Guendariníꞌ ique guiráꞌ ni runi Diuxi
Ni gudixhe xaique xtiꞌ ca binni ruundaꞌ. Xtiꞌ Jedutún. Guendaruundaꞌ diidxaguieꞌ bicaa Asaf.
77
Ne ridxi nadipaꞌ ribidxeꞌ Diuxití gucaadiagabe naa.
2 Dxi naa nuaaꞌ naguunduꞌ ruyubeꞌ Tata Diuxi,
ne qué riaanadxiéꞌ de gundapeꞌ nayaꞌ guibáꞌ,
ne ruundaꞌ ndaayaꞌ lu gueelaꞌ.
Ladxiduáꞌ qué ridxela tu guizaca laa.
3 Ora rietenaladxeꞌ Diuxi, ruunaꞌ;
riníꞌ iqueꞌ, ne riguunduáꞌ.
4 Lii, Tata Diuxi, nin qué lica peꞌ rusisiaasiluꞌ naa;
¡nabé nayati nuu xpiaaneꞌ, ne qué ganda guiniéꞌ!
5 Rietenaladxeꞌ ca dxi ne ca iza ni maꞌ gudiꞌdiꞌ;
6 rietenaladxeꞌ dxi ruundaꞌ lu gueelaꞌ.
Ndaaniꞌ ladxiduáꞌ riniéꞌ ne rinaba diidxaꞌ laaca naa:
7 Ñee qué ziuu dxi guirá xiana Tata Diuxi la?
Ñee maꞌ qué zabiguetaꞌ guiabe laanu la?
8 Ñee maꞌ birá guendaranaxhii xtibe la?
Ñee maꞌ qué zudii xtiidxarube laanu la?
9 Ñee maꞌ bisiaandaꞌ Diuxi guendanachaꞌhuiꞌ xtiꞌ la?
Ñee stale peꞌ xiana xtibe ngue runi qué rilaseláꞌdxibe laanu la?
10 Ni jma riguu yuubaꞌ ladxiduáꞌ nga gannaꞌ
maꞌ bichaa Diuxi ne laanu.
11 Yanna zietenaladxeꞌ siáꞌ guiráꞌ guendanandxóꞌ
ni biꞌniꞌ Diuxi chiqué;
12 zaníꞌ iquesiáꞌ guiráꞌ ni bíꞌnibe chiqué.
13 Ay Diuxi, nabé nandxoꞌloꞌ ne guiráꞌ ni ruꞌnuꞌ;
nuu xa stobi nandxóꞌ casi lii.
14 ¡Lii nga Diuxi ni runi ni nandxóꞌ!
¡Biluiꞌluꞌ xtípaluꞌ ca guidxi roꞌ ca!
15 Ne stipa xtiluꞌ guleeluꞌ ca xpínniluꞌ,
ca xiiñiꞌ Jacob ne ca xiiñiꞌ José.
16 Ay Diuxi,
dxi biꞌyaꞌ nisadóꞌ lii, bidxiibi,
ne dede ra jma ziaꞌ ni gucaditi;
17 bisabadxacha ca za nisaguié,
guxidxilaa guibáꞌ ne biáꞌpinisa cheríꞌ chericaꞌ.
18 Dede runadiágacabe rixidxi laa xtídxiluꞌ lu bidunu;
biaaniꞌ guidxilayú ra cayáꞌpinisa guibáꞌ,
ne biniibidxacha xu guidxilayú.
19 Bixháleluꞌ nisadóꞌ ne gudíꞌdiluꞌ ndaaniꞌ ni;
gudiꞌdiluꞌ ndaaniꞌ stale nisa,
ne guirutiꞌ ñuuyaꞌ xtuubaluꞌ.
20 Lii bisieꞌnuꞌ Moisés ne Aarón sánecaꞌ xpinnuꞌ
sica rizánecabe dendxuꞌ.