Yuubaꞌ ni bialé dxi gucadé Jerusalén
Guendaruundaꞌ diidxaguieꞌ bicaa Asaf.
79
¡Ay Diuxi,ca ni qué nicaa xtiidxaluꞌ biuucaꞌ ndaaniꞌ layú xtiuꞌ!
Bituñeecaꞌ yuꞌduꞌ ndaayaꞌ xtiuꞌ
ne binidecaꞌ Jerusalén!
2 ¡Biiticabe ca xpínniluꞌ,
ca ni gunaxhii lii,
ne bisaanacabe laacaꞌ
para go nguꞌxhiꞌ ne maniꞌ guiꞌxhiꞌ laacaꞌ!
3 Sica rixii nisa bixhiicabe rini xticaꞌ
lu guidubi Jerusalén,
ne guirutiꞌ tu gucaachiꞌ laacaꞌ.
4 Ca binni dxaagadu nabé rugaanda laadu;
guiráꞌ tu nuu gaxha de ra nabézadu ruxidxi laadu.
5 Ay Tata Diuxi,
ñee qué ziuu dxi tidiꞌ xiana xtiuꞌ la?
Ñee huandíꞌ qué ziuíꞌ lu xiana xtiuꞌ la?
6 ¡Bisaba di xtiuꞌ ca luguiáꞌ ca ni qué niná nicaa xtiidxaluꞌ
ca ni qué runibiáꞌ lii ne ca ni qué rucaa ruaa lii!
7 Laacabe bixuuxecabe Jacob,
ne binidécabe xquidxi.
8 Cadi guquiꞌxuꞌ laadu
ca donda xtiꞌ ca bixhozególadu;
¡dané ti náꞌ dxiña xtiuꞌ guchaagalú laadu,
tí nuudu néxhedu layú!
9 ¡Ay Diuxi, ni rulá laadu,
biiyaꞌ laadu, bilá laadu ne bixhá xtóndadu,
ne lá ndaayaluꞌ!
10 Ca binni qué niná nicaa xtiidxaluꞌ, qué gápacaꞌ xidé guiniꞌcaꞌ:
«Paraa nuu Diuxi xtícabe.»
¡Bidii guidúꞌyadu guquiꞌxuꞌ laacabe ca guendaguti xtiꞌ ca xpinnuꞌ!
¡Ne laaca gánnacabe ni!
11 Bicaadiaga ca ridxi yuubaꞌ xtiꞌ ca ni daguyoo,
ne bilá ne stipa ndxoꞌ xtiuꞌ
ca ni maꞌ nexheꞌ guuticabe.
12 Ay Tata Diuxi,
biquixe ca binni dxaagadu diꞌ gadxe bieque
guiráꞌ ca diidxaꞌ hualaacabe lii;
13 ne laadu, ca ni nácadu xquídxiluꞌ,
ca ni nácadu dendxuꞌ nuu ndaaniꞌ ca layú xtiluꞌ,
qué ziaanadxidu de gudiꞌduꞌ diuxquixe lii,
¡ne zadúꞌndadu ca diidxaꞌ ra cusisácadu lii!