Guendanandxóꞌ xtiꞌ Diuxi ne Guendanadxabaꞌ xtiꞌ Israel
Ni gudixhe xaique xtiꞌ ca binni ruundaꞌ, ra xhidxi yagalé bizáꞌ ca filisteo. Ni bicaa Asaf.
81
¡Guidúꞌndanu ne stale guendanayecheꞌ neza lú Diuxi, laabe nga stipa xtinu!¡Ne stale ridxi nayecheꞌ la gusisaca Diuxi xtiꞌ Jacob!
2 Laguundaꞌ ne saa xtiꞌ pandero,
ne saa naxhi xtiꞌ arpa ne salteriu.
3 Laguxhidxi trompeta ra guicá beeu huiiniꞌ ne beeu roꞌ,
tí dxi ca nga laní xtinu.
4 Ndiꞌ nga ti diidxaꞌ biaꞌ
ni bidii Diuxi xtiꞌ Jacob Israel;
5 ndiꞌ nga diidxaꞌ ni gúdxicabe José
dxi Diuxi bicaalú Egipto.
Binadiaꞌgaꞌ ti ridxi ni qué huayuu dxi gunadiaꞌgaꞌ:
6 «Gundeteꞌ yuáꞌ dxiꞌbaꞌ xíqueluꞌ que,
ne guleeꞌ lii lu dxiiñaꞌ naná.
7 Lu xizaa xtiuꞌ bicaaluꞌ ridxi naa, ne naa bilaꞌyaꞌ lii;
dede lu za caxidxi laa bicabe lii;
guluaaꞌ biaꞌyaꞌ lii cueꞌ nisa xtiꞌ Meribá.
8 Bicaadiaga, guidxi xtinneꞌ, naa culidxeꞌ lii;
¡tila guzuubaluꞌ diidxaꞌ xa, Israel!
9 Cadi gapuꞌ gadxé bidóꞌ;
cadi ganaxhiiuꞌ bidóꞌ xtiꞌ dxuꞌ.
10 Naa nga bixhozeluꞌ, Diuxi xtiuꞌ,
ni gulee lii de Egipto;
bixhaleꞌ ruaa, ne naa zuyaanaꞌ lii.
11 »Peru xquidxeꞌ qué niná nucaa diaga naa;
¡Israel qué niná nuzuubaꞌ xtiidxaꞌ!
12 Ngue runi bisaanaꞌ laacabe gúnicabe ni na íquecabe,
ne bibánicabe casi na íquecabe.
13 ¡Pa xquidxeꞌ nucaa diaga naa!
¡Ne pa Israel nizá lu xnezaꞌ la?
14 ti lubí si niguixheꞌ ca ni nanalaꞌdxiꞌ laacabe layú,
ne nusabanayaꞌ laacaꞌ!»
15 Ca ni nanalaꞌdxiꞌ Tata Diuxi, ñaba dxiibicaꞌ xañeebe,
ne nidaaguꞌ ca lu xnezacaꞌ.
16 Diuxi nuyaanaꞌ xpinni ne xubaꞌ ni jma nachaꞌhuiꞌ,
ne nuguéꞌ laacabe dxiña yaga ni nucueeza lu guendarati nisa xtícabe.