¡Biiyaꞌ laadu ne guendanayecheꞌ!
Ni gudixhe xaique xtiꞌ ca binni ruundaꞌ, sica rixidxi saa xtiꞌ «Los Lirios». Guendaruundaꞌ diidxaguieꞌ bicaa Asaf ni ruzeeteꞌ xi bíꞌnibe.
80
Ni rapa Israel casi ti dendxuꞌ,ni rizá niru lú José sica rizá nírucabe lu dendxuꞌ,
lii nuuluꞌ lade ca ángel,
¡bicaadiaga!
¡Biiyaꞌ dxichi Efraín,
2 Benjamín ne Manasés!
¡Bibani ne gudáꞌ gulaluꞌ laadu ne stipa xtiluꞌ!
3 Ay Diuxi,
¡biꞌniꞌ laadu casi gúcadu chiqué!
¡Biiyaꞌ dxichi laadu ne bilá laadu!
4 Tata Diuxi ni nandxóꞌ,
padxí ti ndiꞌ nga guiaana dxí de guchiichiꞌ
ca diidxaꞌ ndaayaꞌ xtiꞌ xquídxiluꞌ lii.
5 Casi ti gueta biyaanaluꞌ laadu stale nisa guendaruunaꞌ;
ne bigueꞌluꞌ laadu ziáꞌ nisa biete ludu.
6 Ma biꞌnuꞌ laadu xquite ca binni dxaagadu,
ne ca ni nanalaꞌdxiꞌ laadu ruxídxicaꞌ laadu.
7 Diuxi ni nandxóꞌ,
¡biꞌniꞌ laadu casi gúcadu chiqué!
¡Biiyaꞌ dxichi laadu ne bilá laadu!
8 Lu layú xtiꞌ Egipto guleeluꞌ ti yaga uva;
ne guladxuꞌ ca binni qué niná nicaa xtiidxaluꞌ,
ne bidxiibaluꞌ ni raqué.
9 Bisialuꞌ layú ra bidxiibaluꞌ yaga uva que,
ne gucuaa xcu ni bidaleni ndaaniꞌ guidxi.
10 Bitaaguni ca guiꞌxhiꞌ que ne xpandani,
ne ca nani bitaaguni ca yaga soo.
11 Bicheechenani dede ra nisadóꞌ,
ne dede ra guiiguꞌ Éufrates gudiche xiiñiꞌ ni.
12 Xiñee bichialuꞌ leꞌ xtini,
yanna guiráꞌ binni zidiꞌdiꞌ ruaa neza ruchuugucaꞌ ca cuananaxhi xtini.
13 Reeda bihui guiꞌxhiꞌ runidé ni;
¡ne reeda ca maniꞌ guiꞌxhiꞌ rábicani!
14 Diuxi ni nandxóꞌ, biguetaꞌ, biguetaꞌ laꞌ;
dede guiaꞌ guibáꞌ biiyaꞌ dxichi,
ne bialaꞌdxiꞌ yaga uva diꞌ,
15 dxa yaga uva ni bidxiibuꞌ que,
dxa xiiñini ni bizuhuaa dxiichiluꞌ que.
16 Ne xiana xtiluꞌ bixuuxe
ca ni ruchuuguꞌ ne ruzaaquiꞌ ni;
17 ne gucané baꞌdunguiiu ni maꞌ gulíuꞌ,
gucané xiiñibe ni bizuhuaa dxiichiluꞌ,
18 ne zacá maꞌ qué ziuu dxi guixaledu cueꞌluꞌ.
¡Bidii laadu guendanabani, ne lii si nga guicá ruaadu!
19 Ay Tata Diuxi, Diuxi ni nandxóꞌ,
¡biꞌniꞌ laadu casi gúcadu chiqué!
¡Biiyaꞌ dxichi laadu ne bilá laadu!