¡Bilá laadu xtiꞌ bieque!
Ni gudixhe xaique xtiꞌ ca binni ruundaꞌ. Guendaruundaꞌ diidxaguieꞌ bicaa ca xiiñiꞌ Coré.
85
Tata Diuxi,nabé nachaꞌhuiꞌ nga huayacaluꞌ ne xquídxiluꞌ diꞌ xa;
bichaaluꞌ xquendanabani Jacob;
2 bisiaandaluꞌ guendanadxabaꞌ xtiꞌ xquídxiluꞌ,
ne bixhialuꞌ ca donda xtini;
3 gundetecouꞌ lu xiana xtiuꞌ
ne guyuu dxí láꞌdxiluꞌ.
4 Diuxi ni rulá laadu,
¡bilá laadu yanna,
ne maꞌ cadi guidxichinerouꞌ laadu!
5 Ñee qué ziuu dxi guirá
xiana xtiuꞌ ne laadu la?
6 Ñee maꞌ qué zudiirouꞌ laadu guendanabani la?
tí guiechené xquídxiluꞌ lii.
7 Ay Tata Diuxi,
¡biluíꞌ laadu guendaranaxhii xtiluꞌ, ne bilá laadu!
8 Chigucaaꞌ diaꞌgaꞌ ca diidxaꞌ ni chi guiníꞌ Tata Diuxi;
laabe chiguídxibe diidxaꞌ nandaayaꞌ xquídxibe,
ca ni qué rucheené laabe,
tí qué chuꞌ dxi gacaꞌ íquecabe.
9 Huandíꞌ nga, ma yaca zeeda dxi xtiꞌ Diuxi,
ti gulabe ca ni rusisaca laabe;
guendanandxóꞌ xtibe qué ziaadxaꞌ ndaaniꞌ xquídxinu.
10 Guendaranaxhii ne ni huandíꞌ zadxaagalucaꞌ,
dxidóꞌ ne diidxaꞌ biaꞌ nazaaca zudisaacaꞌ bixiduꞌ,
11 zachendú ni huandíꞌ lu guidxilayú,
ne diidxaꞌ biaꞌ zuuyadxí dede guiaꞌ guibáꞌ.
12 Tata Diuxi peꞌ nga zusaba nisaguié,
ne ca layú xtinu zudiicaꞌ cuananaxhi.
13 Diidxaꞌ biaꞌ zazá niru lube,
ne zaguixhe chaahuiꞌ lu neza sábe.