Tata Diuxi, xiñee cudxiiluꞌ naa
Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa ca xiiñiꞌ Coré. Ni gudixhe xaique xtiꞌ ca binni ruundaꞌ, ra nuu guendahuará. Ni gudixhe Hemán ezrahíta que, gacaꞌ ne guendaruundaꞌ.
88
Tata Diuxi ni bizáꞌ naa ne ni bilá naa,dxi ne gueelaꞌ rinabaꞌ lii gacaneluꞌ naa,
2 ¡gucuaa ca nadaayaꞌ xtinneꞌ!,
¡bicaadiaga ca xtiidxaꞌ!
3 Maꞌ stale guendananá biaba luguiaꞌyaꞌ,
biaꞌ que guuti si cani naa;
4 ¡maꞌ zanda ugábacabe naa lade gueꞌtuꞌ,
tí maꞌ birá stipa xtinneꞌ!
5 Maꞌ bisáꞌbicabe naa lade gueꞌtuꞌ;
casi tobi ni guti lu guendaridinde
ni maꞌ bicaachicabe laa;
nuaaꞌ casi tobi ni maꞌ cadi culábiluꞌ laa,
nuaaꞌ casi tobi ni maꞌ biasiaandaluꞌ laa.
6 Bisábaluꞌ naa ndaaniꞌ ti guiruyú ni jma gueteꞌ,
ra nacahuidóꞌ.
7 Luguiaꞌyaꞌ bigaaniluꞌ xiana xtiuꞌ,
¡ne bindíziluꞌ naa xaꞌnaꞌ xnísaluꞌ!
8 Lii biꞌnuꞌ guixaleꞌ ca xhamiguáꞌ de naa;
lii biꞌnuꞌ guixhacaláꞌdxicabe naa.
¡Nacaꞌ sica ti binni daguyoo qué ganda guiree!
9 Xtiꞌ ni ruunaꞌ xhaata dede ma cacheepaꞌ luaꞌ.
¡Tata Diuxi, guiráꞌ dxi rucaa ridxi lii,
ne rundapeꞌ nayaꞌ guibáꞌ ra nuuluꞌ!
10 Zuꞌnuꞌ xouꞌ ni nandxóꞌ ne gueꞌtuꞌ.
Zanda xa gudii gueꞌtuꞌ lii diuxquixe.
11 Zuíꞌxacabe diidxaꞌ ni huandíꞌ xtiuꞌ ne diidxaꞌ guendaranaxhii xtiuꞌ
ndaaniꞌ baꞌ, ne ra raca ni ná guendaguti.
12 Lu gueelaꞌ cahuidóꞌ xtiꞌ guendaguti, ra riaandaꞌ guiráꞌ xixé,
ziuu xa tu guꞌyaꞌ guendaruni jneza ne guendaridxagayaa xtiuꞌ.
13 Huaxa naa la? Tata Diuxi, lii nga rucaa ridxi;
siadóꞌ guieꞌ ruundaꞌ ndaayaꞌ gúnaluꞌ.
14 Xiñee rudxii décheluꞌ naa Tata Diuxi.
Xiñee ruxhooñeluluꞌ de naa.
15 Dede dxi nahuiineꞌ
cadideꞌ ra nagana ne yaca si gateꞌ;
huadideꞌ stale ni naná ni huaseendaluꞌ luguiaꞌyaꞌ,
yanna maꞌ qué ganda guayaꞌ cani.
16 Xiana roꞌ xtiuꞌ huadiꞌdiꞌ luguiaꞌyaꞌ,
ne huasábani naa;
17 nutaaguꞌ ni naa gatigá,
sica ti nisa roꞌ.
18 Bixhaleluꞌ de naa ca xhamiguaꞌ ne ca ni rizayaniáꞌ,
yanna maꞌ nisi gueelaꞌ cahui ridaaguaꞌ.