Guendaribanaꞌ lidxi Diuxi
Ni gudixhe xaique xtiꞌ ca binni ruundaꞌ, ra xhidxi yagalé bizáꞌ ca filisteo. Ni bicaa ca xiiñiꞌ Coré. Guendaruundaꞌ diidxaguieꞌ.
84
¡Pabiáꞌ sicarú yuꞌduꞌ xtiuꞌ,Tata Diuxi ni nandxóꞌ!
2 ¡Ribanaladxeꞌ chuaaꞌ
ndaaniꞌ leꞌ xtiꞌ yuꞌduꞌ xtiuꞌ!
¡Ne guidubi ladxiduáꞌ
ruundaꞌ nayecheꞌ guna Diuxi xtiꞌ guendanabani!
3 Dede biguini yaachia ne bitindiꞌ ruaa yoo
ridxela ra guni lidxi ca xiiñiꞌ
ndaaniꞌ yuꞌduꞌ xtiuꞌ,
ay Tata Diuxi ni nandxóꞌ,
Xaique xtinneꞌ, Diuxi ni bizáꞌ naa.
4 ¡Aque nayecheꞌ nga ca ni nabeza ndaaniꞌ yuꞌduꞌ xtiuꞌ,
ne dxi gueelaꞌ cayuundanecaꞌ lii!
5 ¡Aque nayecheꞌ nga ca ni ridxela ndaaniꞌ nouꞌ ti stipa gacané laacaꞌ,
ca ni rinabalaꞌdxiꞌ sáꞌ guiaba xibi lu dani xtiuꞌ!
6 Dxi tídicabe ndaaniꞌ layú xtiꞌ Nisa Ruunaꞌ
zúnicabe ni ti nisa candani,
de ne nisaguié zaguu ndaayaꞌ ni;
7 zadale xtípacabe,
ne lu dani Sión zuuyacabe Diuxi ni nandxóꞌ.
8 Tata Diuxi, Diuxi ni nandxóꞌ,
Diuxi xtiꞌ Jacob,
¡bicaadiaga ndaayaꞌ xtinneꞌ!
9 Ay Diuxi, biiyaꞌ dxichi
dxa ni rapa laadu,
dxa ni gulíuꞌ gaca xaique.
10 ¡Jma risaca chuaaꞌ ti dxi ndaaniꞌ leꞌ xtiꞌ yuꞌduꞌ xtiuꞌ,
que chuaaꞌ ti xhiapa dxi decheni!
Jma risaca gacaꞌ gupa yuꞌduꞌ xtiuꞌ,
que cuezaꞌ lu xilate nadxabaꞌ.
11 Tata Diuxi ruzaaniꞌ ne rapa laanu;
Tata Diuxi nadxiibe ne rusisácabe ca ni nayá xquendanabani,
ne qué riabe ni gudiibe laacaꞌ.
12 Tata Diuxi ni nandxóꞌ,
¡aque nayecheꞌ nga ca ni ricá lú lii!