubacabe xtiidxaꞌ la?
32 zaguiñeꞌ laacabe ne doo ne yaga,
xiñee qué nácabe guzuubacabe xtiidxaꞌ;
33 huaxa David la? qué zusaanaꞌ de ganaxhieeꞌ laa,
ne qué ziuu dxi gucheeniáꞌ laa.
34 Qué zache diꞌ xtiidxaꞌ ne laabe,
ne qué zabiéꞌ saꞌyaꞌ.
35 Purtiꞌ diidxaꞌ ni bidieeꞌ David que nandaayaꞌ ni,
ne qué zusuguieeꞌ laabe:
36 ca binni lídxibe zabicaꞌ lu xpángube
zácacaꞌ xaique, laga cá gubidxa.
37 ¡Zuzuhuaaꞌ dxiicheꞌ laacabe, casi cá beeu!
¡Zuzuhuaaꞌ dxiicheꞌ laacabe, laga nuu guibáꞌ!»
38 Peru lii la? bidxiiluꞌ ne qué nusisácaluꞌ
xaique ni gulíuꞌ;
¡bidxiichineuꞌ laabe!
39 Gudicheluꞌ xtiidxaluꞌ ne laabe;
ne bisáꞌbiluꞌ laꞌpaꞌ dxiꞌbaꞌ íquebe layú.
40 Gudiñentaaluꞌ ca basoo xtibe;
¡ne binideluꞌ ca xquídxibe!
41 Guiráꞌ tu zidiꞌdiꞌ ribaꞌnaꞌ ni gacalaꞌdxiꞌ;
ne ca ni dxaagabe ruxidxi laabe.
42 Runi lii ca ni nanalaꞌdxiꞌ laabe
riéchecaꞌ rundapiꞌ nacaꞌ lu bi.
43 Bisituumbuluꞌ ruaa gudxíu yuꞌlaꞌ xtibe,
ne qué ñacaneuꞌ laabe ra cadíndebe.
44 Bisuiꞌluꞌ xtúxhube;
ne bisáꞌbiluꞌ xpángube layú;
45 bisióꞌxholuꞌ laabe nagueenda,
ne bisutuiluꞌ lube.
46 Ay Tata Diuxi,
tica pa dxi ndiꞌ nouꞌ gucaachiluluꞌ.
Ñee qué ziete lu xiana xtiuꞌ la?
47 Tata Diuxi, bietenalaꞌdxiꞌ nachucu nga xquendanabaneꞌ;
miatiꞌ ni bizouꞌ, qué ribani xadxi.
48 ¡Guirutiꞌ zanda guibani sin qué chuu dxi gatiꞌ!
¡Guirutiꞌ zanda guilá lu náꞌ guendaguti!
49 Tata Diuxi,
paraa nuu guendaranaxhii nirudóꞌ xtiuꞌ que,
guꞌdxuꞌ David qué zusaanuꞌ laa.
50 Tata Diuxi, gunna stale binni nga
rulaa diidxaꞌ ca xpínniluꞌ;
ne ndaaniꞌ ladxiduáꞌ nga ziniáꞌ ca di ca.
51 Ay Tata Diuxi,
¡ca ni nanalaꞌdxiꞌ lii, zacá nga rugaandacaꞌ laadu!
¡Zacá nga rugaandacabe ni gulíuꞌ que, gatigá!
52 Nandaayaꞌ gacaꞌ Tata Diuxi guiráꞌ dxi.
¡Zacá gácani!