Ca dxiiñaꞌ ni runi Diuxi para gacané ca xpinni
Diidxaguieꞌ rusiidiꞌ ni bicaa Asaf.
78
Binni xquídxecaꞌ, lagulabi ni cusiideꞌ;¡bisaba ique ne bicaadiaga chaahuiꞌ ni cayabeꞌ lii!
2 Chiguiniéꞌ ne diidxaꞌ gola;
chiguiniéꞌ diidxaꞌ ni maꞌ xadxí gaꞌchiꞌ
raca stale iza.
3 Ni huayunadiáganu ne ni nánnanu
ca bixhózenu biuíꞌne ni laanu,
4 qué zucáꞌchinu ni neza lú ca xiiñinu.
Ca ni chigale ruꞌ zusisacanenu laacaꞌ Tata Diuxi,
ne zuzéꞌtedu ca guendanandxóꞌ ne ca guendaridxagayaa xtibe.
5 Diuxi gudixhe ti diidxaꞌ biaꞌ guicaa Jacob;
ne laaca gudíxhebe sti diidxaꞌ biaꞌ sáꞌ nanda Israel,
ne bicaabe ca bixhozególanu gusiidiꞌ ni ca ni zá de laacaꞌ,
6 tí ganna ca ni zeedaruꞌ ni,
ca ni chigale ruꞌ,
ti laacaꞌ, laaca gusiidicani ca xiiñicaꞌ;
7 para guicaacabe xtiidxaꞌ Diuxi
ne qué gusiaandacabe ni bíꞌnibe;
ne guzuubacaꞌ xtiidxabe
8 tí cadi gácacabe casi bixhozególacabe,
qué nuzuubacaꞌ diidxaꞌ,
natende ladxidoꞌcaꞌ;
¡ca binni bichee ne Diuxi!
9 Ca xiiñiꞌ Efraín,
nin ne nuacaꞌ guiibaꞌ naazecaꞌ baza ne bazandíꞌ,
bidxiidechecaꞌ dxi cazá gui que;
10 qué nusisácacabe diidxaꞌ bisegunécabe Diuxi,
ne qué ninácabe ñúnicabe ni bisiidibe.
11 Bisiaandacabe guiráꞌ ni bíꞌnibe,
ca guendanandxóꞌ ni biluiꞌbe laacaꞌ.
12 Diuxi biꞌniꞌ guendanandxóꞌ neza lú ca bixhózecabe
ndaaniꞌ layú xtiꞌ Soan, ni nuu Egipto:
13 bíꞌnibe nisadóꞌ chupa ndaa, ne bitiidibe laaca ndaaniꞌ ni,
bicueezabe xnísani casi ñácani ti lindaa.
14 Ridxíꞌ la? bisá nírube ti za lucaꞌ,
ne huaxhinni la? ne xpiaaniꞌ ti bele.
15 Lu layú dachi la? bíꞌnibe ti dani chupa ndaa,
ne bigueꞌbe nisa laacaꞌ dede ra bidxá tipa ndaanicaꞌ.
16 Bisidá Diuxi nisa lu dani ni gundaa que,
guca ti nisa ziaꞌ raqué, dede cuxooñeꞌ.
17 Ne nin ne ngue bicheenerucabe Diuxi;
bicaalúcabe laabe lu layú dachi que.
18 Gucaláꞌdxicabe ñuuyacabe pa huandíꞌ nga nandxóꞌ Diuxi,
ne gunábacabe guendaró ni biluíꞌ láꞌdxicabe.
19 Ne guníꞌcabe laabe, nácabe:
«Zanda xa guzuhuaa Diuxi ti mexaꞌ guendaró lu layú dachi diꞌ.
20 Huandíꞌ gundaa Diuxi dani que,
ne bidá nisa luni casi ti guiiguꞌ,
dede bindaahuani layú que;
yanna yaꞌ, zanda xa gudiibe guetastiá laanu,
zanda xa guyaanabe beela ca xpínnibe.»
21 Ra binadiaga Diuxi ni caníꞌcabe que la? bidxiichi;
¡xiana xtibe, guca casi ti gui,
guzeni luguiáꞌ Jacob!
22 Purtiꞌ qué nicaacabe xtiidxaꞌ Diuxi,
ne zacaxacabe qué zacané Diuxi laacabe.
23 Nin ne zacá, Diuxi guníꞌ ne ca za,
ne bixhalendaga guibáꞌ;
24 ¡casi ti nisaguié bisábabe maná gó ca xpínnibe,
laani nga xubastiáa xtiꞌ guibáꞌ!
25 ¡Gudó ndácabe guetastiá xtiꞌ binni guibáꞌ!
¡Biyaana Diuxi laacaꞌ dede ra bidxá tipacaꞌ!
26 Bindubi bi guibáꞌ,
ti bi ni biale neza ra rindani gubidxa ne ti bi nisa;
¡Diuxi biseendaꞌ cani ne guendanandxóꞌ xtiꞌ!
27 Casi ti nisaguié bisábabe beela gó ca xpínnibe;
¡biaba ndaꞌ jma bere xunaxi casi yuxi xtiꞌ nisadóꞌ!
28 Bisaba Diuxi ni galaa batóꞌ ra nabézacabe que
ne guidubi ra zuba lídxicabe que.
29 Gudó ndácabe biaꞌ gunda tiꞌ dede ra bidxá tipa ndaanicabe,
zaqué biꞌniꞌ Diuxi ni nácabe.
30 Caꞌruꞌ lica guidxá ladxidóꞌcabe,
dxa ruꞌ guendaró que ndaaniꞌ ruaacabe,
31 ora biaba xiana xtiꞌ Diuxi lugiácabe,
biiti ca baꞌdunguiiu ni jma nadipaꞌ.
¡Ne biitibe ca baꞌdunguiiu ni jma guizáꞌ xtiꞌ Israel!
32 Nin ne zaqué, bicheerucabe;
qué nicaacabe ca guendanandxóꞌ xtiꞌ Diuxi casi huandíꞌ.
33 Ngue runi Diuxi binduuxeꞌ laacabe
casi ñácacabe ti guendaricaalaꞌdxiꞌ
lade ti dxiibi roꞌ.
34 Ra biiti ruꞌ Diuxi laacabe, raqué ruꞌ biyubi lelecabe laa;
dxi ne gueelaꞌ.
35 Zaqué tiꞌ rietenaladxíꞌcabe nuu Diuxidóꞌ
ni rapa ne rulá laacabe.
36 Nanaxhi ruaacabe ne Diuxi,
huaxa rusiguiicabe laa ne diidxaꞌ naxhi.
37 Laacabe qué ñaca ladxidóꞌcabe tobi si ne Diuxi,
qué nizaaláꞌdxicabe diidxaꞌ ni bidiicabe laabe.
38 Diuxi biálaꞌdxiꞌ laacabe,
bixhá xquendanadxabacabe ne qué nuxuuxe laacabe;
stale bieque qué nutopa xiana xtícabe,
ne bicueeza guendaridxiichi xtiꞌ.
39 Diuxi bietenalaꞌdxiꞌ nácacabe binni guidxilayú;
casi ti bi, rie ne maꞌ qué ribiguetaꞌ.
40 ¡Panda tiru qué nuzuubacabe xtiidxaꞌ Diuxi,
ne bidiicabe laabe stale yuubaꞌ ndaaniꞌ layú dachib!
41 Ne ribiguetacabe rucaalúcabe laabe, ruchelaniꞌdicabe laabe;
¡rusiguunducabe ladxidóꞌ Diuxi xtiꞌ Israel!
42 Qué peꞌ ñedasilú laacabe dxi que
dxi bilá Diuxi laacabe ne guendanandxóꞌ xtiꞌ, lu náꞌ ca ni nanalaꞌdxiꞌ laacabe;
43 dxi bíꞌnibe jma guendanandxóꞌ ne guendaridxagayaa,
lu ca layú xtiꞌ Soan ni nuu Egipto;
44 dxi bíꞌnibe rini nisa guiiguꞌ,
ni qué ñanda ñeꞌ ca egipcio.
45 Biseendabe biaꞌlazi yaa ne bidxiꞌ ñeegaa luguiáꞌ ca Egipcio,
ca ni binduuxeꞌ ne binitilú laaca;
46 biseendabe gusúꞌ gudó guiráꞌ guela xtícabe
ra zeꞌ dxiiñaꞌ ni bíꞌnicabe.
47 Bisábabe nisaguié bi lu ca layú xticaꞌ,
ne binitiluni ca yaga duꞌgaꞌ chaꞌhuiꞌ ne ca yaga uva xtícabe.
48 Ca yuze ne ca dendxuꞌ xtícabe, gúticaꞌ
xa nisaguié bi ne xaguí cayaba guibáꞌ.
49 Diuxi biseendaꞌ xiana xtiꞌ luguiácabe:
guendaridxiichi, guendaró dí ne xizaa,
ca ni gucaꞌ sica baduluguidxi xtiꞌ guendanagana.
50 ¡Qué lica nucueezabe lu xiana xtibe!
Qué ninabe nulabe laaca,
bigaasabe laaca lu náꞌ guendaguti;
51 ¡ndaaniꞌ peꞌ guidxi Egipto
biitibe guiráꞌ ca baꞌduꞌ lugola xtiꞌ ca Egipcio!
52 Guleebe Israel casi ribeecabe dendxuꞌ;
guzanebe xquídxibe lu layú dachi.
53 Guzá nírube lucaꞌ yenebe laaca lu ti neza chaꞌhuiꞌ
tí cadi guidxíbicaꞌ,
ne ca ni nanalaꞌdxiꞌ laacabe que la? bindaahuabe laaca ndaaniꞌ nisadóꞌ.
54 Diuxi beedané ca xpinni lu layú ndaayaꞌ xtiꞌ,
¡ca dani ni laapebe gúxhabe!
55 Guládxibe ca binni ni nuu raqué, guleebe laaca neza lú Israel;
ne gudiizibe ca layú xticaꞌ lú ca xpínnibe,
ne guluube ca xpínnibe ndaaniꞌ lidxi ca ni guládxibe que.
56 Peru laacabe guzíꞌ biáꞌcabe Diuxidóꞌ,
biásacabe luguiabe,
ne qué nuzuubacabe xtiidxabe;
57 bíꞌnicabe ni biꞌniꞌ ca bixhózecabe,
bisaanacabe Diuxi qué ñápacabe tobi si ladxidóꞌcabe ne laa;
¡biguudecabe casi ti baza ni qué guizáꞌ!
58 Bichiichicabe laabe ne ca xmexacabe ra gunaxhiicabe sti bidóꞌ;
ra gunaxhiicabe sti bidóꞌ, bidxiibacabe gui ndaaniꞌ ladxidoꞌbe.
59 Ra biiꞌyaꞌ Diuxi guiráꞌ ca ni cayúnicabe que la?
ne bidxiidechecabe Israel,
60 ne guxhañeecábe ndaaniꞌ yuꞌduꞌ xtiꞌ Siló,
raqué ndaꞌ gulezabe lade binni guidxilayú.
61 Bidiibe guicaa ca ni nanalaꞌdxiꞌ laabe
ni naca stipa ne guendanandxóꞌ xtibe.
62 Bidxiichi xhaatanebe ca xpínnibe,
ngue runi bigaasabe laaca ruaa gudxíu.
63 Ca baꞌdunguiiu que guzebelecaꞌ, gúticaꞌ;
ca badudxaapaꞌ ni nichaganaꞌ la? ¡qué ñápacaꞌ saa xtiꞌ guendaxheelaꞌ!
64 Ca gueꞌdxeꞌ que gúticaꞌ ruaa gudxíu,
ne ca gunaa bizabi xtícabe qué ñuunane laacabe.
65 Tata Diuxi bibani, sica lu ti bacaandaꞌ,
sica ti baꞌdunguiiu nadxibalú biree nisa lú,
66 bixhatañeebe ca binni nanalaꞌdxiꞌ laabe, ne bisuxooñebe laacaꞌ;
¡bisituí cábe lucaꞌ dxi ne gueelaꞌ!
67 Bidxiibe ca binni lidxi José,
ne qué nibibe ca xpinni Efraín;
68 gulibe ca xpinni Judá
ne dani Sión ni nabé nadxii xhaatabe.
69 Bicuíbe ti yuꞌduꞌ nasoo, biaꞌ nasoo guibáꞌ,
ne biquídxibe ñeeniꞌ ti qué chuꞌ dxi guixani, casi bíꞌnibe guidxilayú.
70 Gulibe David,
xa baꞌdunguiiu ni runi xhiiñabe,
ni guzá gupa dendxuꞌ;
71 guleebe laa lade ca dendxuꞌ,
tí gueeda gapaꞌ guidxi,
gueeda gapaꞌ Israel sica riaapaꞌ dendxuꞌ.
72 Ne gupa David xquidxi Diuxi;
gúpabe guidxi diꞌ ne yenebe laa lu ti neza chaꞌhuiꞌ
ne ti ladxidóꞌ nayá, ne ti ladxidóꞌ nexhená.