Diidxaꞌ ni rinabanécabe Diuxi gacané
Guendaruundaꞌ diidxaguieꞌ ne diidxariuundaꞌ rusisacanécabe Diuxi ni bicaa Asaf.
83
Ay Diuxi, ¡cadi iganuꞌ!,¡cadi guiaanadxiuꞌ ne cadi guidaaguꞌ diꞌ ruaaluꞌ!
2 Biiyaꞌ xi cayuni ca ni qué racalaꞌdxiꞌ lii, ca ni nanalaꞌdxiꞌ lii;
cayayacaꞌ luguialuꞌ.
3 Guníꞌ xtiidxacabe
gusábacabe xquídxiluꞌ,
¡guninácabe ca ni rápaluꞌ!
4 Guníꞌ íquecabe gunduuxecabe laadu
guinitiludu casi guidxi roꞌ,
tí qué chuꞌruꞌ dxi guiete lá Israel.
5 Bitaaguꞌ xtiidxacabe guninácabe lii,
gúcacabe tobi si:
6 laacabe ca binni lidxi Edom ne Ismael,
ca ni zá lu xneza Agar ne Moab,
7 Guebal, Amón ne Amalec,
ca filisteo, ca ni nabeza ndaaniꞌ guidxi Tiro,
8 de ne ca asirio bidaaguꞌ laacabe,
laapecaꞌ nga náꞌ nadipaꞌ xtiꞌ ca xiiñiꞌ Lot.
9 Biꞌniꞌ laacabe ni biꞌnuꞌ Madián,
ni biꞌnuꞌ Sísara,
casi bíꞌniluꞌ Jabín lu guiiguꞌ xtiꞌ Quisón,
10 ca ni gucadé lu Endor,
¡ca ni gucaꞌ guiꞌ xtiꞌ guidxilayú!
11 Biꞌniꞌ ca binni risaca xtícabe
ni biꞌnuꞌ Oreb ne Zeeb;
biꞌniꞌ ca xaique xtícabe
ni biꞌnuꞌ Zébah ne Salmuná,
12 ca ni gucalaꞌdxiꞌ nicaacaꞌ layú xtiꞌ Diuxi.
13 Diuxi ni bizáꞌ naa, bitubi laacabe casi bidunu,
sica ti bandaga bidxi ni ruaꞌ bi;
14 ne zacá casi ruzaaquiꞌ gui ne xpele ca guiꞌxhiꞌ
ne rugazeguí ca dani,
15 ¡zacá guzabinanda laacabe ne nisaguié bi xtiuꞌ
ne bichibi laacabe ne bidunu xtiuꞌ!
16 ¡Tata Diuxi, bisutuí lúcabe,
tí guyúbicabe lii!
17 Guituí lúcabe dede dxi nabánicabe;
¡guituí lúcabe dede dxi gáticabe!
18 ¡Gánnacabe tobi luchaluꞌ,
ne lii siouꞌ nga Tata Diuxi
lu guidubi guidxilayú!